ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងបិទកម្មវិធីអូឡាំពិករដូវក្ដៅឆ្នាំ២០២៤ នៅទីក្រុងប៉ារីស ប្រទេសបារាំង កាលពីពេលកន្លងទៅថ្មីៗនេះ កំពូលតារារ៉េបកម្ពុជា លោក ម៉ាន់ វណ្ណដា បានធ្វើឱ្យប្រជាជនកម្ពុជាមានមោទកភាព ក្រោយពីបានបង្ហាញវត្តមានច្រៀងនៅលើឆាកក្នុងកម្មវិធីអន្តរជាតិដ៏ធំនេះ។ តារារ៉េបមកពីខេត្តព្រះសីហនុរូបនេះ មិនភ្លេចនាំយកអ្វីដែលជាសិល្បៈវប្បធម៌ខ្មែរទៅបង្ហាញនៅអន្តរជាតិឡើយ ដោយស្លៀកសម្លៀកបំពាក់ច្នៃចេញពីផាមួងសូត្រខ្មែររងជើងត្រក៤ ពណ៌ខ្មៅ ដែលការត្បាញដោយដៃផ្ទាល់របស់ប្រជាជនខ្មែរតែម្ដង។
លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា ការបង្ហាញខ្លួនរបស់តារារ៉េបខ្មែរ លោក វណ្ណដា ដែលច្រៀងនៅក្នុងពិធីបិទព្រឹត្តិការណ៍ការប្រកួតកីឡាអូឡាំពិក នៅទីក្រុងប៉ារីស ប្រទេសបារាំង ជាចំណុចគួរឱ្យកត់សម្គាល់មួយដែលតារារ៉េបខ្មែរយើងមានឱកាសឈរនៅលើឆាកអន្តរជាតិ។
លោកបណ្ឌិតបញ្ជាក់បន្ថែមថា ប្រសិនបើការបង្ហាញនេះ ទាំងខ្លឹមសារ កាយវិការ អត្ថន័យ រូបភាពទាក់ទងនឹងប្រពៃណីទំនៀមទម្លាប់ខ្មែរ គឺជាឱកាសមួយក្នុងការផ្សព្វផ្សាយអំពីអត្តសញ្ញាណខ្មែរលើឆាកអន្តរជាតិ ក៏ដូចជាទាក់ទាញភ្ញៀវទេសចរឱ្យមកទស្សនាកម្ពុជាផងដែរ។ លោកបណ្ឌិតបន្តថា សកម្មភាពនេះ គឺត្រូវតែអបអរសាទរ និងលើកទឹកចិត្តសិល្បៈករខ្មែរបង្ហាញសមត្ថភាពលើឆាកអន្តរជាតិ។
សម្រាប់ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ វិញ បានមានប្រសាសន៍គាំទ្រ និងមានមោទនភាពជាខ្លាំងចំពោះការបង្ហាញខ្លួនរបស់តារារ៉េបខ្មែរ លោក វណ្ណដា ដែលបានច្រៀងនៅក្នុងពិធីបិទ នៃព្រឹត្តិការណ៍ប្រកួតកីឡាអូឡាំពិកនៅទីក្រុងបារីស ប្រទេសបារាំង។ ឯកឧត្តមថា នេះជាព្រឹត្តិការណ៍ដ៏កម្រដែលកម្ពុជាមិនងាយមានឱកាសបង្ហាញសិល្បៈវប្បធម៌ខ្មែរនៅលើឆាកអន្តរជាតិដែលមានមនុស្សរាប់ម៉ឺននាក់បានចូលរួមទស្សនា និងអាចស្គាល់កម្ពុជាកាន់តែច្បាស់។
«នៅក្នុងប្រទេសមួយដែលមានអរិយធម៌ល្បីល្បាញ ដូចជាប្រទេសបារាំង មិនងាយមានឱកាសក្នុងការចូលរួម ដូច្នេះ សមត្ថភាព និងទេព្យកោសល្យរបស់ តារារ៉េបខ្មែរ លោក វណ្ណដា ពិតជាអស្ចារ្យ និងបាននាំយកសិល្បៈវប្បធម៌ខ្មែរទៅបង្ហាញលើឆាកអន្តរជាតិ»
ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ
រដ្ឋលេខាធិការក្រសួងវប្បធម៌ និងវិចិត្រសិល្បៈ ក៏បានលើកទឹកចិត្តយុវជនកម្ពុជាទាំងអស់ដែលមានឱកាស និងទេពកោសល្យគួរពង្រឹងសមត្ថភាពរបស់ខ្លួនឱ្យកាន់តែប្រសើរឡើង ដើម្បីធ្វើយ៉ាងណាលើកស្ទួយកេរ្តិ៍ឈ្មោះប្រទេសកម្ពុជានៅលើឆាកអន្តរជាតិឱ្យកាន់តែល្បីល្បាញ។ ទន្ទឹមគ្នានេះ ទោះជាមានការអភិវឌ្ឍបែបណាក៏ដោយគ្រប់រូបភាពវប្បធម៌សិល្បៈគួររក្សាឱ្យបាននូវអត្តសញ្ញាណរបស់ជាតិ។ ជាក់ស្ដែង តារាចម្រៀងរ៉េប វណ្ណដា បានលើកយកបទចម្រៀងរបស់ខ្លួនដែលមានចង្វាក់ភ្លេងរំលេចអំពីឧបករណ៍តន្រី្តខ្មែរ គឺសម្លេងចាប៉ី។ ចំណែក សម្លៀកពាក់របស់គាត់ក៏បង្ហាញអំពីអត្តសញ្ញាណខ្មែរ។
ឯកឧត្តម ទិត ថារិទ្ធ បញ្ជាក់ថា នេះជាគំរូភាពមួយដែលសិល្បៈកររូបនេះ បានរំលេចអត្តសញ្ញាណជាតិ បើទោះជាបទចម្រៀងមួយនេះមានការវិវត្តតាមបែបបស្ចឹមប្រទេសក្តី៕
