ជំនាញមេកាត្រូនិក ជាជំនាញដែលកំពុងមានតម្រូវការទីផ្សារនៅក្នុងវិស័យឧស្សាហកម្ម ជាពិសេសនៅក្នុងរោងចក្រ សហគ្រាស។ ជំនាញនេះ មិនសូវមានធនធានច្រើន​ទេនៅកម្ពុជា ហើយចំនួនអ្នកជំនាញជាស្ត្រីក៏កាន់តែតិច ដែលជាហេតុជំរុញឱ្យយុវតី ភន រះសា សម្រេចចិត្តចាប់ជំនាញមេកាត្រូនិក ដែលវាក៏​ជា​ក្តីស្រមៃតាំងពីតូចមក។

យុវតី ភន រះសា បច្ចុប្បន្ន​ជានិស្សិតថ្នាក់បរិញ្ញាបត្ររងឆ្នាំទី១ ជំនាញមេកាត្រូនិក នៃវិទ្យាស្ថានជាតិបណ្ដុះបណ្ដាលបច្ចេកទេស (NTTI) បានរៀបរាប់ថា ជំនាញមេកាត្រូនិក គឺជា​ជំនាញ​ដែលសិក្សាទៅលើប្រព័ន្ធប្រេង ប្រព័ន្ធខ្យល់ Program (ប្រូក្រាម) អេឡិចត្រូនិក និងមេកានិកជាដើម។ ជំនាញមួយ​នេះ មានកម្រិតសិក្សាថ្នាក់បរិញ្ញាបត្រចំនួន៤ ទៅ៥ឆ្នាំ ថ្នាក់បរិញ្ញាបត្ររង រយៈពេល២ឆ្នាំកន្លះ។ រះសា បន្ថែមថា ក្រោយរៀនចប់សិស្សអាចស្វែងរក និងបម្រើការងារនៅតាមក្រុមហ៊ុនតម្លើងរថយន្ត ឬផលិតរថយន្ត ការត្រួតពិនិត្យដំណើរការរថយន្ត និងម៉ាស៊ីនស្វ័យប្រវត្តិកម្ម អំពីតំហែទាំនិងជួសជុលឧបករណ៍វេជ្ជសាស្ត្រ ឬអាចធ្វើជាអ្នក​រចនាការផលិត ការការពារបច្ចេកវិទ្យាថាមពល ឧបរកណ៍​បច្ចេកវិទ្យា​ថាមពលនៃការកកើតឡើងវិញ ឬអាចធ្វើជាគ្រូបង្រៀនជំនាញនេះតែម្តង​ក៏បាន។

ជាជំនាញដែលមិនសូវមានសិស្សស្រីរៀន រះសា ក៏មានការស្រងាកចិត្តបន្តិចដែរ ប៉ុន្តែមិត្តរួមថ្នាក់ និងលោកគ្រូអ្នកគ្រូតែងតែលើកទឹកចិត្ត ផ្ដល់ការគោរព និងយកចិត្តទុកដាក់ទៅកាន់គ្នាទៅវិញទៅមក មិនធ្វើឱ្យ រះសា មានអារម្មណ៍ថាត្រូវបានគេរើសអើង ឬមើលស្រាលថាជាសិស្សស្រីដែលសិក្សាជំនាញបច្ចេកទេសឡើយ។

បើត្រឡប់ទៅនិយាយមុនពេលចូលរៀនជំនាញវិញ ក្នុងនាមជាកូនស្រីច្បងក្នុងគ្រួសារ ម្ដាយឪពុក និងសមាជិកក្នុងគ្រួសាររបស់ រះសា មិនលើកទឹកចិត្តឱ្យនាងរៀនជំនាញនេះឡើយ ប៉ុន្តែនាងបានពន្យល់ពីហេតុផល និងអត្ថប្រយោជន៍នៃជំនាញនេះទៅកាន់គ្រួសារ និងទទួលបានការអនុញ្ញាតពីពួកគាត់វិញ។

ក្រៅពីក្រុមគ្រួសារមិនទាន់យល់ស្របដែលជ្រើសរើសរៀនជំនាញនេះ រះសា ក៏ធ្លាប់បានលឺអ្នកជុំវិញខ្លួន​និយាយដែរថា ជំនាញនេះមិនសាកសមជាមួយនាង​ឡើយ ព្រោះខ្លួនជាស្រីហេតុអ្វីទៅរៀនជំនាញមនុស្សប្រុស ជាជំនាញដែលមានខ្សែរភ្លើងទៅវិញ។ ជុំវិញមតិទាំងនេះ មិនបានបង្អាក់ ឬធ្វើឱ្យ រះសា បោះបង់ការរៀនជំនាញមេកាត្រូនិកឡើយ ព្រោះនាងបានសិក្សាពីអត្ថប្រយោជន៍នៃជំនាញនេះ រួមជាមួយនឹងអារម្មណ៍ដែលស្រលាញ់ជំនាញនេះ។

រះសា និយាយថា ការសិក្សាជំនាញនីមួយៗសុទ្ធតែមានឧបសគ្គផ្សេងៗ ហើយក៏មានដំណោះស្រាយមកជាមួយ ដូចនេះនៅពេលសិក្សាត្រូវយកចិត្តទុកដាក់ ស្ដាប់គ្រូពន្យល់ សួរគ្រូឱ្យបានច្រើន និងព្យាយាមសិក្សាឱ្យចប់ ដើម្បីមានជំនាញមួយច្បាស់លាស់ ដែលអាចមានការងារធ្វើ មានចំណូលសម្រាប់ខ្លួនឯង និងអាចកែប្រែជីវភាពខ្លួនឯងផងដែរ។

រះសា បន្តថា ក្រោមចប់ជំនាញនេះ នាងចង់បន្តការសិក្សាឱ្យបានច្រើនជាងនេះ និងស្វែងយល់ពីជំនាញនេះឱ្យកាន់តែស៊ីជម្រៅ និងចង់ធ្វើជាគ្រូបច្ចេកទេសផ្នែកនេះដើម្បីបន្តចែកចាយទៅកាន់ធនធានមនុស្សនៅកម្ពុជា។

ចំពោះយុវជនដែលមិនទាន់មានជំនាញ និងមិនទាន់ដឹងថា ខ្លួនឯងស្រឡាញ់ជំនាញ ឬគួររៀនជំនាញអ្វី រះសា ក៏​បានលើកទឹកចិត្តដល់ពួក​គេ​ទៅស្វែងរកឱកាសសិក្សាជំនាញផ្សេងៗជាច្រើនក្រោមគម្រោង១លាន៥សែនរបស់រាជរដ្ឋាភិបាលកម្ពុជា ដើម្បីបានរៀនជំនាញមួយច្បាស់លាស់ក្នុងខ្លួន មានការងារធ្វើ និងមានចំណូលសម្រាប់ខ្លួនឯងជាប្រចាំ៕