អង្គការ​ដើម្បីភាពញញឹម នៃកុមារ (PSE) ដែល​គេ​ដឹងថា ជាអង្គការ​មិនរកប្រាក់ចំណេញ និងតែងជួយ​ដល់​កុមារ​ក្រីក្រ និង​ងាយរងគ្រោះឱ្យ​ពួកគេ​មានឱកាស​ចូលរួម​ក្នុងសង្គម​ដូចជាកុមារដទៃ កាលពីថ្ងៃទី១១ ខែធ្នូ ឆ្នាំ២០២៤ បានរៀបចំធ្វើកម្មវិធីបុណ្យផ្កាអប់រំ ដើម្បីជួយ​ជ្រោមជ្រែង​ដល់​ការអប់រំ​របស់កុមារ​ក្រីក្រ ឱ្យ​ពួកគេទទួលបានសេវាសុខភាព អាហារ ការការពារ ឯកសណ្ឋាន និង​សម្ភារៈសិក្សា។

តាំងពីបុរាណកាលមក “បុណ្យផ្កា” ជាកម្មវិធី​បែប​ព្រះពុទ្ធសាសនា​មួយ​ក្នុង​ប្រទេស​កម្ពុជា ដែល​បង្កប់នូវ​ទំនៀម​ទម្លាប់ នៃសាមគ្គីភាព​របស់​ប្រជា​ពុទ្ធបរិស័ទ ក្នុងការ​រួបរួម​គៀរគរការបរិច្ចាគ​ដើម្បីជួយ​គ្នា​ទៅ​វិញ​ទៅមក ឬ​កសាង​សមិទ្ធផល​រួម​ក្នុង​សហគមន៍។ ជាមួយ​គ្នានេះដែរ “បុណ្យផ្កាអប់រំ” ត្រូវ​បានអង្គការ PSE ​បង្កើត​ឡើង​​ក្នុង​គោលបំណង​ប្រមូលផ្តុំ​កម្លាំង​សាមគ្គីភាពពី​គ្រប់វិស័យ​អប់រំ ក្នុងក្របខណ្ឌ​ក្រសួងអប់រំ យុវជន និងកីឡា និង​ក្រសួងការងារ និង​បណ្តុះបណ្តាលវិជ្ជាជីវៈ អាជ្ញាធរ សហគ្រាស​ឯកជន និង​ដៃគូអប់រំផ្សេងៗ​ទៀតរួបរួមគ្នា​ដើម្បីឧបត្ថម្ភ​គាំទ្រដល់ PSE ឱ្យ​នៅ​តែអាចបន្ត​ផ្តល់ការអប់រំប្រកប​ដោយ​គុណភាពពេញលេញ​មួយ​ទៅ​ដល់កុមារ​ក្រីក្រ​បំផុត​ក្នុង​ប្រទេស​កម្ពុជា។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ពិធីបុណ្យផ្កាអប់រំនេះ បានដើរតួនាទីយ៉ាងសំខាន់ នៅក្នុងការកែប្រែជោគវាសនា របស់ប្អូនៗកុមារកម្ពុជា​ ផ្តល់នូវសេចក្ដីសង្ឃឹម ស្នាមញញឹម និងទទួលបាននូវអារម្មណ៍កក់ក្ដៅ ពីមនុស្សជុំវិញខ្លួន ដូច្នេះឯកឧត្តម​ស្នើ​ឱ្យ​មាន​ការ​ចូលរួមទាំងអស់គ្នា ដើម្បីគាំទ្រដល់អង្គការ PSE ។ ឯកឧត្តម​បញ្ជាក់ថា ការចូលរួមទាំងនេះ ជាផ្នែកមួយជំរុញបាននូវគុណភាពការអប់រំទៅដល់កុមារក្រីក្រ និងងាយរងគ្រោះ ហើយដើម្បីក្លាយទៅជាធនធានមនុស្សដ៏មានតម្លៃ សម្រាប់ការអភិវឌ្ឍប្រទេសជាតិ។

“ការចូលរួមរបស់យើងទាំងអស់គ្នា គឺបញ្ជាក់នូវស្មារតីចែករំលែក ធនធាន ក្នុងការបំផុសចលនា រួបរួមសាមគ្គីជួយគ្នាទៅវិញ ទៅមក ដែលជាគុណធម៌មួយដ៏ល្អប្រពៃ”

ឯកឧត្តម​បណ្ឌិតសភាចារ្យ ហង់ជួន ណារ៉ុន មានប្រសាសន៍បន្ថែមថា បច្ចុប្បន្នវិទ្យាស្ថាន PSE មានបុគ្គលិកសរុបជាង ៦០០នាក់ និងផ្តល់ជំនួយទៅកាន់កុមារជាង ៦៥០០នាក់។ បន្ទុកមួយនេះ មានភាពធំធេង ហើយតាមរយៈពិធីបុណ្យផ្កាអប់រំនេះ មិនត្រឹមតែឱ្យ​យើងយល់ដឹងពីសេចក្ដីត្រូវការ និងទុក្ខលំបាករបស់អ្នកដែលត្រូវការជំនួយនោះទេ ប៉ុន្តែថែមទាំងមានការផ្សារភ្ជាប់អារម្មណ៍ មនោសញ្ចេតនារវាងអ្នកផ្តល់ និងអ្នកទទួល និងជាសកម្មភាពមួយដែលមានតម្លៃឥតគណនា ក្នុងការចូលរួមបំផុសលើកទឹកចិត្តឱ្យមានវប្បធម៌នៃការចែករំលែកទាន និងសេចក្ដីស្រឡាញ់ លើកកម្ពស់ទំនួលខុសត្រូវក្នុងសង្គម និងការលើកទឹកចិត្តវិស័យអប់រំ។

លោកស្រី ដេប៉ាលីយែរ លក្ខិណា នាយកគ្រប់គ្រងទូទៅ នៃអង្គការដើម្បីភាពញញឹមនៃកុមារ បានឱ្យដឹងថា ជាង២៨ឆ្នាំហើយ ដែលអង្គការដើម្បីភាពញញឹម នៃកុមារ (PSE) បំពេញបេសកម្មក្នុងប្រទេសកម្ពុជា ជួយដល់កុមារក្រីក្រ និងងាយរងគ្រោះ ឱ្យទទួលបានការអប់រំ និងការបណ្តុះបណ្តាលជំនាញវិជ្ជាជីវៈមួយប្រកបដោយគុណភាព។ គិតត្រឹមឆ្នាំសិក្សានេះ មានយុវជនជាង ៧,០០០ នាក់ហើយ ដែលបានរៀនចប់ដោយជោគជ័យ និងក្លាយខ្លួនជាធនធានមនុស្ស ប្រកបដោយសមត្ថភាព និងសក្តានុពលក្នុងទីផ្សារពលកម្មការងារ រួមទាំងបាននឹងកំពុងកែប្រែជីវិតរបស់ពួកគេ ចាកចេញពីភាពក្រីក្រ ហើយនឹងបន្តជាចលករជំរុញការអភិវឌ្ឍសេដ្ឋកិច្ចជាតិកម្ពុជាយើងផងដែរ។

“នៅមានកុមារជាង៦៥០០ នាក់ផ្សេងទៀត ដែលកំពុងស្ថិតក្នុងកម្មវិធីអប់រំរបស់ PSE ពួកគេបានដាក់ក្តីសង្ឃឹម និងទំនុកចិត្កមកលើ PSE ដើម្បីបន្តទទួលបានឱកាសអប់រំ និងបណ្តុះបណ្តាលពីពួកយើង ហើយក៏មានកុមារក្រីក្រផ្សេងទៀត ជាច្រើនត្រូវការការជួយពីពួកយើង”

នាយកគ្រប់គ្រងទូទៅអង្គការដើម្បីភាពញញឹមនៃកុមារបញ្ជាក់ថា ជាច្រើនឆ្នាំមកនេះ ភាគច្រើននៃថវិកាជំនួយរបស់ PSE បានមកពីការរៃអង្គាសនៅបណ្តាទ្វីបអឺរ៉ុប។ តែថ្មីៗនេះ PSE ក៏បានងាកមករកការជួយជ្រោមជ្រែងពីប្រជាជនក្នុងស្រុក ព្រោះប្រជាជនកម្ពុជាត្រូវតែជួយប្រជាជនកម្ពុជា។ ដោយឡែក​សម្រាប់បុណ្យផ្កាអប់រំនេះ បើតាមលោកស្រី ដេប៉ាលីយែរ លក្ខិណា មានគ្រឹះស្ថានអប់រំ និងស្ថាប័នឯកជនចំនួនប្រមាណ ៧៥ស្ថាប័ន បានចូលរួមជាសហអ្នកផ្តើមបុណ្យផ្កាអប់រំ ដោយការបរិច្ចាគទាន ដើម្បីទ្រទ្រង់ ផ្តល់ការអប់រំដល់កុមារដែលជួបការលំបាក និងមានតម្រូវការពិតប្រាកដ។

អង្គការដើម្បីភាពញញឹម នៃកុមារ ហៅកាត់ជាភាសាបារាំងថា PSE ត្រូវបានបង្កើតឡើងក្នុងប្រទេសកម្ពុជានៅក្នុងឆ្នាំ១៩៩៦ ដោយលោក Christian និងលោកស្រី Marie-France Des Pallières។ ហើយដើម្បីបំពេញបេសកកម្មក្នុងប្រទេសកម្ពុជា PSE បានចុះអនុសារណៈជាមួយ ក្រសួងការបរទេស និងសហប្រតិបត្តិ ការអន្តរជាតិ, ក្រសួងអប់រំយុវជន និងកីឡា, ក្រសួងការងារ និងបណ្តុះបណ្តាលវិជ្ជាជីវៈ និងក្រសួងសង្គមកិច្ច ព្រមទាំងទទួលបានការសហការយ៉ាងជិតស្និទជាមួយរដ្ឋបាលមូលដ្ឋាន។ អង្គការដើម្បីភាពញញឹមនៃកុមារ មានទស្សនៈវិស័យដូចជា ៖ កុមារដែលឃ្លានត្រូវមានអាហារបរិភោគ, កុមារដែលមានជំងឺត្រូវទទួលបានការព្យាបាល, កុមារដែលមិនបានចូលរៀន ត្រូវទទួលបាននូវការអប់រំ និងទាំងចំណេះដឹងទូទៅ ក៏ដូចជាការបណ្តុះបណ្តាលវិជំនាញជ្ជាជីវៈ និងការការពារ និងថែទាំចំពោះកុមារក្រីក្រ និងរងគ្រោះ។

លោកស្រី ដេប៉ាលីយែរ លក្ខិណា មានប្រសាសន៍ថា ជាការឆ្លើយតបនឹងទស្សនៈវិស័យទាំងនេះ ចាប់តាំងពីឆ្នាំ១៩៩៦​មក PSE បានជួយកុមារ និងយុវជន ដែលមកពីគ្រួសារទីទ័លក្រ និងមិនបានទទួលការអប់រំ ដែលស្ថិតនៅរាជធានីភ្នំពេញ ខេត្តសៀមរាប និងខេត្តព្រះសីហនុ តាមរយៈកម្មវិធីប្រតិបត្តិចំនួន៦ធំៗគឺ ទី១ កម្មវិធីអាហារ ទី២ កម្មវិធីសុខភាព ទី៣ កម្មវិធីការពារនិងការស្នាក់នៅ ទី៤ កម្មវិធីអប់រំចំណេះដឹងទូទៅ ទី៥ កម្មវិធីបណ្តុះបណ្តាលវិជ្ជាជីវៈ និងឧត្តមសិក្សា និងទី៦ កម្មវិធីផ្តល់ជំនួយដល់គ្រួសារ។ ហើយកម្មវីធីទាំងអស់នេះគឺជាការចូលរួមចំណែកជាមួយនឹងគោល នយោបាយរបស់រាជរដ្ឋាភិបាលកម្ពុជា៕