ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តំណាងអង្គការអន្តរជាតិខាងការងារ (ILO) បានលើកឡើងថា នៅក្នុងរបត់អាស៊ីអាគ្នេយ៍ មានប្រជាជនប្រមាណ ៦៤៦លាននាក់ , ក្នុងនោះប្រទេសកម្ពុជា ជាប្រទេសមួយក្នុងចំណោមប្រជាជាតិអាស៊ានដែលមានកម្លាំងប្រជាជនវ័យក្មេងយ៉ាងច្រើន ដែលមានន័យថា ប្រទេសកម្ពុជានៅមានកម្លាំងយុវជនច្រើនក្នុងការទាក់ទាញវិនិយោគទុនបរទេស។ តែយ៉ាងណា តំណាង ILO ថា កម្ពុជាត្រូវការការបណ្តុះបណ្តាលជំនាញបច្ចេកទេសបន្ថែមទៀត ដើម្បីឆ្លើយតបនឹងការប្រកួតប្រជែងក្នុងទីផ្សារការងារដែលកំពុងមានការផ្លាស់ប្តូរយ៉ាងលឿន។
ក្នុងឱកាសចូលរួមពិព័រណ៌ការងារ និងមគ្គទេស៍អាជីព នៅអគារ KAMPUS នាព្រឹកថ្ងៃទី៩ ខែឧសភា លោក គួយ គីមរើន អ្នកសម្របសម្រួលគម្រោងជាតិ អង្គការអន្តរជាតិខាងការងារ (ILO) មានប្រសាសន៍ថា របាយការណ៍ ILO បានឱ្យដឹងថា ស្ថានភាពការងារជាសកលក្នុងឆ្នាំ២០២៣ គឺមានភាពល្អប្រសើរជាទូទៅ ដោយអត្រាគ្មានការងារធ្វើបានថយចុះពី ៥,៣ភាគរយនៅឆ្នាំ២០២២ មកនៅត្រឹម ៥,១ភាគរយនៅឆ្នាំ២០២៣។ លោកបន្តថា បើយើងមើលទៅលើតួលេខនេះ គឺនៅមិនទាន់មានភាពវិជ្ជមានទាំងស្រុងនៅឡើយទេ នៅពេលដែលយើងគិតអំពីគុណភាព នៃការងារ ដែលពិភពនៃការងារកំពុងតែមានភាពផ្លាស់ប្តូរយ៉ាងឆាប់រហ័ស ដោយវិវឌ្ឍទៅតាមការបម្រែបម្រួលអាកាសធាតុ បច្ចេកវិទ្យា ក៏ដូចជាប្រជាសាស្រ្តជាដើម ហើយការផ្លាស់ប្តូរទាំងអស់នេះ បានបង្កើតនូវគម្លាតជំនាញ ភាពមិនស៊ីគ្នានៃជំនាញ កង្វះខាតជំនាញ ដែលបណ្តាលឱ្យការងារខ្លះនៅមិនទាន់អាចបំពេញបាន។
បើតាមអ្នកតំណាងអង្គការអន្តរជាតិខាងការងាររូបនេះថា ការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) គឺពិតជាមានសារៈសំខាន់ណាស់ក្នុងការកែសម្រួលរចនាសម្ព័ន្ធសេដ្ឋកិច្ច នៅពេលដែលនិន្នាការផ្លាស់ប្តូរពីការពឹងផ្អែកទៅលើពលកម្មកសិកម្ម ទៅជាឧស្សាហកម្ម និងសេវាកម្ម គឺបុគ្គលិក និងក្រុមហ៊ុន ត្រូវការរៀនសូត្រនូវបច្ចេកទេសថ្មីៗ សហគ្រិនភាព ក៏ដូចជាជំនាញសង្គមបន្ថែមទៀត។
“ការវិនិយោគទៅលើការងារផលិតភាព និងជំនាញ រួមទាំងជំនាញបៃតង ជំនាញឌីជីថល ជួយអភិវឌ្ឍសេដ្ឋកិច្ចឆ្ពោះទៅរកកំណើនប្រកបដោយថាមពល”
លោក គួយ គីមរើន អ្នកសម្របសម្រួលគម្រោងជាតិ អង្គការអន្តរជាតិខាងការងារ (ILO)
ជាមួយគ្នានេះ លោក គួយ គីមរើន ក៏បានលើកទឹកចិត្តទៅដល់យុវជនទាញយកប្រយោជន៍នៅក្នុងឱកាសពិព័រណ៌ការងារ និងមគ្គទេស៍អាជីព ដើម្បីបន្តអភិវឌ្ឍជំនាញ ក៏ដូចជាចំណេះដឹងបន្ថែមទៀត ហើយលោកជឿថា មនុស្សគ្រប់រូបត្រូវការការអប់រំបណ្តុះបណ្តាលបច្ចេកទេស វិជ្ជាជីវៈ ប្រកបដោយគុណភាព ដែលស្របទៅនឹងសេចក្តីប្រាថ្នា និងទេពកោសល្យរបស់ខ្លួន៕
