ភេសជ្ជៈមានជាតិអាល់កុល ឬ​គ្រឿង​ស្រវឹងបង្កផលប៉ះពាល់ទៅកាន់មនុស្សកំពុងឈានទៅរកភាពពេញវ័យ ឬក៏មនុស្សពេញវ័យស្រាប់តែម្តង។ តាមរយៈ Kidshealth បានបង្ហាញថា ភេសជ្ជៈមានជាតិអាល់កុល បង្កប់ទៅដោយសារធាតុញៀន ដែលងាយក្នុងការពង្វក់ស្មារតីមនុស្សវ័យជំទង់ឱ្យសម្រេសចិត្តប្រើប្រាស់ ហើយប្រសិនបើក្មេងៗចាប់ផ្តើមសាកល្បងតាំងតែពីអាយុ១០ឆ្នាំ ឬ១១ឆ្នាំ ឬក៏មានវ័យក្មេងជាងនេះទៀតផង។

មានមនុស្សវ័យជំទង់មួយចំនួនទទួលបានសារទាក់ទងនឹងគ្រឿងស្រវឹងដោយភ័ន្តច្រឡំ ឬដោយមិនមានភាពត្រឹមត្រូវទៅកាន់ការសម្រេសចិត្តក្នុងការប្រើប្រាស់គ្រឿងស្រវឹង ដោយសារតែជារឿយៗ ពួកគេបានឃើញមនុស្សមានវ័យចំណាស់មិនថា អាណាព្យាបាល ឬតាមរយៈប្រព័ន្ធផ្សព្វផ្សាយ បានបង្ហាញឱ្យឃើញថា ភេសជ្ជៈមានជាតិអាល់កុល ឬគ្រឿងស្រវឹង គឺជាប្រភពនៃសុភមង្គល ដោយសារតែពេលជួបជុំគ្នាក្នុងកម្មវិធីសប្បាយៗតែងតែប្រើប្រាស់នូវគ្រឿងស្រវឹង។ ដែលរូបភាពទាំងនេះហើយ បានបណ្តុះនូវផ្នត់គំនិតឱ្យគេយល់ឃើញថា ស្រា ឬគ្រឿងស្រវឹង ជាចំណែកនៃភាពរីករាយ ខណៈវាបានបង្កនូវភាពផុយស្រួយដល់សុខភាព និងលើកស្ទួយឱ្យកុមារជ្រើសការប្រើប្រាស់ជាតិអាល់កុលមិនស្របនឹងកាលៈទេសៈ។ ទាំងនេះគឺការបញ្ជ្រាបសារមិនត្រឹមត្រូវសម្រាប់ក្មេង ឬមនុស្សមានវ័យជំទង់។

សម្រាប់មនុស្សវ័យជំទង់ ការជ្រើសប្រើគ្រឿងស្រវឹង ជាចំណែកក្នុងការបង្កឱ្យមានជំងឺធ្លាក់ទឹកចិត្ត ជំរុញឱ្យការគិតមានភាពយឺតយ៉ាវ ហើយសមត្ថភាពខួរក្បាលថយចុះ។ គ្រឿងស្រវឹងក្នុងករណីខ្លះវិញ ធ្វើឱ្យមនុស្សនិយាយនូវអ្វីដែលគេមិនបានតាំងចិត្ត ការគិតមានការផ្លាស់ប្តូរ មិនអាចរក្សាឥរិយាបថឱ្យមានតុល្យភាព ( ដូចជាដើរមិនត្រង់ផ្លូវ) បន្ទាប់ពីស្រវឹង បុគ្គលមួយចំនួយអាចមានអារ​ម្មណ៍សប្បាយរីករាយមួយភ្លែត ក្រោយមកក៏ស្រាប់តែយំ និងបង្កនូវជម្លោះជាដើម។

តើនឹងមានអ្វីកើតឡើងនៅពេលមនុស្សស្រវឹងខ្លាំង?

មនុស្សដែលមានបទពិសោធន៍ស្រវឹងជោគជាំ ពួកគេអាចនឹងនិយាយអ្វីដោយមិនដឹងខ្លួនស្រពេចស្រពិលគ្មានភាពច្បាស់លាល់ សម្តីឬទង្វើខ្លះបង្កភាពឈឺចាប់ទៅកាន់ខ្លួនឯង ឬក៏អ្នកដទៃក៏មាន ហើយគ្រោះថ្នាក់ដ៏ខ្លាំងនោះ គឺនៅពេលដែលពួកគេបើកបរតាមផ្លូវនានា។ មនុស្សដែលស្រវឹងខ្លាំង អាចមានអាការៈពិបាកក្នុងខ្លួន ហើយនិងពិបាកក្រោកពីដំណេកប្រកបដោយភាពស្រស់ស្រាយ រហូតដល់គ្មានកម្លំាងកំហែងក្នុងការបន្តការងារ នាថ្ងៃបន្ទាប់។

ការទទួលទានគ្រឿងស្រវឹងច្រើនពេក ក៏ជំរុញឱ្យរក្សានូវជាតិពុលទៅក្នុងខ្លួន រហូតដល់ថ្នាក់ប៉ះពាល់ទៅកាន់អាយុជីវិតទៀតផង។ ប៉ុន្តែនៅក្នុងស្ថានភាពខ្លះវិញ មិនបានផ្តល់ផលអវិជ្ជមានភ្លាមៗទេ ប៉ុន្តែយូរៗទៅប៉ះពាល់ដល់សុខភាព ក្នុងកម្រិតមួយដែលធ្ងន់ខ្លាំងរហូតពិបាកនឹងកែខៃ​លៃលកឡើងវិញ។

ការបដិសេធន៍

គឺជារឿងធម្មតានោះទេ ដែលក្មេងៗ ឬមនុស្សកំពុងឈានទៅរកភាពពេញវ័យ តែងមានទំនោរចង់ដឹង ចង់សាកចំពោះអ្វីថ្មីៗ ទន្ទឹមគ្នានោះបរិយាកាសល្បួងលួងលោមឱ្យទទួលទានគ្រឿងស្រវឹង គឺជាធ្នាក់ទាក់ចិត្តមនុស្សវ័យជំទង់មិនងាយនឹងជៀសរួច។ យ៉ាងណាមិញ សូមកុំជឿឱ្យសោះនៅពេលដែលមានមនុស្សមកប្រាប់អ្នកថា អ្នកមើលទៅគ្មានភាពជាមនុស្សធំទាល់តែសោះនៅពេលដែលមិនចេះផឹកស្រា! ឬក៏ផឹកទៅនឹងធ្វើឱ្យអ្នកមានភាពចាស់ទុំជាងមុនជាដើម។ សូមចាំថា មិត្តភាពពិតប្រាកដ មិនបោះបង់អ្នកចោល ដោយសារតែមិនចេះផឹកស្រានោះទេ៕