ចំណែកដែលធ្វើឱ្យភ្ញៀវទេសចរមានអារម្មណ៍ល្អក្នុងពេលដំណើរកំសាន្ត ជាចំណែកមួយរបស់អ្នកផ្ដល់សេវាកម្មនៅក្នុងកន្លែងស្នាក់ ឬសណ្ឋាគារ ដូច្នេះអ្នកផ្តល់សេវាកម្ម​ដែលមានជំនាញច្បាស់លាស់ពិតជា​សំខាន់​ក្នុង​លើកស្ទួយ​វិស័យ​ទេសចរណ៍​នៅ​កម្ពុជា។

យុវវតី ស៊ា សារាន់ ជាសិស្សសិក្សាជំនាញ​ សេវាកម្ម និង ផ្នែក F&B នៅសមាគមក្លឹបទេសចរណ៍សៀមរាប (STC) ខេត្តសៀមរាប និយាយថា ជំនាញសេវាកម្ម និង ផ្នែក F&B(Food and Bevevrege) ជាការសិក្សាពីការប្រាស្រ័យទាក់ទងនៅក្នុងបដិសណ្ឋារកិច្ចក្នុងផ្នែកជាច្រើនរួមមាន ការសិក្សាពីសេវាកម្មប្រណិត ចំណេះដឹងលើបញ្ជីមុខម្ហូប ជំនាញផ្នែកលក់ ការផ្ដល់សេវាកម្ម និតីវិធី និងលំដាប់លំដោយក្នុងភោជនីយដ្ឋាន អំពីអនាម័យ សន្តិសុខ និងសុវត្ថិភាពភោជនីយដ្ឋាន និងការប្រើប្រាស់សេវាកម្មនៅក្នុងភោជនីដ្ឋាន។ សារាន់ បន្តថា ការសិក្សា​ជំនាញសេវាកម្ម និងផ្នែក F&B នេះ គឺមិន​មានរយៈពេល​យូរប៉ុន្មានទេ បើសិក្សានៅសមាគមក្លឹបទេសចរណ៍សៀមរាប (STC) គឺមានរយៈពេលតែ៨ខែ ដោយការសិក្សាថ្នាក់ទ្រឹស្ដីរយៈពេល​៤ខែ និងចុះកម្មសិក្សារយៈពេល៤ខែ។

និយាយពីការជ្រើសរើស​រៀនជំនាញសេវាកម្ម និងផ្នែក F&B យុវវតី សារាន់ លើកឡើងថា ការដែលខ្លួនជ្រើសរើសរៀនជំនាញនេះ ព្រោះយល់ឃើញថា នេះជាជំនាញដែលអាចទាក់ទាញភ្ញៀវទេសចរតាមរយៈការបម្រើសេវាកម្មដល់ភ្ញៀវជាតិ និងអន្តរជាតិត្រឡប់មកកាន់កន្លែងស្នាក់ម្ដងទៀតតាមរយៈការរៀបចំអត្តចរិត ការប្រើប្រាស់ភាសា ការសម្របខ្លួនទៅតាមបរិបទ ការរៀបចំ និងការប្រើប្រាស់ពាក្យសម្ដីរបស់អ្នកផ្ដល់សេវាកម្មទៅកាន់ភ្ញៀវទេសចរ។ លើសពីនេះ ការបម្រើសេវាកម្មល្អដល់អតិថិជន ក៏អាចជាផ្នែកសំខាន់មួយដែលធ្វើឱ្យអតិថិជនមានអារម្មណ៍ល្អ និងសប្បាយចិត្តក្នុងកំឡុងពេលដំណើរកំសាន្ត និងជាហេតុផលដែលធ្វើឱ្យអតិថិជនមានអនុស្សាវរីយ៍ល្អផងដែរ។

បើតាម យុវវតី ស៊ា សារាន់ ក្រោយរៀនជំនាញនេះចប់ សិស្សអាចស្វែងរការងារធ្វើទៅតាមជំនាញជាច្រើនរួមមាន អ្នកគិតលុយ អ្នកបកប្រែ អ្នករៀបចំបន្ទប់ស្នាក់ ការងារក្នុងផ្នែកការិយាល័យជួរមុខ អ្នកគ្រប់គ្រង អ្នកធ្វើអាជីវកម្ម និងការងារផ្សេងៗជាច្រើនទៀត។

សិស្សរៀនជំនាញ គេហកិច្ច រូបនេះបន្តថា សម្រាប់អ្នកដែលចង់រៀនជំនាញសេវាកម្ម និងផ្នែក F&B នេះ បេក្ខជនត្រូវមានអាយុ១៨ឆ្នាំ ដល់២៥ឆ្នាំ ចេះភាសាអង់គ្លេស មានចំណាប់អារម្មណ៍ និងចូលចិត្តលើផ្នែកទេសចរណ៍ មានឆន្ទៈ និងមានការចង់ចេះដឹងអំពីជំនាញនេះ។ ជាមួយគ្នា បេក្ខជនមិនជាប់ការប្រឡងមធ្យមសិក្សាទុតិយភូមិ (ធ្លាក់ថ្នាក់ទី១២) ក៏មានឱកាសសិក្សាជំនាញនេះបានដែរ។

សម្រាប់អ្នកដែលមានចំណាប់អារម្មណ៍ក្នុងការសិក្សាជំនាញនេះ គឺអាចទំនាក់ទំនងទៅកាន់សាលាបណ្តុះបណ្តាលជំនាញបច្ចេកទេស និង​វិជ្ជាជីវៈ​ទូទាំង​ប្រទេស។

បច្ចុប្បន្ន កញ្ញា ស៊ា សារាន់ កំពុងចុះកម្មសិក្សានៅសណ្ធាគារ Sea Breeze បងនិងទទួលបានបទពិសោធន៍ជាច្រើនពីការចុះកម្មសិក្សា ដូចជាការអនុវត្តផ្ទាល់ស្របទៅតាមស្តង់ការ នៃសណ្ឋាគារ (តាមកម្រិតផ្កាយនៃសណ្ឋាគារ)​ ការប្រាស្រ័យទាក់ទងជាមួយភ្ញៀវ និងមិត្តរួមការងារ ការដោះស្រាយបញ្ហា និងការត្រៀមខ្លួនទប់ទល់នឹងបញ្ហាណាមួយដែលកើតឡើងជាយថាហេតុ។

ជារួម កញ្ញា ស៊ា សារាន់ លើកទឹកចិត្តដល់អ្នកដែលស្រលាញ់ និងមានចំណាប់អារម្មណ៍ក្នុងការសិក្សាជំនាញផ្សេងៗក្នុងវិស័យទេសចរណ៍ សូមខិតខំស្វែងរកសាលាដែលបង្រៀនជំនាញនេះឱ្យបានច្បាស់លាស់ និងយកចិត្តទុកដាក់ក្នុងការរៀន និងចុះកម្មសិក្សា ដើម្បីអាចយកចំណេះដឹងទាំងនោះធ្វើជាជំនាញមួយច្បាស់លាស់នៅក្នុងខ្លួន៕