ទម្លាប់ក្នុងការរៀនសូត្ររបស់បុគ្គលម្នាក់ៗមានភាពខុសៗគ្នា និងលក្ខណៈពិសេសផ្សេងៗគ្នា ចំណែកលោក តាន់ ស៊ីវុត្ថា ក៏មានទម្លាប់ក្នុងការសិក្សាផ្ទាល់ខ្លួន និងអាស្រ័យលើកម្មវិធីសិក្សាផងដែរ។ ខាងក្រោមជាការចែករំលែករបស់លោក តាន់ ស៊ីវុត្ថា ក្នុងការបែងចែកពេលវេលា និងការរៀបចំផែនការសិក្សាដើម្បីទទួលបានលទ្ធផលសិក្សា GPA ៤.០ ទាំងបីឆមាសក្នុងការសិក្សាថ្នាក់បរិញ្ញាបត្រជាន់ខ្ពស់នៅសហរដ្ឋអាមេរិក។

លោក តាន់ ស៊ីវុត្តា បាន​ចែករំលែកមកកាន់ AMS Education ថា ក្នុងវគ្គសិក្សាបីឆមាសនៃថ្នាក់បរិញ្ញាបត្រជាន់ខ្ពស់នៅសហរដ្ឋអាមេរិក លោកទទួលបានលទ្ធផលសិក្សា A គ្រប់មុខ ទាំងបីឆមាស ព្រោះលោកមានការបែកចែកពេលវេលាសម្រាប់សិក្សា ស្រាវជ្រាវ និងឱកាសការងារសង្គមផ្សេងៗក្នុងអំឡុងពេលសិក្សា។ 

លោក តាន់ ស៊ីវុត្ថា បន្តថា មូលហេតុដែលអាចធ្វើឱ្យលោកទទួលបានលទ្ធផលល្អក្នុងការសិក្សា ថែមទាំងអាចមានពេលវេលាចូលរួមការងារស្ម័គ្រចិត្ត ការងារសង្គមដែលធ្វើឡើងដោយស្ថានទូត សមាគមន៍ខ្មែរនៅអាមេរិក គឺដោយសារលោកបានរៀបចំកាលវិភាគរៀនបានត្រឹមត្រូវ។ ជាក់ស្ដែង ការសិក្សាថ្នាក់បរិញ្ញាបត្រជាន់ខ្ពស់នេះ និស្សិតអាចជ្រើសរើសថ្ងៃរៀនដោយខ្លួនឯងនៅដើមឆមាស ហើយលោកបានជ្រើសរើសថ្ងៃរៀនមិនមែនជាថ្ងៃចុងសប្ដាហ៍ ដោយជ្រើសយកតែថ្ងៃ អង្គារ ពុធ ព្រហស្បតិ៍ និងថ្ងៃសុក្រដើម្បីរៀន ដូចនេះសម្រាប់ថ្ងៃ សៅរ៍ អាទិត្យ និងថ្ងៃច័ន្ទ លោកមានពេលគ្រប់គ្រាន់សម្រាប់ការរំលឹកមេរៀន ការស្រាវជ្រាវមេរៀន ធ្វើកិច្ចការដែលសាស្ត្រាចារ្យបានដាក់ឱ្យ និងចូលរួមក្នុងការងារស្ម័គ្រចិត្តផ្សេងៗដោយមិនប៉ះពាល់ម៉ោងសិក្សា។

លោក ស៊ីវុត្ថា បន្ថែមថា ក្នុងនាមជាបេក្ខជនកំពុងសិក្សាថ្នាក់បរិញ្ញាបត្រជាន់ខ្ពស់ត្រូវដឹងថា ការសិក្សាគឺផ្ដោតសំខាន់លើខ្លួនឯង មានន័យថាការសិក្សានៅក្នុងថ្នាក់គឺទាមទារឱ្យសិស្សស្វ័យសិក្សាច្រើន ជាក់ស្ដែងលោក ស៊ីវុត្ថា ផ្ទាល់កំពុងសិក្សាថ្នាក់បរិញ្ញាបត្រជាន់ខ្ពស់ផ្នែកអប់រំ ហើយការសិក្សានឹងតម្រូវឱ្យសិស្សមានការសួរសំណួរទៅកាន់សាស្ត្រាចារ្យច្រើនជាងទទួលបានមេរៀនពីពួកគាត់ ដូចនេះតម្រូវឱ្យបេក្ខជនត្រូវអានសៀវភៅ ឬមេរៀនឱ្យបានច្រើនមុនចូលក្នុងថ្នាក់រៀនដើម្បីត្រៀមសួរនូវអ្វីដែលចង់ដឹងថ្មីៗ។ លក្ខខណ្ឌនេះ បានផ្ដល់ភាពងាយស្រួលដល់លោក ព្រោះលោក ស៊ីវុត្ថា ជាមនុស្សដែលចូលចិត្តអានសៀវភៅ ការស្រាវជ្រាវមុនសម្រាប់សិក្សា ដូចនេះការអានច្រើននូវអ្វីដែលពាក់ព័ន្ធនឹងការសិក្សា និងកិច្ចការដែលលោកកំពុងធ្វើ។ ជាមួយគ្នានេះ សិស្សមិនត្រូវមានទម្លាប់ក្នុងការពន្យារពេលធ្វើកិច្ចការដែលបានមកពីសាលាឡើយ​ ព្រោះរយៈពេលនៃការដាក់កិច្ចការរបស់លោកគ្រូ អ្នកគ្រូគឺមានរយៈពេលគ្រប់គ្រាន់ និងសមស្របទៅនឹងកិច្ចការចាប់ពីថ្ងៃដាក់ឱ្យធ្វើរហូតដល់ប្រមូលមកវិញ។ សម្រាប់លោក ស៊ីវុត្ថា​ ផ្ទាល់លោកតែងតែធ្វើកិច្ចការដែលគ្រូដាក់ឱ្យភ្លាមៗ ព្រោះវាអាចសល់ពេលច្រើនសម្រាប់ការស្រាវជ្រាវបន្ថែម និងមិនធ្វើឱ្យខើចពេលវេលា។

លោក តាន់ ស៊ីវុត្ថា បន្តថា លើសពីនេះ បេក្ខជនក៏ត្រូវមានទំនាក់ទំនងល្អជាមួយមិត្តរួមថ្នាក់ និងសាស្ត្រាចារ្យ ព្រោះមិត្តរួមថ្នាក់ប្រៀបដូចជាគ្រួសារតែមួយរបស់អ្នកផងដែរ នៅពេលអ្នកមិនយល់កិច្ចការ ឬមេរៀនណាមួយមានតែមិត្តរួមថ្នាក់ដែលអាចជជែកពីមេរៀនទាំងនោះបានគ្រប់ពេល។ សាស្ត្រាចារ្យផងដែរ និស្សិតត្រូវមានទំនាក់ទំនងល្អជាមួយពួកគាត់ ព្រោះនិស្សិតអាចធ្វើការណាត់សាស្ត្រាចារ្យបាននៅក្នុងម៉ោងធ្វើការពួកគាត់ដើម្បីសួរបន្ថែមពីកិច្ចការសាលារបស់សិស្ស។

ជារួមមកវិញ កត្តាចម្បងធំបំផុតដែលជំរុញចិត្តដល់លោក តាន់ ស៊ីវុត្ថា ឱ្យខិតខំប្រឹងប្រែងរៀនសូត្ររហូតទទួលបានលទ្ធផលបែបនេះ ព្រោះលោកយល់ឃើញថា នៅពេលដែលលោកជានិស្សិតបរទេសដែលមកពីកម្ពុជាទៅសិក្សានៅសហរដ្ឋអាមេរិក​ គឺលោកប្រៀបដូចជាមនុស្សម្នាក់ដែលតំណាងប្រទេសជាតិទៅសិក្សា ដូចនេះនៅក្នុងប្រព័ន្ធសិក្សាក្នុងសាលាបើយើងរៀនពូកែ នឹងបានឱ្យគេដឹងថា ធនធានមកពីកម្ពុជាជាមនុស្សពូកែៗផងដែរ។ ហើយកត្តាទាំងអស់នេះ ជាអ្វីដែលតែងតែលើកទឹកចិត្ត និងជំរុញលោក តាន់ ស៊ីវុត្ថា កន្លងមក និងព្យាយាមសិក្សាយកលទ្ធផលនេះនៅក្នុងឆមាសចុងក្រោយដែលនឹងចូលសិក្សានៅខែកុម្ភៈខាងមុខ៕