ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ធនាគារពិភពលោកកាលពីសប្តាហ៍មុន បានអនុម័តឥណទានតម្លៃ៤០លានដុល្លារអាមេរិក សម្រាប់គម្រោងកែលម្អការបណ្តុះបណ្តាលជំនាញ និងសេវាកម្មទីផ្សារការងារ ដោយគេរំពឹងថា គម្រោងមួយនេះនឹងផ្តល់អត្ថប្រយោជន៍ដល់ពលរដ្ឋកម្ពុជាប្រមាណជាង៣ម៉ឺន៣សែននាក់។
ក្នុងសេចក្តីប្រកាសព័ត៌មាន ធនាគារពិភពលោកបានលើកឡើងថា សេដ្ឋកិច្ច និងការងាររបស់កម្ពុជាមានការរីកចម្រើនយ៉ាងឆាប់រហ័សក្នុងប៉ុន្មានទសវត្សរ៍ចុងក្រោយនេះ ដោយសារស្ថិរភាពម៉ាក្រូសេដ្ឋកិច្ច ការបើកចំហពាណិជ្ជកម្ម និងភាពអនុគ្រោះសម្រាប់ចូលទីផ្សារលោកខាងលិច ដែលបានជួយប្រទេសនេះក្នុងការទាក់ទាញការវិនិយោគផ្ទាល់ពីក្រៅ។ ទោះជាយ៉ាងណាក៏ដោយ ធនាគារពិភពលោកមើលឃើញថា គុណភាពនៃការងារនៅតែមានកម្រិតទាប ក្នុងនោះ ៩៨%នៃការងារនៅក្នុងប្រទេសសុទ្ធតែជាការងារមានជំនាញទាប ហើយក្នុងនោះទៀត មួយផ្នែកធំគឺជាការងារក្រៅប្រព័ន្ធផ្លូវការ។
ជាមួយគ្នានេះ គម្រោង “ជំនាញសម្រាប់ទទួលបានការងារកាន់តែប្រសើរ” ដែលមានរយៈពេលប្រាំឆ្នាំ ត្រូវបានរៀបចំឡើងដើម្បីជួយកម្ពុជាធ្វើពិពិធកម្មសេដ្ឋកិច្ចរបស់ខ្លួននៅតាមវិស័យនានា ដែលទាមទារឱ្យមានជំនាញកម្រិតមធ្យមថែមទៀត។ គម្រោងនេះនឹងអនុវត្តដោយក្រសួងការងារ និងបណ្តុះបណ្តាលវិជ្ជាជីវៈ និងមូលនិធិអភិវឌ្ឍន៍ជំនាញ។
លោកស្រី ម៉ារីយ៉ាម សាលីម ប្រធានគ្រប់គ្រងនៃធនាគារពិភពលោកប្រចាំនៅកម្ពុជា មានប្រសាសន៍ថា នៅពេលកម្ពុជាខិតខំបោះជំហានឈានឡើងនៅក្នុងខ្សែចង្វាក់តម្លៃ និងធ្វើពិពិធកម្មផលិតកម្មរបស់ខ្លួន ការបង្កើនជំនាញកម្លាំងពលកម្មបច្ចុប្បន្ន និងនាពេលខាងមុខនឹងក្លាយជាកិច្ចការគន្លឹះមួយ សម្រាប់ទាក់ទាញការវិនិយោគផ្ទាល់ពីបរទេសកាន់តែច្រើន និងកាន់តែប្រសើរឡើង និងឆ្លើយតបបានកាន់តែល្អទៅនឹងតម្រូវការរបស់និយោជក។
លោកស្រីមានប្រសាសន៍ទៀតថា ការបណ្តុះបណ្តាលជំនាញបច្ចេកទេស ដែលឆ្លើយតបបានទៅនឹងតម្រូវការ បន្ថែមដោយការបណ្តុះបណ្តាលជំនាញ ដូចជា ជំនាញឌីជីថល និងជំនាញឥរិយាបទ ជាដើម អាចជួយប្រទេសកម្ពុជាក្នុងការឈានទៅសម្រេចគោលបំណងរបស់ខ្លួនបាន។
ឯកឧត្តម កត្តា អ៊ន មន្រ្តីជាន់ខ្ពស់ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍សាទរចំពោះការផ្តល់ឥណទានរបស់ធនាគារពិភពលោកនេះ ដោយថា ធនាគារពិភពលោកគឺជាដៃគូអភិវឌ្ឍរបស់ប្រទេសកម្ពុជារាប់ទសវត្សមកហើយ ដែលជួយទ្រទ្រង់ក្នុងការអភិវឌ្ឍសេដ្ឋកិច្ចកម្ពុជា ហើយថា ការផ្តល់ឥណទាន ៤០លានដុល្លាររបស់ធនាគារពិភពលោកនៅពេលនេះ ពិតជាបានចូលរួមចំណែកទាន់សភាពការណ៍ចំពោះការបណ្តុះបណ្តាលធនធានមនុស្ស មូលធនមនុស្សនៅកម្ពុជាពាក់ព័ន្ធនឹងជំនាញបច្ចេកទេស និងវិជ្ជាជីវៈ ហើយថា នេះក៏ជាការរួមចំណែកមួយបន្ថែមទៀតដើម្បីពង្រីកវិសាលភាព នៃការបណ្តុះបណ្តាលជំនាញនៅកម្ពុជាឱ្យកាន់តែទូលំទូលាយ។
មន្រ្តីជាន់ខ្ពស់ក្រសួងការងាររូបនេះបញ្ជាក់ថា កម្ពុជាបានវិវឌ្ឍមកដល់ដំណាក់កាលឧស្សាហកម្មទី៤ ដោយមានន័យថា ចាប់ពីពេលនេះតទៅ បណ្តារោងចក្រសហគ្រាសកម្រិតមធ្យម និងកម្រិតធ្ងន់ នឹងកើតមានព្រោងព្រាងនៅកម្ពុជា ហើយសហគ្រាសទាំងនោះនឹងត្រូវការអ្នកជំនាញ ដូច្នេះការបណ្តុះបណ្តាលជំនាញ គឺធ្វើយ៉ាងណាដើម្បីឆ្លើយតបទៅនឹងតម្រូវការទីផ្សារនៅកម្ពុជា ក៏ដូចជាការប្រកួតប្រជែងជាមួយបណ្តាប្រទេសជិតខាងក្នុងតំបន់ ក្នុងការអភិវឌ្ឍសេដ្ឋកិច្ចរបស់ខ្លួន៕
