ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រសួងអប់រំ យុវជន និងកីឡា នឹងរៀបចំការប្រឡងជ្រើសរើសមន្ត្រីរដ្ឋបាលទូទៅចំនួន ១០០កន្លែងសម្រាប់ឆ្នាំ២០២៣ ។ ការសម្រេចនេះ ធ្វើឡើងក្នុងកិច្ចប្រជុំគណៈកម្មការគ្រប់គ្រងទូទៅនៃការប្រឡងជ្រើសរើសមន្ត្រីរដ្ឋបាលទូទៅក្នុងក្របខណ្ឌ ឆ្នាំ២០២៣ ក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដោយមានកិច្ចសហការចូលរួមគាំទ្រដោយក្រសួងមុខងារសារធារណៈ និងសាលាភូមិ្ទរដ្ឋបាល កាលពីថ្ងៃទី១៩ ខែមេសា ឆ្នាំ២០២៣។
បើតាមក្រសួងអប់រំ យុវជន និងកីឡា បានបញ្ជាក់ថា ក្នុងឆ្នាំ២០២៣នេះ ក្រសួងអប់រំ យុវជន និងកីឡា នឹងរៀបចំការប្រឡងជ្រើសរើសមន្ត្រីរដ្ឋបាលទូទៅចំនួន ១០០កន្លែង(ក្របខណ្ឌប្រភេទ ក) ដើម្បីចូលបម្រើការងារផ្នែករដ្ឋបាលនៅតាមអង្គភាពរដ្ឋបាល គ្រឹះស្ថានឧត្តមសិក្សា និងគ្រឹះស្ថានបណ្តុះបណ្តាល ក្រោមឱវាទទីស្ដីការក្រសួងអប់រំ យុវជន និងកីឡា។
ដើម្បីឱ្យដំណើរការប្រឡងប្រព្រឹត្តទៅដោយរលូន ស្របតាមវិធាននៃការប្រឡងជ្រើសរើសមន្ត្រីរដ្ឋបាលទូទៅ (ពុំមែនជា ក្របខណ្ឌគ្រូបង្រៀន) ធានាបាននូវយុត្តិធម៌ តម្លាភាព គោលការណ៍ច្បាប់ និងការជ្រើសរើសបានត្រឹមត្រឹម ក្រសួងអប់រំ យុវជន និងកីឡា បានស្នើសុំកិច្ចសហការជាមួយសាលាភូមិន្ទរដ្ឋបាល និងបានស្នើសុំការគាំទ្រពីក្រសួងមុខងារសាធារណៈ។
ជាលទ្ធផល ក្រសួងមុខងារសាធារណៈ និងសាលាភូមិន្ទរដ្ឋបាលបានឆ្លើយតប និងគាំទ្រការរៀបចំប្រឡងជ្រើសរើសមន្ត្រីរដ្ឋបាលទូទៅ តាមសំណើរបស់ក្រសួងអប់រំ យុវជន និងកីឡា។ ឈរលើមូលដ្ឋាននេះ ក្រុមការងារក្រសួងអប់រំ យុវជន និងកីឡា តំណាងដោយ ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការ និងសាលាភូមិន្ទរដ្ឋបាលដឹកនាំដោយ ឯកឧត្តម យក់ ប៊ុនណា រដ្ឋលេខាធិការប្រចាំការ នៃក្រសួងមុខងារសាធារណៈ និងជានាយកសាលាភូមិន្ទរដ្ឋបាលបានជួបប្រជុំពិភាក្សាលើដំណើរការ នៃការរៀបចំប្រឡងនេះជាបន្តបន្ទាប់ ព្រមទាំងបានបង្កើតក្រុមការងារបច្ចេកទេសដើម្បីបន្តរៀបចំគោលការណ៍នានាពាក់ព័ន្ធដំណើរការប្រឡងនេះផងដែរ៕
