ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមការចេញផ្សាយរបស់ ក្រសួងមុខងារសាធារណៈ បានឱ្យដឹងថា បេក្ខជនដែលបានបំពេញតាមលក្ខខណ្ឌគ្រប់គ្រាន់ និងត្រូវបានអនុញ្ញាតឱ្យចូលរួមចូលរួមការប្រឡងប្រជែងជ្រើសរើសគ្រូបង្រៀននៅ «បឋមសិក្សា» នាពេលខាងមុខនេះ មានចំនួន ៣៨.១៦៨នាក់ ក្នុងនោះ ស្រី្ត ២៨.៤៥៦នាក់។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា នៅក្នុងរយៈពេលប្រមាណ ១០ឆ្នាំចុងក្រោយនេះ ចំនួនបេក្ខជនចូលរួមចុះឈ្មោះដាក់ពាក្យប្រឡងដើម្បីក្លាយជាគ្រូបង្រៀនទាំងកម្រិតមធ្យមសិក្សា និងបឋមសិក្សា គឺមានចន្លោះពី ២ម៉ឺនទៅ៤ម៉ឺននាក់នៅក្នុងដាក់ពាក្យប្រឡងម្ដងៗ។
អ្នកនាំពាក្យបញ្ជាក់បន្ថែមថា ចំនួនបេក្ខជនដែលបានដាក់ពាក្យចូលរួមប្រឡងគ្រូបង្រៀនបឋមសិក្សានៅក្នុងឆ្នាំនេះ គឺជាចំនួនដែលអាចបញ្ជាក់បានថា សិស្សានុសិស្សនៅតែបន្តចាប់អារម្មណ៍លើអាជីពជាគ្រូបង្រៀន ហើយកត្តាសំខាន់គឺពួកគាត់ចង់ចូលរួមនៅក្នុងការលើកកម្ពស់គុណភាពអប់រំ ហើយក៏បង្ហាញអំពីការខិតខំប្រឹងប្រែងនៃកំណែទម្រង់របស់ក្រសួងអប់រំ យុវជន និងកីឡា ក៏ដូចជាក្រសួងមុខងារសាធារណៈ និងរាជរដ្ឋាភិបាល ដែលបានខិតខំប្រឹងប្រែងក្នុងការយកចិត្តទុកដាក់ចំពោះការបំពេញការងាររបស់មន្រ្តីរាជការ ក៏ដូចជាគ្រូបង្រៀន។
បើតាមប្រសាសន៍របស់លោកជំទាវ ឃួន វិច្ឆិកា សម្រាប់ការប្រឡងឆ្នាំនេះ គឺដូចអ្វីដែលក្រសួងមុខងារសាធារណៈ បានអនុវត្តនៅក្នុងការប្រឡងគ្រូបង្រៀនកម្រិតអនុវិទ្យាល័យកន្លងមកនេះដែរ ពោលគឺការប្រឡងនឹងរៀបចំជាពីរដំណាក់កាល ដោយដំណាក់កាលទី១ ផ្ដោតលើវិញ្ញាសាសរសេរជាពហុចម្លើយ ដែលនឹងធ្វើការជម្រុះបេក្ខជនលើកទី១ ហើយមានតែបេក្ខជនដែលជាប់ក្នុងវិញ្ញាសាលើកទី១ប៉ុណ្ណោះ ទើបអាចបន្តទៅប្រឡងវិញ្ញាសាទី២ ដើម្បីជាប់ក្លាយជាគ្រូបង្រៀនកម្រិតបឋមសិក្សា។
បើតាម អ្នកនាំពាក្យក្រសួងអប់រំ សម្រាប់ធនធានគ្រូបង្រៀនបឋមសិក្សា ក្រសួងអប់រំ ជឿថា ការសហការគ្នាល្អរវាងក្រសួងអប់រំ និងក្រសួងមុខងារសាធារណៈ ក្នុងការដឹកនាំការប្រឡង ក៏ដូចជាកំណែទម្រង់សាលាគរុកោសល្យ ការកែលម្អទាំងហេដ្ឋារចនាសម្ព័ន្ធ គុណវុឌ្ឍិគ្រូបង្រៀន វិធីសាស្រ្តបង្រៀន កម្មវិធីបណ្ដុះបណ្ដាលនៅតាមសាលាគរុកោសល្យ និងធ្វើឱ្យគុណភាពនៃការអប់រំមានភាពល្អប្រសើរឡើង ដែលសង្ឃឹមថា ធនធានថ្មីនេះ នឹងក្លាយទៅជាធនធានដ៏សំខាន់ អាចចូលរួមបណ្ដុះបណ្ដាលសិស្សានុសិស្សឱ្យក្លាយជាសិស្សានុសិស្សនៅក្នុងសតវត្សទី២១ យ៉ាងពិតប្រាកដ។
គួរជម្រាបជូនថា បើតាមក្រសួងមុខងារសាធារណៈ គ្រូបង្រៀននៅបឋមសិក្សាដែលនឹងត្រូវជ្រើសរើសឱ្យចូលបម្រើការងារក្នុងក្របខណ្ឌគ្រូបង្រៀន នៃក្រសួងអប់រំ យុវជន និងកីឡា គឺមានចំនួន ១៣៤៧នាក់ ដោយក្នុងនោះ គ្រូបង្រៀនដែលត្រូវជ្រើសរើស តាមប្រព័ន្ធបណ្ដុះបណ្ដាល ១២+៤ ជំនាន់ទី៤ ចំនួន ៣០០នាក់ និងតាមប្រព័ន្ធបណ្ដុះបណ្ដាល ១២+២ ជំនាន់ទី៤០ ចំនួន ១០៤៧នាក់៕
