ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពមមាញឹកខ្លាំង អាចកើតមកពីកត្តាពីរយ៉ាងធំៗ គឺកត្តាខាងក្រៅ និងខ្លួនឯង។ ភាពមមាញឹកពីកក្តាខាងក្រៅ មានដូចជា បន្ទុកគ្រួសារធ្ងន់លើសពីទំហំលទ្ធភាព ការប្តេជ្ញាចិត្តបំពេញតាមការរំពឹងទុករបស់មជ្ឈដ្ឋានជុំវិញខ្លួន ត្រូវធ្វើការងារបន្ទាន់ភ្លាមៗ ក៏ដូចជាទំហំ នៃប្រភេទការងារធំលើសសមត្ថភាពជាដើម។ ដោយឡែកភាពមមាញឹកពីកត្តាខាងក្នុង មានដូចជា ខ្វះបទពិសោធន៍ទៅលើជំនាញនៃការគ្រប់គ្រងពេលវេលា រំពឹងភាពល្អឥតទាស់ពីលទ្ធផលការងារ ការពន្យារពេល មិនហ៊ានបដិសេធទោះបីខ្លួនមានបន្ទុកការងារហើយក្ដី ឬក៏ទាមទារដឹងរឿងជាច្រើន ដោយគ្មានការកំណត់អាទិភាពចំពោះកិច្ចការនីមួយៗ។
តាមរយៈគេហទំព័រ Very well Mind បានពន្យល់ថា មូលហេតុដែលមនុស្សចូលចិត្តរក្សាភាពមមាញឹកជាប្រចាំ ទោះបីមិនបញ្ចប់លទ្ធផល ដោយសារតែពួកគេយល់ថា ភាពរវល់ជាប់ជាប្រចាំត្រូវបានផ្តល់តម្លៃ និងការកោតសរសើរពីខាងក្រៅ។ ភាពរវល់ ពេលខ្លះប្រៀបដូចជាកិត្តិយសបំពាក់លើបុគ្គលម្នាក់ៗយ៉ាងដូច្នោះដែរ ខណៈកាលដែលមានកាលវិភាគលើសលប់ប៉ះពាល់ ជាអវិជ្ជមានទៅកាន់សុខភាពផ្លូវចិត្ត និងជះឥទ្ធិពលអាក្រក់ទៅកាន់ទំនាក់ទំនង រួមទាំងធ្វើឱ្យបរិយាកាសគ្មានផាសុកភាព។
យ៉ាងណាមិញ ជាដំណោះស្រាយត្រួសៗចំពោះបញ្ហាមមាញឹកលើសលប់មានដូចជា ការចាប់ផ្តើមកំណត់ប្រភេទការងារណាដែលអាទិភាព (សំខាន់ និងប្រញាប់) ដាក់ដែនកំណត់ មិនថាការងារ ទំនាក់ទំនង និងការទទួលយកទំនួលខុសត្រូវណាមួយបន្ថែម។ ក្នុងកាលវិភាគទៀតសោតត្រូវមានពេលសម្រាកគ្រប់គ្រាន់ ឬមានតុល្យភាព រួមទាំងការស្នើសុំជំនួយពីខាងក្រៅ មិនថាជាយោបល់ ឬបច្ចេកទេស។ តាមរយៈគេហទំព័រ Verywell Mind ដដែល បានបង្ហាញដំណោះស្រាយលម្អិតមួយចំនួន ដែលឆ្លើយតបទៅនឹងបញ្ហាមមាញឹកលើសលប់ ៖
១.រំងាប់អារម្មណ៍ ៖ ការអនុវត្តវិធីសាស្រ្តរំងាប់អារម្មណ៍ តាមរយៈវិធីសាស្រ្តចម្រុះគ្នា បានផ្សារភ្ជាប់ទំនាក់ទំនង ជាមួយមនុស្សដែលស្និទ្ធស្នាល ការសង្កេតផ្ទៀងផ្ទាត់ ដោយគ្មានការវាយតម្លៃពីមជ្ឈដ្ឋានណាមួយ និងការនៅជាមួយស្មារតីខ្លួនឯងជាប្រចាំ។ ការអប់រំចិត្ត អាចបញ្ចៀសការរំខានមួយចំណែក មិនថាបុគ្គល ឬក្នុងប្រព័ន្ធផ្សព្វផ្សាយ រួមទាំងអាចបញ្ចៀសអាការៈអស់កម្លាំងពេលបំពេញបេសកកម្ម។
២.មានពេលវិស្សមកាល ៖ ការធ្វើផែនការសម្រាក និងវិស្សមកាលធំក្ដី តូចក្ដី បានរួមចំណែក បំពេញនូវតុល្យភាពរវាងការរស់នៅ ការងារ និងការសិក្សា ក៏ដូចជា ការស្រូបយកកម្លាំងមកវិញក្នុងការបន្តប្រសិទ្ធភាព នៃការងារជំនួសឱ្យការប្រើប្រាស់ច្រើនម៉ោង ទាំងខ្វះនូវថាមពល ដើម្បីបញ្ចប់។
៣.ចំណាយពេលជាមួយមនុស្សសំខាន់ ៖ ការបញ្ចូលសកម្មភាពមួយនេះ ទៅក្នុងផែនការសកម្មភាព បានផ្តល់នូវអារម្មណ៍ផ្សារភ្ជាប់រវាងគ្នា នឹងគ្នា រួមទាំងការស្រូបយកថាមពលផ្លូវចិត្តបន្ថែម។
៤.មោទនភាព ៖ ការចំណាយពេលខ្លះ កំណត់ចំណាំសកម្មភាពល្អៗ និងការរៀនមានមោទនភាពចំពោះខ្លួនឯង រួមទាំងការសរសេរពាក្យពេចន៍វិជ្ជមាន ដែលយើងបានជួបប្រទះរៀងរាល់ថ្ងៃ។
៥.ការដាក់ដែនកំណត់ជាមួយអ្នកដទៃ ៖ មិនថាកាលពីកុមារភាព លោកអ្នកត្រូវបានអប់រំឱ្យចេះធ្វើអំពើល្អ ត្រូវជួយយកអាសាអ្នកដទៃយ៉ាងណានោះទេ។ ពេលដែលស្ថិតក្នុង ដំណាក់កាលពេញវ័យ និងមានសមត្ថភាពសម្រេចចិត្តបាន លោកអ្នកគួរមានភាពបត់បែន ក្នុងការប្រើប្រាស់បច្ចុប្បន្នភាព ដោយត្រូវហ៊ានបដិសេធការសុំជំនួយមួយចំនួន ជាពិសេសកំឡុងពេលដែលត្រូវការជួយខ្លួនឯងដែរ។ មួយវិញទៀត ការយកចិត្តទុកដាក់ លើទំនួលខុសត្រូវខ្លួនឯង សុទ្ធសឹងតែ ជាកត្តាជួយជំរុញឱ្យសុខភាពផ្លូវចិត្ត មានភាពរឹងមាំ និងការប្រព្រឹត្តមួយដែលឆ្លើយតបក្នុងរយៈពេលវែង។
៦.ស្គាល់ពីបុព្វហេតុនៃគុណតម្លៃជីវិតផ្ទាល់ខ្លួន ៖ គួរចងចាំថា គុណតម្លៃផ្ទាល់ខ្លួន មិនស្ថិតលើការរក្សាភាពមមាញឹកនោះទេ ជំនួសមកវិញនូវការចេះរៀបចំ ការខំប្រឹងអភិវឌ្ឍ សមត្ថភាពពីមួយពេលទៅមួយពេល និងដឹងពីមូលហេតុនៃការធ្វើអ្វីមួយមុននឹងសម្រេចចិត្តទទួលយក។
៧.ការរំឭក ៖ ការដកដង្ហើមវែងៗ និងទៅកន្លែងណាមួយស្ងប់ស្ងាត់ម្នាក់ឯង ដោយការប្រើប្រាស់ ឧបករណ៍ផ្ញើសារដាស់តឿន ព្រោះសកម្មភាពខ្លះតូចមែនប៉ុន្តែបានផ្តល់ប្រយោជន៍ក្នុងរយៈពេលវែង។
៨.ទាក់ទងអ្នកជំនាញជាប្រចាំ ៖ ការធ្លាក់ចុះខ្លាំងនៃផលិតភាព និងសុខដុមរមនា នៃការរស់នៅ បានរារាំងក្នុងការបន្តភាពលូតលាស់ទៅមុខ ដែលកត្តានេះបណ្តាលមកពី អាការធ្ងន់ធ្ងរនៃស្ថានភាពផ្លូវចិត្តមិនល្អ។ ដូច្នេះការមានទំនាក់ទំនងជាមួយអ្នកមានជំនាញថែទាំចិត្ត ឬអ្នកឯកទេសព្យាលបាល ក្នុងការតាមដានសុខភាពឱ្យបានជាប់លាប់។
៩.ការរំពឹងទុកក្នុងទំហំសមល្មម ៖ នៅពេលដែលនិយាយអំពីលទ្ធផលដែលចង់បាន មិនថាការងារ ឬក៏ការសិក្សានោះទេ ការដាក់ក្ដីរំពឹងដែលស្របនឹងលទ្ធភាព ឬសមត្ថភាព គឺជាការរំពឹងមួយដែលមានភាពជាក់លាក់ និងភាពសមរម្យ។
១០.សុំជំនួយទៅកាន់បុគ្គលដែលអាចជួយបាន ៖ តាមរយៈគេហទំព័រ LHH បានឱ្យដឹងថា កត្តាដែលបណ្តាលឱ្យ មានអាការមមាញឹក ឬអស់កម្លាំងនៅពេលបំពេញកិច្ចការងារ ឬមិនសូវមានគំនិតថ្មីៗ នៅពេលចាប់ផ្តើមកិច្ចការថ្មី អាចមកពីត្រូវការជំនាញបន្ថែមក្នុងការអភិវឌ្ឍ ឬក៏ប្រភេទកិច្ចការដែលទទួលបានហាក់ថ្មីពេក ដែលតម្រូវឱ្យមានភាពមមាញឹកទ្វេគុណកំឡុងពេលធ្វើការ ។ ស្រ្តេសមិនមែនបណ្តាលមកពីការងារច្រើនទាំងស្រុងទេ តែបណ្តាលមកពីរវល់ច្រើន តែមិនមានលទ្ធផលជាក់លាក់បង្ហាញចេញ ដូច្នេះការសុំជំនួយ ពីបុគ្គដែលមានជំនាញ ឬមានវិជ្ជាជីវៈ បានរួមចំណែកកាត់បន្ថយការប្រើពេលទៅរៀនសូត្រនូវជំនាញមួយដែលមិនធ្លាប់សាកល្បងពីមុន។ ព្រោះអ្នកមានជំនាញ ឬអ្នកមានបទពិសោធន៍ ជាបុគ្គលដែលដឹងថា គន្លឹះបែបណាប្រើពេលអស់តិច រួមទាំងការធានាបាននូវប្រសិទ្ធភាពការងារ៕
