លើកឡើងក្នុងពិធី​បើក​បវេសនកាល​ និង​តម្រង់ទិស​សិស្ស​និស្សិត​ឆ្នាំ​សិក្សា​២០២៤-២០២៥ កាលពីពេលថ្មីៗនេះ លោក ជិន តារ៉ា នាយកវិទ្យាស្ថាន​បច្ចេកទេស​ឧស្សាហកម្ម (ITI) បានឱ្យដឹងថា នៅ​ក្នុង​ឆ្នាំសិក្សា​ថ្មីនេះ ជាការកត់សម្គាល់​យុវជន យុវនារី កាន់តែច្រើន​បាន​ងាក​មក​ចាប់អារម្មណ៍​ក្នុងការ​សិក្សា​ជំនាញ​វិជ្ជាជីវៈ និង​បច្ចេកទេស (TVET) ពោល​គឺ​កំណើន​សិស្ស​ដែលចុះឈ្មោះ​ចូលរៀន​មានការ​កើនឡើងបើធៀបនឹងឆ្នាំមុនៗ។

បើតាមប្រសាសន៍របស់លោក ជិន តារ៉ា ឆ្នាំនេះ វិទ្យាស្ថាន​បច្ចេកទេសឧស្សាហកម្ម ITI ទទួលបានការ​ចុះ​ឈ្មោះចូ​ល​រៀន​ជំនាញ​បច្ចេក​ទេស និងវិជ្ជាជីវៈកម្រិតខ្ពស់សរុបចំនួនជិត ១ពាន់នាក់ ទៅលើមុខជំនាញផ្សេងៗដូចជា វិស្វកម្ម, មេកានិករថយន្ត, បរិក្ខាត្រជាក់អគ្គិសនី, មេកានិកឧស្សាហកម្ម, ព័ត៌មានវិទ្យា និង​បន្ស៊ីលោហៈ។

ខណៈ​ចំនួនសិស្សចូលរៀន​ជំនាញ TVET កាន់តែច្រើននេះ លោក ជិន តារ៉ា បញ្ជាក់ថា វិទ្យាស្ថានបច្ចេកទេសឧស្សាហកម្ម (ITI) នឹងពង្រឹងបន្ថែមនូវការបង្ហាត់បង្រៀនជំនាញវិជ្ជាជីវៈដល់សិស្សានុសិស្ស ឱ្យទទួលបានការអប់រំដែលមានស្តង់ដារ និងឱ្យក្លាយជាធនធានដែលមានជំនាញមួយច្បាស់លាស់ អាចរកការងារធ្វើ និងជាការងារដែលមានតម្រូវការទីផ្សារបច្ចុប្បន្ន និងពេលអនាគត។ តាមរយៈការពង្រឹងនេះ ITI មានម៉ោងសិក្សាទាំងទ្រឹស្ដី ថ្នាក់អនុវត្តន៍ និងម៉ោងហាត់ការងារនៅតាមក្រុមហ៊ុនតូចធំដែលជាដៃគូរសហការ និងផ្ដល់ឱកាសការងារដល់សិស្សនិស្សិតចូលធ្វើការក្រោយបញ្ចប់ថ្នាក់សិក្សាផងដែរ។

មានប្រសាសន៍​ក្នុង​ឱកាស​នោះ លោក សាយ រតនៈ ប្រធាននាយករដ្ឋានបណ្តុះបណ្តាលធនធានមនុស្សក្រុមហ៊ុន អ.អិម.អេ ខេមបូឌា មានប្រសាសន៍ថា បច្ចុប្បន្ន​នៅ​ក្នុង​ទីផ្សារការងារ គឺ​កំពុងត្រូវការអ្នកជំនាញ ដូចនេះការជ្រើសយកជំនាញវិជ្ជាជីវៈទាំងនេះ សិស្សានុសិស្សកំពុងសម្រេចចិត្តបានត្រឹមត្រូវសម្រាប់អនាគត ខណៈ​ដែល​ក្រុមហ៊ុន អ.អិម​.អេ នឹងបន្តផ្ដល់ឱកាសហាត់ការងារសម្រាប់សិស្សដែលរៀនជំនាញវិជ្ជាជីវៈនៅ ITI ឱ្យចូលហាត់ការងារ និងអាចឈានដល់ឱកាសការងារផងដែរ។ ជាមួយ​គ្នា​នេះ លោក​ក៏​បានលើកទឹកចិត្តដល់សិស្ស​និស្សិត​ទាំងអស់ខិតខំ​ប្រឹងប្រែង​សិក្សា​រៀនសូត្រ ដែលវា​នឹង​ជួយឱ្យសិស្ស-និស្សិតមានសមត្ថភាព មានជំនាញពិតប្រាកដ អាចស្វែងរកការងារមួយពិតប្រាកដ និងមានទីផ្សារការងារព្រោះប្រទេសកំពុងអភិវឌ្ឍន៍ ដែល​នឹង​ត្រូវ​ការអ្នកជំនាញកាន់តែច្រើន និងចាំបាច់។

ដូចគ្នានេះដែរ លោកស្រី សើ ស៊ីយ៉ា ប្រធាននាយកដ្ឋានធនធានមនុស្ស នៃក្រុមហ៊ុន ជីហ្គៀ គ្រុប លើកឡើងថា បច្ចុប្បន្ននេះ ទីផ្សារការងារនៅក្នុងវិស័យ​ឧស្សាហកម្ម​គឺកំពុង​មានតម្រូវការ​អ្នកជំនាញ ហើយអ្នក​​ជំនាញ​ដែល​កំពុង​មានតម្រូវការ​ជាក់ស្តែង​នៅ​កម្ពុជា គឺដូចជាអ្នកជំនាញបរិក្ខាត្រជាក់ អ្នកជំនាញផ្នែកវិស្វកម្មរថយន្ត ផ្នែកយានយន្តជាដើម ដូច្នេះក្នុងនាមជាអ្នកសិក្សាជំនាញ ចាំបាច់​ត្រូវមានទាំងជំនាញទន់ ជំនាញរឹងនៅក្នុងខ្លួន ជាពិសេសជំនាញបច្ចេកទេសឯកទេស ដែលជាតម្រូវការចាំបាច់សម្រាប់បម្រើសេវាកម្ម តម្លើង ជួសជុល និងពិនិត្យជាដើម។

ទន្ទឹមនេះ លោក ជិន តារ៉ា ក៏បានធ្វើ​ការ​អំពាវនាវដល់យុវជន ក៏ដូច​ជាអ្នក​​អាណាព្យាបាល​ទាំងអស់​សូម​លើក​ទឹក​ចិត្ត និងជំរុញកូនឱ្យ​ងាកមករៀនជំនាញវិជ្ជាជីវៈ ដើម្បីមានសមត្ថភាព​ចូល​ទៅ​ក្នុង​ទីផ្សារ​ការងារ​ដែល​កំពុងមានតម្រូវការខ្ពស់ទាំងពេលបច្ចុប្បន្ន និងទៅអនាគត ខណៈ​រាជរដ្ឋាភិបាលកម្ពុជាកំពុង​ទាក់ទាញក្រុមហ៊ុនធំៗ និង​ល្បីឈ្មោះជាច្រើនឱ្យ​មកបណ្តាក់ទុន ព្រមទាំង​បង្កើត​ការងារ​រាប់​សិប​កន្លែង​ជូន​ដល់​ប្រជា​ពលរដ្ឋ​៕