មហោស្រពអក្សរសិល្ប៍ខ្មែរ បានរកឃើញជ័យលាភី៣រូបផ្នែករឿងខ្លី និង២រូបផ្នែកកំណាព្យ ក្នុងកម្មវិធីប្រកួតប្រជែងអក្សរសិល្ប៍ នៃមហោស្រពអក្សរសិល្ប៍ខ្មែរ ប្រធានបទ “អក្សរសិល្ប៍បៃតង”។

សម្រាប់ជ័យលាភី៣រូបផ្នែករឿងខ្លី រួមមាន ជ័យលាភីលេខ១ រឿង អាក្រាត និពន្ធដោយ សាន ពិសិទ្ធិ, ជ័យលាភីលេខ២ រឿង ល្ខោនមួយរាត្រី និពន្ធដោយ ញឹមវ៉ាន់ សុខណាល់, ជ័យលាភីលេខ៣ រឿង ដើមទ្រូងដ៏កក់ក្ដៅ និពន្ធដោយ កប វណ្ណហួច។ ចំណែក ជ័យលាភី ២រូបផ្នែកកំណាព្យ រួមមាន ជ័យលាភីលេខ២ “នំប៉ាវមន្រ្តី” និពន្ធដោយ សាន ពិសិទ្ធិ និងជ័យលាភីលេខ៣ “ល្បើកត្នោតជ្រៃ” និពន្ធដោយ ហាន សេងលី។ ក្នុងនោះ ជ័យលាភីកិត្តិយស រួមមាន “សំឡេងបេះដូង” និពន្ធដោយ ថន ធារៈ, “ទំនួញរុក្ខា” និពន្ធដោយ សាត ឌិច និង “សោភ័ណភាពព្រឹក្សាជាតិ” និពន្ធដោយ នួក សុជាតិ។

អ្នកស្រី សូ ភីណា ស្ថាបនិក និងនាយិកាគ្រប់គ្រងមហោស្រពអក្សរសិល្ប៍ខ្មែរ លើកទី៧ មានប្រសាសន៍ថា ស្នាដៃដែលជាប់ជ័យលាភីក្នុងកម្មវិធីប្រកួតប្រជែងអក្សរសិល្ប៍បានគោរពតាមលក្ខខណ្ឌនៃកម្មវិធី គឺខ្លឹមសារស្នាដៃស្របតាមប្រធានបទមហោស្រពអក្សរសិល្ប៍ខ្មែរ លើកទី៧ “អក្សរសិល្ប៍បៃតង” និងបានឆ្លងកាត់ការពិនិត្យពិច្ច័យយ៉ាងសុក្រឹតបំផុតពីគណៈកម្មការទាំងបីរូប ដែលសុទ្ធសឹងតែជាកវីនិពន្ធឆ្នើម និងមានបុព្វហេតុល្អចំពោះមហោស្រពអក្សរសិល្ប៍ខ្មែរ។

ស្ថាបនិក និងនាយិកាគ្រប់គ្រងមហោស្រពអក្សរសិល្ប៍ខ្មែរ លើកទី៧ បញ្ជាក់បន្ថែមថា សម្រាប់ឆ្នាំនេះ ការដាក់ស្នាដៃប្រកួតក្នុងកម្មវិធីប្រកួតប្រជែងអក្សរសិល្ប៍សរុបចំនួន ១២៩ស្នាដៃ ក្នុងនោះ រឿងខ្លី ៦៨ស្នាដៃ និងកំណាព្យ ៦១ស្នាដៃ ដោយចំនួននេះហាក់មានការថយចុះពី ១៥ទៅ២០ភាគរយ បើធៀបនឹងឆ្នាំមុន។ អ្នកស្រី សូ ភីណា ក៏បានលើកទឹកចិត្តដល់សាធារណៈជន និងអ្នកស្រឡាញ់វិស័យអក្សរសិល្ប៍ ឬអាជីពជាអ្នកនិពន្ធ អាចបន្តចូលរួមប្រកួតក្នុងកម្មវិធីនេះនៅឆ្នាំក្រោយៗទៀតទោះមិនទាន់ទទួលជ័យលាភី ត្រូវរក្សាការព្យាយាម កុំបោះបង់ ព្រោះការខិតខំប្រឹងប្រែងនឹងទទួលបានជោគជ័យមិនខាន។ លើសពីនេះ គួរអានស្នាដៃអ្នកនិពន្ធជ័យលាភីមុនៗ ជាពិសេសរៀនវគ្គតែងនិពន្ធ ឬអក្សរសិល្ប៍ច្នៃប្រឌិតជាដើម។

បើតាម លោក ចេង រតនា អ្នកសម្របសម្រួលកម្មវិធីប្រកួតអក្សរសិល្ប៍ និយាយថា ឆ្នាំនេះ មានអ្នកចូលរួមប្រកួតតិចជាងឆ្នាំមុនក៏ពិតមែន ប៉ុន្តែស្នាដៃដែលបេក្ខជនដាក់ប្រកួត គណៈកម្មការឃើញថា មានគុណភាពជាងឆ្នាំមុន។ ជាក់ស្ដែង ឆ្នាំនេះ បានរកឃើញជ័យលាភីលេខ១ ផ្នែករឿងខ្លី។

សូមបញ្ជាក់ថា សម្រាប់ជ័យលាភីលេខ១ នៅក្នុងកម្មវិធីនេះទទួលថវិកា ៨០ម៉ឺនរៀល និងបណ្ណសរសើរ, ជ័យលាភីលេខ២ ទទួលថវិកា ៦០ម៉ឺនរៀល និងបណ្ណសរសើរ និងជ័យលាភីលេខ៣ ទទួលថវិកា ៤០ម៉ឺនរៀល និងបណ្ណសរសើរ។ លើសពីនេះ ម្ចាស់ជ័យលាភីទាំងអស់នឹងត្រូវបានអញ្ជើញឱ្យចូលរួមកម្មវិធីមហោស្រពអក្សរសិល្ប៍ខ្មែរ លើកទី៧ នៅខេត្តកំពង់ចាម ក្រោមការរៀបចំរបស់មហោស្រពអក្សរសិល្ប៍ខ្មែរ៕