ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្របទៅនឹងយុទ្ធនាការ «ពន្លកបៃតង» បំផុសផ្នត់គំនិតស្រឡាញ់ដើមឈើ និងរួមគ្នាបង្កើននគម្របបៃតង ក្រសួងបរិស្ថានគ្រោងនឹងដាក់ឱ្យប្រើប្រាស់កម្មវិធីទូរស័ព្ទ (App) ដែលអាចឱ្យប្រជាពលរដ្ឋអាចតាមដានដើមឈើដែលខ្លួនបានដាំ។
ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន បានឱ្យដឹងថា ក្រសួងបានកំពុងធ្វើការអភិវឌ្ឍកម្មវិធីទូរស័ព្ទមួយ ដែលបងប្អូនប្រជាពលរដ្ឋ អាចតាមដានដើមឈើដែលខ្លួនបានដាំ ដាក់ឈ្មោះលើដើមឈើ ព្រមទាំងអាចពិភាក្សាគ្នាអំពីរបៀបនៃការថែទាំដើមឈើ ក៏ដូចជាធ្វើការវាយតម្លៃចំពោះដើមឈើដែលខ្លួន ឬអ្នកដទៃបានដាំនៅក្នុងកម្មវិធីទូរស័ព្ទនោះផងដែរ។
«ប្រជាពលរដ្ឋគាត់ដាំដើមឈើ គាត់អាចដាក់ឈ្មោះឱ្យដើមឈើគាត់… នៅក្នុង App ហ្នឹង ឆ្នាំក្រោយគាត់អាចឆែកមើលថា តើធំប៉ុណ្ណា… ហើយ App ហ្នឹង ក៏អាចពិភាក្សាគ្នាថា តើថែទាំដើមឈើរបៀបម៉េច? …»
ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន
រដ្ឋមន្រ្តីក្រសួងបរិស្ថាន មានប្រសាសន៍បន្ថែមថា ជារួមកម្មវិធីទូរស័ព្ទមួយនេះ ក៏អាចចាត់ទុកថា ជាបណ្តាញសង្គមមួយ សម្រាប់ការដាំដុះដើមឈើនៅក្នុងព្រះរាជាណាចក្រកម្ពុជា ក្នុងការជំរុញទាក់ទាញការចូលចិត្ត ការស្រឡាញ់ដើមឈើនៅក្នុងព្រះរាជាណាចក្រកម្ពុជាតែម្តង។
បើតាមប្រសាសន៍របស់ ឯកឧត្តម អ៊ាង សុផល្លែត កម្មវិធីទូរស័ព្ទ ដាំដើមឈើ នេះ គ្រោងនឹងដាក់ឱ្យដំណើរការក្នុងពេលឆាប់ៗនេះហើយ ខណៈបច្ចុប្បន្នក្រុមការងារបច្ចេកទេសកំពុងតែធ្វើតេស្តសាកល្បង។
ក្រៅពីការបង្កើត App សម្រាប់ប្រជាពលរដ្ឋដាំដើមឈើនេះ ក្រសួងបរិស្ថាន ក៏គ្រោងនឹងដាក់ឱ្យដំណើរការនូវប្រព័ន្ធ APP ជាកម្មវិធីទូរស័ព្ទដែលអាចឱ្យដឹងពីតំបន់អភិរក្សការពារធនធានធម្មជាតិ ដោយមិនគប្បីកាប់បំផ្លាញ ឬឈូសឆាយមក ធ្វើជាសកម្មភាពផ្ទាល់ខ្លួននោះជាដាច់ខាត។ ក្រៅពីនេះក្រសួងក៏គ្រោងនឹងទិញដ្រូន សម្រាប់ឱ្យមន្រ្តីឧទ្យានុរក្សប្រើប្រាស់ក្នុងដែនដីរបស់ខ្លួនសម្រាប់មើល ពីស្ថានភាពបទល្មើសនានាផងដែរ៕
