សេង អៃសះ ​​​គឺជាក្មេងស្រីម្នាក់ធំធាត់ឡើងនៅ​ខេត្ត​រតនគិរី តំបន់​ភាគឦសាន នៃប្រទេសកម្ពុជា, នៅ​ស្រុក​កំណើត​ដើម្បីជួយគ្រួសារ អៃសះ បានចាប់យកមុខរបរ​ជាអ្នក​លក់ប្រហិតតាមភូមិ និង​ពេលខ្លះ​ស៊ីឈ្នួល​រើស​ស្វាយចន្ទី ព្រោះតែគ្មានជំនាញ​អ្វី​ និង​មិន​បានរៀនខ្ពង់ខ្ពស់។ តែ​បច្ចុប្បន្ន​នេះ អៃសះ បានក្លាយជាអ្នកជំនាញភេសជ្ជៈ​ដ៏ពូកែម្នាក់ និង​កំពុងធ្វើ​ការងារដែលទទួលបានប្រាក់កម្រៃសមរម្យ​ នៅ​ក្នុងហាងកាហ្វេមួយ​កន្លែង​នៅ​រាជធានីភ្នំពេញ បន្ទាប់ពីនាង​ឆ្លង​កាត់ការ​បណ្តុះបណ្តាល​ជំនាញធុរកិច្ចភេសជ្ជៈ ពី​កម្មវិធី ១,៥លាននាក់ របស់រាជរដ្ឋាភិបាល។

យុវតី សេង អៃសះ និយាយថា តាមពិតទៅនាង​ស្រឡាញ​ជំនាញ​ឆុងកាហ្វេ និង​ភេសជ្ជៈ ហើយ​ក៏​ធ្លាប់​បាន​ស្វែង​រក​ការ​រៀន​ជំនាញនេះដែរ ប៉ុន្តែតម្លៃនៃថ្នាក់រៀនជំនាញនេះថ្លៃ ធ្វើ​ឱ្យ អៃសះ មិន​មានលទ្ធភាពរៀន ទើបបន្តនៅ​ធ្វើការងារជាអ្នក​រើសស្វាយចន្ទី និង​ជាអ្នក​លក់ប្រហិតតាមភូមិ​បន្ត​ទៅ។ ប៉ុន្តែថ្ងៃមួយ នាង​ក៏​ទទួលបានដំណឹង​ពីការ​សិក្សា​ជំនាញ​ធុរកិច្ចភេសជ្ជៈ ដែលធ្វើការផ្សព្វផ្សាយ​ពី​វិទ្យាស្ថានជាតិសហគ្រិនភាព និង​នវានុវត្តន៍​នៅ​ក្នុងស្រុកអណ្តូងមាស ដែលជា​តំបន់​នាងរស់នៅ អំពី​ការ​សិក្សា​ដោយ​ឥតគិតថ្លៃ ក្រោមគម្រោង បណ្តុះបណ្តាលជំនាញវិជ្ជាជីវៈ ដល់យុវជន ១,៥លាននាក់របស់រាជរដ្ឋាភិបាល។

ក្រោយ​ទទួលបាន​ព័ត៌មាន​នៃការ​សិក្សា​នេះភ្លាម យុវតី សេង អៃសះ ក៏​សម្រេចចិត្តសុំ​ឪពុកម្តាយ​ធ្វើ​ដំណើរ​មក​រាជធានីភ្នំពេញ​ជាមួយ​មិត្តភក្តិ​ពីរបីនាក់ទៀត​ដែលមានក្តីស្រម៉ៃ និង​ស្រឡាញ់ការឆុងកាហ្វេដូចគ្នា ដើម្បីចុះឈ្មោះ​ចូលរៀនជំនាញ ធុរៈកិច្ចភេសជ្ជៈ នៅវិទ្យាស្ថានជាតិសហគ្រិនភាព និងនវានុវត្ត (NIEI) តែម្តង។

ចាប់តាំងពីរៀនជំនាញធុរៈកិច្ចភេសជ្ជៈមក យុវតី សេន អៃសះ ពិតជាសប្បាយចិត្ត និងខិតខំយកចិត្តទុកដាក់ក្នុងការក្រេបយកវិជ្ជាពីលោកគ្រូអ្នកគ្រូដែលបានបង្រៀន និងអនុវត្តន៍ជាក់ស្ដែង។ ដោយការ​ខិតខំ អៃសះ​ បានក្លាយជាសិស្សម្នាក់ក្នុងចំណោមសិស្សជាច្រើនទៀតដែលទទួលបានឱកាសហាត់ការងារនៅតាមហាងកាហ្វេផ្សេងៗគ្នា បានសិក្សាអំពីការប្រើប្រាស់ម៉ាស៊ីន ការរៀនពីកាហ្វេ និងភេសជ្ជៈផ្សេងៗ និងស្វែងយល់កាន់តែច្រើនអំពីផ្នែកនេះរហូតបញ្ចប់ការសិក្សា។

ត្រឡប់មកនិយាយពីអារម្មណ៍​នៃការឃ្លាតឆ្ងាយពីផ្ទះវិញ អៃសះ និយាយថា ការផ្លាស់ប្ដូរកន្លែងស្នាក់នៅ និងមកសិក្សាឆ្ងាយផ្ទះ ធ្វើ​ឱ្យ​នាង​ជួបផលលំបាកមួយចំនួន ដូចជាអាហារ និងកន្លែងស្នាក់នៅ ប៉ុន្តែដោយមានការជួយសម្របសម្រួល និងយកចិត្តទុកដាក់ពីលោកគ្រូអ្នកគ្រូនៅក្នុងសាលារៀន រូបនាង និងមិត្តអាចរៀន និងបញ្ចប់ការសិក្សាជំនាញរយៈពេលខ្លីដោយជោគជ័យ និងមានការងារមួយច្បាស់លាស់ផងដែរ។

យ៉ាងណាក៏ដោយ បច្ចុប្បន្ន សេន អៃសះ កំពុងធ្វើការងារជាអ្នកឆុងកាហ្វេ និងភេសជ្ជៈផ្សេងៗនៅក្នុងហាងកាហ្វេរបស់វិទ្យាស្ថានជាតិសហគ្រិនភាព និងនវានុវត្ត (NIEI) និងកំពុងបន្តចាប់ជំនាញវគ្គខ្លីផ្សេងៗដែលកម្មវិធី១លាន៥សែនផ្ដល់ជូនផងដែរ។

ជារួម យុវតី មកពីខេត្តរតនៈគិរីរូបនេះ លើកទឹកចិត្តដល់យុវជន យុវនារី និងសាធារណៈជនទាំងអស់ដែលមានបំណងសិក្សាអំពីជំនាញវគ្គខ្លីផ្សេងៗសូមស្វះស្វែងរកការរៀនជំនាញនៅតាមវិទ្យាស្ថានបច្ចេកទេស និងតាមគ្រឹះស្ថានសិក្សានានាដែលផ្ដល់ការសិក្សាវគ្គខ្លី និងជំនាញច្បាស់លាស់៕