ក្រសួងអប់រំ យុវជន និងកីឡា បានកំណត់សម័យប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុបសម្រាប់ឆ្នាំសិក្សា២០២៤-២០២៥ គ្រោង​នឹង​ប្រព្រឹត្តិទៅ​នៅ​ថ្ងៃទី១៨ ខែសីហា ខាងមុខ។

បើយោង​តាម​ប្រកាស​ស្តីពីការរៀបចំ និង​ការប្រព្រឹត្ត​ទៅ​នៃការប្រឡងសញ្ញាបត្រមធ្យមសិក្សា​ទុតិយភូមិ សម្រាប់ឆ្នាំ​សិក្សា​២០២៤-២០២៥ ការប្រឡងថ្នាក់ជាតិនេះ នឹងប្រព្រឹត្តទៅរយៈពេល​២ថ្ងៃ គឺនៅថ្ងៃទី១៨ និង​ថ្ងៃទី១៩ ខែសីហា ឆ្នាំ​២០២៥ ដោយវិញ្ញាសាសម្រាប់ថ្នាក់វិទ្យាសាស្រ្ត រួមមាន ៖ ១. មុខវិជ្ជាជម្រើស, ២. ជីវវិទ្យា, ៣. គីមីវិទ្យា, ៤. ភាសាបរទេស, ៥. អក្សរសាស្រ្តខ្មែរ, ៦. រូបវិទ្យា និង៧. គណិតវិទ្យា។ ដោយ​ឡែក​មុខវិជ្ជាភាសាបរទេស ជាវិញ្ញាសាតាមស្ម័គ្រ។

សម្រាប់វិញ្ញាសាថ្នាក់វិទ្យាសាស្រ្តសង្គមវិញ រួមមាន ៖ ១. មុខវិជ្ជាជម្រើស, ២. ប្រវត្តិវិទ្យា, ៣. ភូមិវិទ្យា, ៤. ភាសាបរទេស, ៥. គណិតវិទ្យា, ៦. សីលធម៌-ពលរដ្ឋវិជ្ជា និង៧. អក្សរសាស្រ្តខ្មែរ។ ដោយឡែកមុខវិជ្ជាភាសាបរទេស ក៏​ត្រូវ​បានចាត់ទុកថា ជាវិញ្ញាសាតាមស្ម័គ្រដូចគ្នា ដោយ​ត្រូវ​យក​ផលសងនៃពិន្ទុ ដែលសិស្ស​ធ្វើបាន ដកនឹង​២៥។

សម្រាប់មុខវិជ្ជាជម្រើស​ថ្នាក់វិទ្យាសាស្រ្ត គឺត្រូវ​ជ្រើសរើស​មួយ​មុខវិជ្ជា​ក្នុង​ចំណោមមុខវិជ្ជា ដូចជា ​ភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា និង​ផែនដីនិងបរិស្ថានវិទ្យា។ ដោយឡែក មុខវិជ្ជាជម្រើសថ្នាក់វិទ្យាសាស្រ្តសង្គម ត្រូវ​ជ្រើសរើស​មួយ​មុខ​វិជ្ជាក្នុងចំណោមមុខវិជ្ជាដូចជា ​រូបវិទ្យា គីមីវិទ្យា ជីវវិទ្យា និង​ផែនដី និង​បរិស្ថានវិទ្យា។

បើយោង​តាមសេចក្ដីណែនាំស្ដីពីដំណើរការនៃការប្រឡងបាក់ឌុប វិញ្ញាសាប្រឡងទាំងអស់ត្រូវបានជ្រើសរើស តាក់តែងរៀបចំ និងគ្រប់គ្រងដោយក្រសួងអប់រំ យុវជន និងកីឡា។ សម្រាប់ វិញ្ញាសាសម្រាប់ថ្នាក់វិទ្យាសាស្រ្ត ត្រូវចែកឱ្យបេក្ខជនម្នាក់ៗ រួមមាន គណិតវិទ្យា គីមីវិទ្យា ជីវវិទ្យា រូបវិទ្យា និងភាសាបរទេស។ ដោយឡែកវិញ្ញាសាអក្សរសាស្រ្តខ្មែរ និងមុខវិជ្ជាជម្រើសប្រវត្តិវិទ្យា ជាវិញ្ញាសាដែលអនុរក្ស ត្រូវចម្លងដាក់លើក្ដារខៀន។ ចំណែក វិញ្ញាសាសម្រាប់ថ្នាក់វិទ្យាសាស្រ្តសង្គម ត្រូវចែកឱ្យបេក្ខជនម្នាក់ៗ រួមមាន គណិតវិទ្យា ភាសាបរទេស ។ ដោយឡែក វិញ្ញាសាអក្សរសាស្រ្តខ្មែរ ភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា រួមទាំង ផែនដីនិងបរិស្ថានវិទ្យា ជាវិញ្ញាសាដែលអនុរក្សត្រូវចម្លងដាក់លើក្ដារខៀន។

បេក្ខជនទាំងអស់អាចជ្រើសរើសយកមុខវិជ្ជាភាសាបរទេសមួយ ក្នុងចំណោមភាសាបារាំង ឬភាសាអង់គ្លេស។ ចំពោះ សិស្សសាលាឯកជនរៀនគ្រប់មុខវិជ្ជាជាភាសាអង់គ្លេស អនុរក្សត្រូវបកប្រែវិញ្ញាសាគ្រប់មុខវិជ្ជា ភាសាអង់គ្លេស លើកលែងតែវិញ្ញាសាអក្សរសាស្ត្រខ្មែរ ហើយត្រូវទូទាត់រយៈពេលបកប្រែវិញ្ញាសានោះ តែមិនឱ្យប៉ះពាល់ដល់ការប្រព្រឹត្តទៅនៃវិញ្ញាសាបន្ទាប់។ សិស្សសាលាឯកជនរៀនគ្រប់មុខវិជ្ជាជាភាសាអង់គ្លេស លើកលែងតែមុខវិជ្ជាអក្សរសាស្ត្រខ្មែរមិនប្រឡងវិញ្ញាសាភាសាបរទេសនោះទេ។

សម្រាប់បេក្ខជនពិការភ្នែក អនុរក្សត្រូវអានវិញ្ញាសាឱ្យបេក្ខជនស្ដាប់ ហើយត្រូវទូទាត់រយៈពេលអានវិញ្ញាសាតែមិនឱ្យប៉ះពាល់ដល់ការប្រព្រឹត្តទៅនៃវិញ្ញាសាបន្ទាប់។ គណៈមេប្រយោគទូទាំងប្រទេសប្រចាំរាជធានី ខេត្ត ត្រូវសម្រេចដកសំណួរណាដែលពាក់ព័ន្ធនឹងគំនូរ។

ជាមួយគ្នានេះ ក្រសួងអប់រំ កបាន​បញ្ជាក់ពីវិន័យក្នុងការប្រឡង ដោយក្នុងនោះចំពោះបេក្ខជនអវត្តមានចាប់ពីមួយវិញ្ញាសាឡើងទៅត្រូវកំណត់ឱ្យធ្លាក់ជាស្វ័យប្រវត្តិ និងត្រូវចុះអក្សរ “A” នៅក្នុងសន្លឹកសម្រង់ពិន្ទុ MCS។ ចំពោះបេក្ខជនដែលមិនបានប្រគល់សន្លឹកកិច្ចការនៃវិញ្ញាសាណាមួយដល់គណៈមេប្រយោគត្រូវចាត់ទុកបេក្ខជននោះអវត្តមានចំពោះវិញ្ញាសានោះ ហើយត្រូវអនុវត្តដូចករណ៍បេក្ខជនអវត្តមានដែរ៕