ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម WE Forum បានឱ្យដឹងថា មនុស្សយើងកំពុងរស់នៅក្នុងសង្គមមួយ ដែលស្ថានភាពសុខភាពប្រជាជនកាន់តែខ្សោយទៅៗពីមួយថ្ងៃទៅមួយថ្ងៃ។ បច្ចុប្បន្ន ៧០ភាគរយនៃអ្នកស្លាប់នៅទូទាំងពិភពលោក គឺបណ្ដាលមកពីឥរិយាបថរស់នៅចម្បងចំនួន ៤ សំខាន់ៗ ដូចជា ភាពអសកម្មនៃរាងកាយ របបអាហារមិនល្អ ការប្រើប្រាស់គ្រឿងស្រវឹងលើសកម្រិត និងការជក់បារី។ កត្តានេះ កំពុងមានឥទ្ធិពលយ៉ាងខ្លាំងមកលើសុខភាពសង្គម និងបង្កើនសម្ពាធលើប្រព័ន្ធសុខាភិបាល។
ការស្រាវជ្រាវបានរកឃើញថា បុគ្គលដែលបានផ្លាស់ប្ដូរអាកប្បកិរិយារស់នៅតាមរបៀបវិជ្ជមាន ដោយមានទម្លាប់ហាត់ប្រាណក្នុងកម្រិតមធ្យមជាប់ជាប្រចាំ អាចកាត់បន្ថយហានិភ័យនៃការស្លាប់ ដោយសារមូលហេតុទូទៅបានក្នុងអត្រា ២៧ភាគរយ។ សម្រាប់មនុស្សចាស់ គឺទទួលបានអត្ថប្រយោជន៍ច្រើនជាងនេះទៅទៀត ៖ ចំពោះមនុស្សដែលមានអាយុពី ៤៥ ទៅ ៦៤ ឆ្នាំ ដែលមានទម្លាប់ហាត់ប្រាណជាប់ជាប្រចាំរយៈពេល ៣ឆ្នាំ អាចកាត់បន្ថយហានិភ័យនៃការស្លាប់បាន ៣៨ភាគរយ។ ខណៈ អ្នកមានអាយុចាប់ពី ៦៥ឆ្នាំឡើងទៅ ការកាត់បន្ថយនេះអាចកើនឡើងរហូតដល់ ៥២ភាគរយ។ ដូច្នេះ មានន័យថា ទម្លាប់ និងរបៀបរស់នៅវិជ្ជមាន ពិតជាសំខាន់ខ្លាំងណាស់សម្រាប់មនុស្សចាស់។
ទន្ទឹមនឹងនេះ អ្នកដែលដើរបាន ៧,៥០០ ជំហាន ចំនួន ៥ដងក្នុងមួយសប្ដាហ៍ រយៈពេល២ឆ្នាំជាប់គ្នា អាចកាត់បន្ថយជំងឺទឹកនោមផ្អែមប្រភេទទី២ បានចំនួន ៤១ភាគរយ និងហានិភ័យនៃជំងឺមហារីកដំណាក់កាលទី៤ ចំនួន ៣៦ ភាគរយ។
ការរកឃើញទាំងនេះ គឺជាភស្ដុតាង ដែលបង្ហាញពីអនុភាពនៃទម្លាប់វិជ្ជមាន ហើយការទទួលបានសុខភាពល្អ មិនចាំបាច់មានការចំណាយប្រាក់ច្រើននោះទេ។ ប៉ុន្តែយើងត្រូវចាប់ផ្ដើមពីសកម្មភាពតូចៗ ហើយផ្លាស់ប្ដូរអាកប្បកិរិយារស់នៅ៕
