ក្នុងកិច្ចប្រជុំបូកសរុបការងារឆ្នាំសិក្សា២០២៣-២០២៤ និងលើកទិសដៅផែនការអភិវឌ្ឍឆ្នាំសិក្សា២០២៤-២០២៥ លោកឧកញ៉ា ប៉ិច បូឡែន បានក្រើនរំលឹកដល់លោកគ្រូអ្នកគ្រូ នៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ទាំងអស់ត្រូវយល់ថា គ្រូបង្រៀនគឺជាវិស្វករនៃដួងព្រលឹង កំពុងច្នៃអភិវឌ្ឍមនុស្សដែលជាធនធានសង្គមកម្ពុជា។

លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ មានប្រសាសន៍ថា ប្រទេសណាក៏ដោយ គេតែងតែគិតពីការអប់រំជាសំខាន់, គ្រប់គ្នាទាំងអស់ដែលទទួលបានលទ្ធផលជីវិតបែបណាមួយ ទាំងការងារ ទាំងក្រុមគ្រួសារ គឺអាស្រ័យលើការអប់រំដែលទទួលបាន ។ ដូច្នេះ លោកគ្រូអ្នកគ្រូមានបេសកកម្មសំខាន់ណាស់ក្នុងការអភិវឌ្ឍកុមារ យុវជន ដើម្បីឱ្យសង្គមរបស់យើងរីកចំរើនទៅមុខ។

” គ្មាននរណាម្នាក់ដែលរីកចំរើនដោយមិនបានឆ្លងកាត់ការអប់រំដ៏ល្អទេ…”

លោកឧកញ៉ា ប៉ិច បូឡែន

ជាមួយគ្នានេះ លោកឧកញ៉ា ប៉ិច បូឡែន ក៏បានណែនាំទៅដល់លោកគ្រូអ្នកគ្រូនៃបណ្តាញសាលារៀនវេសឡាញទាំងអស់ ត្រូវសម្លឹងមើលផល នៃការងារអប់រំរបស់ខ្លួនឱ្យបានឆ្ងាយ និងលើសពីបន្ទប់រៀន និងសាលារៀន ពោលលោកគ្រូអ្នកគ្រូត្រូវមើលឱ្យឃើញថា កូនសិស្សដែលកំពុងបណ្តុះបណ្តាល តើ១០ឆ្នាំទៅមុខទៀតពួកគេនឹងអាចក្លាយទៅជានរណា ដែលអាចជាអ្នករកស៊ី សហគ្រិន ជាអ្នកធ្វើការឯកជនម្នាក់ដែលមានទំនួលខុសត្រូវ ឬជាមន្រ្តីរាជការម្នាក់ដែលមានការគិតល្អជាងមុន ។ អនាគតសង្គមជាតិ គឺពឹងទៅលើកុមារ យុវជន ដែលនៅក្នុងថ្នាក់រៀនរបស់លោកគ្រូអ្នកគ្រូ ដូច្នេះគ្រូបង្រៀនរួមចំណែកយ៉ាងសំខាន់ក្នុងការអភិវឌ្ឍមនុស្ស ដើម្បីរួមគ្នាកសាងសង្គមជាតិមួយដែលយើងចង់រស់នៅ។

លោកឧកញ៉ា ប៉ិច បូឡែន ក៏បានបង្ហាញពីកម្មវិធីថ្មីៗជាច្រើន ដែលបណ្តាញសាលារៀននឹងដាក់បញ្ចូលទៅក្នុងកម្មវិធីសិក្សានៅក្នុងឆ្នាំសិក្សាថ្មី ដើម្បីជួយកសាងសិស្សានុសិស្សឱ្យក្លាយជាមូលធនមនុស្សរបស់កម្ពុជា ដែលមានដូចជា មុខវិជ្ជាបច្ចេកវិទ្យា និងព័ត៌មាន (ICT) មុខវិជ្ជាសីលធម៌ពលរដ្ឋនិងចរិយាវិទ្យា មុខវិជ្ជាបំណិនជីវិត ក៏ដូចជាមុខវិជ្ជាសេដ្ឋកិច្ចជាដើម។

បើយោងតាមរបាយការណ៍ពីផែនការអភិវឌ្ឍកម្មវិធីសិក្សា របស់លោក តែ ឡាយ ប្រធាននាយកអប់រំ បានឱ្យដឹងថា នៅក្នុងឆ្នាំសិក្សាថ្មីនេះ បណ្តញសាលារៀនវ៉េស្ទឡាញន៍ បានរៀបចំកែសម្រួលកម្មវិធីសិក្សាជាច្រើ​នដើម្បីអភិវឌ្ឍសិស្ស​ឱ្យ​ក្លាយទៅជា​មូលធនមនុស្ស ដូចជា ការបន្ថែមកញ្ចប់សម្ភារៈអំណានថ្នាក់ដំបូងជំនួយបន្ថែមលើមុខវិជ្ជាភាសាខ្មែរថ្នាក់ទី១-៣ , ការដាក់បញ្ចូលមុខវិជ្ជាសហគ្រិនភាពសម្រាប់សិស្សថ្នាក់ទី១០ ទី១១ និងទី១២ ដើម្បីបណ្ដុះគំនិតក្នុងការវិនិយោគ ឬបើកអាជីវកម្ម, ការដាក់បញ្ចូលមុខវិជ្ជាបំណិនជីវិតសម្រាប់សិស្សថ្នាក់ទី៧ ទី៨ និងទី៩ ដែលមានដូចជា កសិកម្ម បដិសណ្ឋាកិច្ច ការងារហត្ថកម្ម ជំនាញបច្ចេកទេស ដែលជាការសិក្សាផ្សារភ្ជាប់នឹងការអនុវត្តក្នុងជីវភាពប្រចាំថ្ងៃ, ការដាក់បញ្ចូលកម្មវិធីបន្ថែមលើមុខវិជ្ជា សីលធម៌ពលរដ្ឋនិងចរិយាវិជ្ជា សម្រាប់សិស្សថ្នាក់ទី១០ និងទី១១ ទាក់ទងនឹងចរិយាវិជ្ជា និងការអប់រំតាមបែបព្រះពុទ្ធសាសនា, ក៏ដូចជាការដាក់ឱ្យប្រើប្រាស់សៀវភៅ e-Skills នៅក្នុងមុខវិជ្ជា បច្ចេកវិទ្យាព័ត៌មាន និងសារគមនាគមន៍ ឬ ICT នៅគ្រប់សាខាទាំងអស់ ដែលសៀវភៅ e-Skills នេះជាបណ្តុំនៃលំហាត់ដ៏សម្បូរបែប និងមេរៀនសំខាន់ៗដែលឆ្លើយតបនឹងវិវឌ្ឈន៍នៃបច្ចេកវិទ្យាព័ត៌មាន និងសារគមនាគមន៍ (ICT) នាពេលបច្ចុប្បន្ន៕