ក្រុមហ៊ុន HONDA CARS HAKATA CO., LTD កាលពីថ្ងៃទី២៤ ធ្នូ បាន​ចុះអនុស្សរណៈ នៃការ​យោគយល់គ្នា​ជាមួយ​ក្រសួងការងារ និង​បណ្តុះបណ្តាល​វិជ្ជាជីវៈ កម្ពុជា សម្រាប់ “គម្រោង​បណ្តុះបណ្តាល​អ្នកជំនាញ​តោន និង​បាញ់ថ្នាំរថយន្ត” ដែលនឹងជួយ​ដល់យុវជន​កម្ពុជា​ឱ្យ​ទទួលបាន​នូវជំនាញតាមលក្ខណៈស្តង់ដាអន្តរជាតិ។

បើតាម​ក្រសួងការងារ និង​បណ្តុះបណ្តាលវិជ្ជាជីវៈ អនុស្សរណៈនៃការយោគយល់គ្នានេះ មានសុពលភាព​​សម្រាប់​រយៈពេល​៤ឆ្នាំ ដោយ​មានគោលបំណង​បង្កើត​នូវ​ក្របខណ្ឌ​នៃកិច្ច​សហប្រតិបត្តិការ រវាង​ភាគី​ទាំងពីរ​លើ​ការ​បណ្តុះបណ្តាលជំនាញ​តោន និងបាញ់ថ្នាំ​ស្រប​តាម​ស្តង់ដា​របស់ក្រុមហ៊ុន HONDA CARS HAKATA CO., LTD នៃប្រទេស​ជប៉ុន ដើម្បីធានាបាននូវគុណភាព និងប្រសិទ្ធភាពនៃការបណ្ដុះបណ្តាលជំនាញឯកទេសជូនដល់សិស្ស និស្សិតរបស់វិទ្យាស្ថានបច្ចេកទេសឧស្សាហកម្ម (ITI)។

ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា ការ​ចុះអនុស្សរណៈនេះ នឹងផ្តល់​អត្ថប្រយោជន៍​សំខាន់ៗ​ដល់ស្ថាប័ន​ទាំងពីរ ពោលគឺសម្រាប់យុវជន យុវនារី​កម្ពុជា នឹង​ទទួល​បាន​ជំនាញ និង​ឱកាស​បំពេញ​ការងារ​ក្នុងជំនាញ​តោន និង​បាញ់ថ្នាំ ជាពិសេសជាង​នេះទៀត គឺទទួល​បានឱកាស​ក្នុងការ​ស្វែង​យល់ និង​ទទួលបាន​ការ​បំផុស​គំនិត នៃការ​រៀបចំ​អត្តចរិត និង​ការ​ធ្វើ​ការងារបែប “ភាពល្អឥតខ្ចោះ” របស់ជប៉ុន។ រីឯក្រុមហ៊ុនវិញ ក៏​នឹងទទួល​បាននូវ​កម្លាំង​ពលកម្មវ័យ​ក្មេង​ដែលមានសក្តានុពល​ខ្ពស់ មានជំនាញ​ពិតប្រាកដ និង​សមត្ថភាពពេញលេញ ដើម្បី​បំពេញ​ការងារ​នៅ​ក្នុង​ក្រុមហ៊ុន នៅ​ឯប្រទេស​ជប៉ុនផងដែរ។

លោក ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) មានប្រសាសន៍ថា តាមរយៈ​អនុស្សរណៈនេះ នៅ​ដើមឆ្នាំ២០២៥ ក្រុមហ៊ុន HONDA CARS HAKATA នឹង​ធ្វើការ​បំពាក់​ឧបករណ៍​សម្ភារៈស្តង់ដាជប៉ុន ដើម្បីធ្វើការ​បណ្តុះបណ្តាលជំនាញតោន បាញ់ថ្នាំនេះ​ដល់យុវជន និង​និស្សិត។ ហើយ​​នៅ​ចន្លោះពេលនោះ ក្រុមហ៊ុន​នឹង​រៀបចំ​កម្មវិធីបញ្ជូន​គ្រូបង្គោលរបស់វិទ្យាស្ថាន​ទៅ​ធ្វើការ​បណ្តុះបណ្តាល​លើជំនាញតោន បាញ់ថ្នាំ​នៅ​ប្រទេស​ជប៉ុន​ក្នុងមួយឆ្នាំ៤នាក់ ដើម្បីធានា​បាន​នូវការ​បណ្តុះបណ្តាល​បន្ត និង​ផ្ទេរ​ចំណេះដឹងទៅ​ដល់សិស្ស និស្សិត ក៏​ដូចជា​ផ្តល់​ឱកាស​ការងារ​ដល់និស្សិត​ដែល​រៀនជំនាញតោន បាញ់ថ្នាំនេះមាន​សមត្ថភាព និង​ឱកាស​ទៅធ្វើការ​ងារនៅ​ប្រទេស​ជប៉ុន​។

បើតាមលោក ជិន តារ៉ា ជំនាញតោន បាញ់ថ្នាំរថយន្តនេះ កន្លងមក​គឺមានដាក់បញ្ចូល​នៅក្នុងកម្មវិធីសិក្សា​កម្រិតបច្ចេកទេស ឬក៏​បរិញ្ញាបត្ររង ប៉ុន្តែ​មិន​មានការ​រៀន​ឱ្យ​ស៊ីជម្រៅនោះឡើយ ព្រោះតែវិទ្យាស្ថានពុំ​មានសម្ភារៈពេញលេញ ។ យ៉ាងណាតាមរយៈអនុស្សរណៈជាមួយ​ក្រុមហ៊ុន HONDA CARS HAKATA នេះ វិទ្យាស្ថាន​ ITI នឹងចាប់ផ្តើមដាក់មុខវិជ្ជាតោន ​បាញ់ថ្នាំរថយន្ត ជាមុខវិជ្ជាជាក់លាក់មួយ ហើយ​នឹង​ត្រៀម​ធ្វើការ​បណ្តុះបណ្តាល​កម្រិតជំនាញបច្ចេកទេស ១ (C1) ដល់​យុវជន​សម្រាប់​គម្រោង ១លាន៥សែននាក់ យ៉ាងយូរបំផុត​នៅ​ចុងឆ្នាំ​២០២៥។ បន្ទាប់​មក​ទៀត​វិទ្យាស្ថាន​ក៏​នឹង​ដាក់ឱ្យ​អនុវត្តកម្មវិធីសិក្សា​នេះ​រហូត​ដល់កម្រិតសញ្ញាបត្រជាន់ខ្ពស់បច្ចេកទេស និងឯកទេសតោន បាញ់ថ្នាំតែម្តង។

“គោល​ដៅរបស់យើងគឺបណ្តុះបណ្តាលសម្រាប់សិស្ស C1 ១លាន៥សែននាក់ ដែល​ជាកម្មវិធីនយោបាយរបស់រាជរដ្ឋាភិបាលអាណត្តិទី៧ បន្ទាប់មកទៀត​យើងនឹងអនុវត្ត​កម្មវិធីសិក្សា​នេះរហូតដល់ទៅកម្រិតសញ្ញាបត្រជាន់ខ្ពស់បច្ចេកទេស…”

គួរ​ជម្រាបជូនថា ដោយសារ​តែការ​រីកចម្រើន​នៃឧស្សាហកម្មយានយន្ត ក៏​ដូចជា​ការ​កើន​ឡើង​នៃការ​ប្រើប្រាស់រថយន្តនៅ​កម្ពុជា ធ្វើ​ឱ្យ​តម្រូវការនៃអ្នកជំនាញ​តោន បាញ់ថ្នាំរថយន្ត ក៏​កើនឡើងផងដែរ។ មិនមានទិន្នន័យ​នៃតម្រូវការ​អ្នកជំនាញ​តោន និង​បាញ់ថ្នាំរថយន្តជាក់លាក់នោះទេ ប៉ុន្តែបើតាម​របាយការណ៍របស់​ក្រុមប្រឹក្សា​អភិវឌ្ឍកម្ពុជា (CDC) ​កម្ពុជា​កំពុងត្រៀម​ខ្លួន​ក្លាយជាមជ្ឈមណ្ឌល​ប្រមូលផ្តុំ​សកម្មភាព​ផលិតគ្រឿងបង្គុំ និង​តម្លើង​យានយន្ត ដោយ​បច្ចុប្បន្ន​​មានក្រុមហ៊ុនតម្លើងរថយន្ត និង​យានយន្ត​ប្រមាណ ៨ កំពុង​ប្រតិបត្តិការ​ និង​​​ត្រៀម​ប្រតិបត្តិការ ដែល​នឹងធ្វើ​ឱ្យ​តម្រូវការ​អ្នក​បច្ចេកទេស ក៏​ដូចជា​អ្នកជំនាញ​តោន និង​បាញ់ថ្នាំ​យានយន្ត​ មានចំនួនកាន់តែច្រើន។ តាមគេហទំព័រជ្រើសរើស​បុគ្គលិក អ្នកដែលមានជំនាញតោន និង​បាញ់ថ្នាំរថយន្ត ពួកគេ​អាច​ទទួលបានប្រាក់ខែប្រមាណពី ៣៥០ដុល្លារ ទៅ​៥០០ដុល្លារ ឬច្រើនជាងនេះទៅតាមសមត្ថភាព និង​បទពិសោធន៍៕