ក្នុងវេទិកាពិភាក្សាពីការវិវត្តន៍របស់បច្ចេកវិទ្យាឌីជីថលក្នុងការអប់រំ និងការអភិវឌ្ឍជំនាញ នៃសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ កាលពីពេលថ្មីៗនេះ ឯកឧត្តម ហ៊ាន សំបឿន អនុប្រធានបណ្ឌិត្យសភា​បច្ចេកវិទ្យា​ជីឌីថលកម្ពុជា (CADT) លើកឡើងថា បញ្ហាគម្លាតជំនាញ ឬជំនាញមិនស្របតាមទីផ្សារការងារ គឺដោយសារគ្រឹះស្ថានអប់រំ ធ្វើ​ការ​បណ្ដុះបណ្ដាលធនធានមនុស្សតែម្នាក់ឯង ដោយ​មិន​មានការ​ចូលរួមពីភាគីពាក់ព័ន្ធ។

ដូច្នេះជាដំណោះស្រាយ បើតាម ឯកឧត្តម ហ៊ាន សំបឿន ដើម្បីឱ្យសាលា និងក្រុមហ៊ុនឯកជនសហការគ្នាបណ្ដុះបណ្ដាលធនធានមនុស្សឱ្យស្របតាមទីផ្សារការងារ គឺទី១. ត្រូវ​មានការបញ្ជូនអ្នកជំនាញពីសហគ្រាស ឬក្រុមហ៊ុន មកធ្វើជាគ្រូឧទ្ទេសនៅក្នុងកម្មវិធីសិក្សា ដើម្បីឱ្យនិស្សិតបានដឹងអំពីការវិវត្តថ្មីៗនៅខាងសហគ្រាស និង ទី២. រៀបចំឱ្យសិស្សចុះកម្មសិក្សាទៅតាមសហគ្រាស ដើម្បីបានដឹងអំពីរបត់បរិយាកាសជំនាញដែលត្រូវការនៅក្រុមហ៊ុន ហើយពេលត្រឡប់មកវិញពង្រឹងសមត្ថភាពបន្ថែម។

យ៉ាងណាក៏ដោយ សម្រាប់នៅ CADT បើតាម ឯកឧត្តម ហ៊ាន សំបឿន សាលាបង្រៀនជំនាញបច្ចេកវិទ្យាមួយនេះ បានបន្ថែមកម្មវិធីសិក្សាមួយទៀត ហៅថា Work Best Learning ដើម្បីអភិវឌ្ឍនិស្សិតទៅជំនាញកម្រិតខ្ពស់ ដែលអ្នកបង្រៀនសុទ្ធតែមកពីក្រុមហ៊ុនដៃគូសហការ។ ឯកឧត្តមបន្តថា កម្មវិធីសិក្សា Work Best Learning នេះអនុវត្តបាន២ជំនាន់ហើយ ដោយសាលារៀបចំនិស្សិតឱ្យមានជំនាញពេញលេញនៅពេលបញ្ចប់ការសិក្សាភ្លាមៗ។

លោក ម៉ារ សុភា មន្ត្រីជាន់ខ្ពស់ វិស័យអប់រំ និងជំនាញនៃធនាគារអភិវឌ្ឍន៍អាស៊ី មានប្រសាសន៍ថា ដើម្បីឱ្យការបណ្ដុះបណ្ដាលឆ្លើយតបធនធានមនុស្សកម្ពុជា ឆ្លើយតបតម្រូវការទីផ្សារការងារ គឺចាំបាច់ត្រូវដឹងអំពីបញ្ហាដែលក្រុមហ៊ុនអាជីវកម្មកំពុងជួបប្រទះ ហើយវគ្គបណ្ដុះបណ្ដាលត្រូវតែផ្ដល់ដើម្បីរកដំណោះស្រាយ មានន័យថា ការផ្ដល់វគ្គបណ្ដុះបណ្ដាលត្រូវតែយល់អំពីសេចក្ដីត្រូវការនៃឧស្សាហកម្ម ឬជំនួញ។

ជាមួយគ្នានេះ លោក ទីន កូលហ្សា នាយកប្រតិបត្តិ និងសហស្ថាបនិកនៃ Coolbeans Digital ដែលជាក្រុមហ៊ុនធ្វើទៅលើអេបទូរស័ព្ទដៃ និងការបង្កើតវេបសាយ មានប្រសាសន៍ថា សម្រាប់ស្ថានប័នឯកជន ជំនាញទាក់ទងបច្ចេកវិទ្យាដើរតួនាទីសំខាន់ និងកំពុងមានតម្រូវការខ្ពស់។ លោកថា រយៈពេល៣ឆ្នាំចុងក្រោយ ឃើញថា ទាក់ទងនឹងជំនាញថ្មីៗ ដូចជា បញ្ញាសិប្បនិម្មិត (AI) ម៉ាស៊ីនចេះរៀន ការរចនា UX/UI ជំនាញវិភាគទិន្នន័យ សុវត្ថិភាពអ៊ីនធឺណិត ជាវិស័យដែលកំពុងត្រូវការខ្លាំង។​ ជាពិសេស សម្រាប់ស្ថាប័នឯកជន គឺពិតជាត្រូវការនិស្សិត ឬអ្នកមានបទពិសោធន៍ធ្វើការងារលើវិស័យទាំងនេះជាច្រើន។

គួរជំរាបថា ដោយសារ​កំណើន​សេដ្ឋកិច្ច​ដ៏​ឆាប់រហ័ស និង​ការ​ធ្វើ​ពិពិធកម្មសេដ្ឋកិច្ច​នៅកម្ពុជា បាននាំ​ឱ្យ​មានការ​កើន​ឡើង​នូវ​តម្រូវ​ការ​កម្លាំងពលកម្ម​ជំនាញ ខណៈប្រព័ន្ធអប់រំ និង​បណ្តុះបណ្តាលបច្ចេកទេស នៅ​ពុំទាន់អាចឆ្លើយតបនឹង​ការ​ផ្លាស់ប្តូរ​នេះ ដែលបានធ្វើ​ឱ្យ​មានគម្លាតជំនាញ។ យ៉ាងណាដើម្បីដោះស្រាយ​គម្លាតជំនាញនេះ ក្រសួងអប់រំយុវជន និង​កីឡា កន្លងមកបានបង្ហាញពីការកំណត់លក្ខណៈចំនួន៥ រួមមាន ទី១. គោលនយោបាយរបស់រដ្ឋាភិបាល និងកំណែទម្រង់សាលារៀន ចាំបាច់ដើម្បីអភិវឌ្ឍជំនាញទន់ និងជំនាញសតវត្សរ៍ទី ២១, ទី២. កម្មវិធីសិក្សាដែលអាចបត់បែនបាន ហើយភ្ជាប់ទៅនឹងអាជីព, ទី៣. សាលារៀន និងសាកលវិទ្យាល័យជាមជ្ឈមណ្ឌលមួយនៅក្នុងប្រព័ន្ធអេកូឡូស៊ីសហគ្រិនភាព៖ វេទិកាសម្រាប់ការប្រកួតប្រជែងដើម្បីភ្ជាប់ការអប់រំទៅនឹងពិភពពិត, ទី៤. ការប្រកួតប្រជែងគំរូធុរកិច្ចដោយមានការចូលរួមពីវិស័យឯកជន ពិតមានប្រយោជន៍សម្រាប់សិស្សានុសិស្សក្នុងការស្វែងយល់ពីរបៀបដោះស្រាយបញ្ហាប្រឈមនៃសតវត្សរ៍ទី២១ និង ទី៥. ការតភ្ជាប់ផ្នែកសាកលវិទ្យាល័យ ជាមួយនឹងផ្នែកធុរកិច្ច ដើម្បីលើកកម្ពស់គម្រោងរួម និងការស្រាវជ្រាវ៕