យោងតាម Australian parenting កុមារចាប់ផ្ដើមអភិវឌ្ឍសមត្ថភាពកុហក ចាប់ពីពួកគេមានអាយុ ៣ឆ្នាំ ដែលជាពេលវេលាពួកគេដឹងថា អ្នកដទៃមិនអាចដឹងពីអ្វីដែលគេកំពុងគិត។ ដូច្នេះ ពួកគេអាចនិយាយពាក្យមិនពិត ដោយមិនឱ្យអ្នកស្ដាប់ដឹង។ នៅអាយុចន្លោះពី ៤ ទៅ ៦ឆ្នាំ កុមារមានទំនោរនិយាយកុហកកាន់តែញឹកញាប់ ហើយការនិយាយកុហករបស់គេ កាន់តែស៊ីគ្នាជាមួយនឹងទឹកមុខ និងសំឡេងរបស់គេ។ ទោះជាយ៉ាងណាក៏ដោយ នៅវ័យនេះ ប្រសិនបើអាណាព្យាបាល សួរជីកឬស ជីកគល់បន្ថែម ពួកគេនឹងនិយាយការពិត។

ជាមួយគ្នានេះ នៅពេលដែលពួកគេដឹងក្ដី ការតាមស្វែងយល់ពីការនិយាយកុហក កាន់តែមានភាពស្មុគស្មាញ ព្រោះនៅពេលដែលពួកគេធំដឹងក្ដី សមត្ថភាពប្រើប្រាស់ពាក្យពេចន៍ និងការយល់ដឹងពីរបៀបគិតរបស់អ្នកដទៃកាន់តែស៊ីជម្រៅ។ បន្ទាប់មកទៀត ក្រោយឈានចូលវ័យជំទង់ កុមារអាចនិយាយកុហកបានដោយរលូន ជាពិសេសគឺការលាក់អារម្មណ៍ និងគំនិតរបស់គេអំពីរឿងអ្វីមួយ។

បើតាម Smart Parenting មានហេតុផលចំនួន ៥ ដែលធ្វើឱ្យកុមារមានទម្លាប់កុហក។ ហេតុផលទាំងនោះមានដូចជា ៖

១. កុហក ដើម្បីការពារខ្លួន, ត្រង់ចំណុចនេះ កុមារកុហក ដើម្បីជៀសវាងការចាប់កំហុស ឬការដាក់ទណ្ឌកម្មផ្សេងៗ។

២. កុហក ដោយធ្វើជាមិនដឹងរឿង (Lie of Omission), ចំពោះហេតុផលនៃការកុហកនេះ កុមារធ្វើជាមិនដឹងរឿងដែលគេបានធ្វើ ដើម្បីគេចចេញពីការពិន័យ។

៣. ការកុហកបែបប្រឌិតរឿង (The tall tale), ការកុហកមួយបែបនេះ គឺកុមារចេះប្រឌិត និងបំផ្លើសរឿងដែលមិនពិត ជាពិសេសកុមារដែលកំពុងសិក្សានៅមត្តេយសិក្សា។

៤. ការកុហកសង្គម (The Social lie), ការកុហកនេះ គឺដើម្បីការពារ ការប៉ះពាល់ផ្លូវចិត្ត និងអារម្មណ៍របស់អ្នកដទៃ ដែលគេកំពុងជជែកជាមួយ។

៥. ការកុហក ដោយត្រាប់តាម (The Imitated lie), ការកុហកនេះ គឺកុមាររៀន ឬត្រាប់តាមមនុស្សធំ។

អ្វីដែលឪពុកម្ដាយអាចធ្វើបាន ចំពោះការនិយាយកុហករបស់កូន

ជម្រើសដ៏មានប្រសិទ្ធភាព ដើម្បីជំរុញឱ្យកូននិយាយការពិត និងមានភាពស្មោះត្រង់ គឺជៀសវៀងការស្រែកគំហក ឬការស្តីបន្ទោស នៅពេលកូននិយាយ។ ដើម្បីធ្វើឱ្យកុមារ មានផាសុកភាពក្នុងការនិយាយការពិត ឪពុកម្ដាយ ត្រូវរក្សាទំនាក់ទំនងដោយបើកចំហ មានភាពស្មោះត្រង់ចំពោះគ្នាទៅវិញទៅមក និងផ្ដល់ភាពកក់ក្ដៅឱ្យកុមារ។ អ្វីដែលឪពុកម្ដាយ ត្រូវដឹងគឺកុមារនិយាយកុហក ដោយតែពួកគេព្យាយាមគេចចេញពីការដាក់ទណ្ឌកម្ម ការស្ដីបន្ទោស និងការពិន័យ។

ដើម្បីជំរុញឱ្យកុមារមានទម្លាប់និយាយការពិត អ្នកជំនាញចិត្តសាស្ត្រ Dr. Jordana Mortimer និង Dr. Erin Avirett បានផ្ដល់អនុសាស្ត្រថា ឪពុកម្ដាយ ត្រូវឱ្យតម្លៃ និងលើកទឹកចិត្តឱ្យកុមារនិយាយការពិត, ផ្ដល់ឱកាសឱ្យកុមារទទួលបានទំនុកចិត្តពីអ្នក តាមរយៈការជឿជាក់លើពួកគេ, បង្ហាញភាពជាគម្រូ តាមរយៈការនិយាយពាក្យពិត និងស្មោះត្រង់, មិននិយាយកុហក ឬមានទម្លាប់បំភ័យកុមារ ដើម្បីឱ្យពួកគេឈប់ធ្វើរឿងអ្វីមួយ, ជៀសវៀង ការដាក់សម្ពាធឱ្យកុមារ ដែលធ្វើឱ្យពួកគេចង់និយាយកុហក និងពន្យល់ពួកគេពីរបៀបនិយាយពាក្យពិត ដែលមិនប៉ះពាល់អារម្មណ៍អ្នកដទៃ៕