ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងចំណោមជ័យលាភីសិស្សពូកែទូទាំងប្រទេសចំនួន ៣០រូប យុវសិស្ស ពៅ ជុំរតនៈ ជាបេក្ខជនមួយរូបដែលជាប់ជ័យលាភីចំណត់ថ្នាក់លេខ១ ក្នុងការប្រឡងសិស្សពូកែទូទាំងប្រទេស ផ្នែករូបវិទ្យា ថ្នាក់ទី១២។ ការប្រឡងសិស្សពូកែនេះ ក៏ជាឱកាសមួយដែលជំរុញឱ្យយុវសិស្សរូបនេះរកឃើញក្ដីស្រមៃចង់ក្លាយជាវិស្វករនៅថ្ងៃអនាគត។
យុវសិស្ស ពៅ ជុំរតនៈ ជាសិស្សថ្នាក់ទី១២ នៃសាលាអន្តរជាតិស្មាធឃីដ ខេត្តសៀមរាប បានប្រាប់ឱ្យដឹងថា រូបគេសម្រេចចិត្តចូលរួមប្រឡងសិស្សពូកែទូទាំងប្រទេសថ្នាក់ទី១២ ដោយសារការស្រឡាញ់មុខវិជ្ជារូបវិទ្យា និងចង់វាស់ស្ទង់សមត្ថភាពរបស់ខ្លួនក្នុងការប្រឡងលំហាត់សិស្សពូកែទូទាំងប្រទេស ផ្នែករូបវិទ្យា ថ្នាក់ទី១២។ រតនៈ បន្តថា តាមរយៈការប្រឡងសិស្សពូកែនេះ ធ្វើឱ្យគេស្គាល់ពីក្ដីស្រមៃចង់ធ្វើជាវិស្វករ ដែលជាអាទិភាពក្នុងការដាក់ពាក្យចូលរៀននៅសាកលវិទ្យាល័យណាមួយ។
សិស្សពូកែរូបវិទ្យា រូបនេះ បន្ថែមថា នៅក្នុងការប្រឡងសិស្សពូកែទូទាំងប្រទេស ផ្នែករូបវិទ្យា ថ្នាក់ទី១២ រូបគេរំពឹងថា នឹងអាចជាប់ជ័យលាភីណាមួយ ប៉ុន្តែមិនរំពឹងថាជាប់ចំណាត់ថ្នាក់លេខ១ នោះទេ។ ប៉ុន្តែនៅពេលគណៈកម្មការប្រកាសលទ្ធផល ក៏បានឮឈ្មោះរបស់ខ្លួនជាប់ជ័យលាភីលេខ១ ពេលនោះ រូបគេគឺពិតជាមានអារម្មណ៍ត្រេកអរ និងសប្បាយចិត្តជាខ្លាំង។
ទាក់ទងនឹងវិធីសាស្រ្តរៀនឱ្យទទួលបានលទ្ធផលល្អវិញ រតនៈ ប្រាប់ថា រូបគេតែងតែស្វ័យសិក្សាជាប្រចាំឱ្យតែមានពេលទំនេរ គឺរៀនមេរៀនទាំងអស់ពីថ្នាក់ទី៧ ដល់ថ្នាក់ទី១២ ពោលគឺរៀនគ្រប់មុខវិជ្ជា រៀនឱ្យលើសគេ, ប្រសិនមិនចេះ ឬមិនច្បាស់ផ្នែកណាមួយ រូបគេតែងខំស្រាវជ្រាវបន្ថែម ជាពិសេសស្រាវជ្រាវលំហាត់បរទេស។
យុវសិស្សជាអ្នកខេត្តសៀមរាបរូបនេះ បន្ថែមថា ក្នុងមួយថ្ងៃៗរូបគេរៀនមុខវិជ្ជារូបវិទ្យា ១ទៅ២ម៉ោង ហើយពេលជិតដល់ថ្ងៃប្រឡង គឺគេបានបន្ថែមការរៀនចាប់ពី៦ម៉ោងឡើងទៅ។ សម្រាប់សិស្សានុសិស្សដទៃទៀតដែលចង់ប្រឡងសិស្សពូកែ រតនៈ លើកទឹកចិត្តឱ្យខំរៀនពីដើមឆ្នាំ រៀនធ្វើលំហាត់ឱ្យបានច្រើន ហើយមុនធ្វើលំហាត់ ត្រូវរៀនមេរៀនឱ្យច្បាស់ជាមុនសិន។
យុវសិស្សវ័យ១៧ឆ្នាំរូបនេះ បន្ថែមទៀតថា កាលពីឆ្នាំ២០២២ រូបគេធ្លាប់ចូលរួមប្រឡងសិស្សពូកែរូបវិទ្យាថ្នាក់ទី៩ ដោយពេលនោះ ក៏ទទួលបានជ័យលាភីមេដាយប្រាក់ដែរ ហើយនៅឆ្នាំ២០២៣ រូបគេក៏មានឱកាសទៅទស្សនកិច្ចសិក្សានៅប្រទេសជប៉ុនក្នុងកម្មវិធីមួយឈ្មោះថា Sakura Science រួចនៅឆ្នាំ២០២៤ ក៏មានឱកាសទៅប្រកួតប្រជែងរូបវិទ្យាអូឡាំពិច IPhO នៅប្រទេសអ៉ីរ៉ង់ថែមទៀត។ រតនៈ បន្តថា ការប្រឡងសិស្សពូកែ ពិតជាសំខាន់ណាស់សម្រាប់រូបគេ ព្រោះបានផ្ដល់ឱកាសឱ្យរូបគេ មើលឃើញពិភពលោកកាន់តែធំជាងមុន មានឱកាសទស្សកិច្ចសិក្សានៅក្រៅប្រទេស និងចូលរួមប្រកួតកម្រិតថ្នាក់អន្តរជាតិ។
ម្ចាស់ជ័យលាភីលេខ១ សិស្សពូកែទូទាំងប្រទេស ផ្នែករូបវិទ្យា ក៏បានថ្លែងអំណរគុណដល់លោកគ្រូ អ្នកគ្រូ ដែលបានបង្រៀនរូបគេតាំងពីថ្នាក់តូច រហូតដល់ថ្នាក់ទី១២ អរគុណនាយកសាលាដែលបានជួយសម្របសម្រួលការប្រឡងសិស្សពូកែ និងអរគុណក្រុមគ្រួសារដែលតែងតែជំរុញទឹកចិត្ត ផ្ដល់ឱកាសរៀនសូត្រ ក៏ដូចជាផ្គត់ផ្គង់ដល់ការសិក្សា។ សម្រាប់ជំហានបន្ទាប់ រតនៈ នឹងខិតខំប្រឹងប្រែងរៀនសូត្របន្ថែមទៀត ក្នុងការប្រឡងបាក់ឌុប ឱ្យទទួលបាននិទ្ទេសល្អ។
ជារៀងរាល់ឆ្នាំ ក្រសួងអប់រំ យុវជន និងកីឡា តែងរៀបចំការប្រឡងជ្រើសរើសសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ដើម្បីផ្តល់ជាឱកាសលើកទឹកចិត្តសម្រាប់សិស្សឆ្នើមដែលពោរពេញដោយសមត្ថភាព ទេពកោសល្យ និងសក្តានុពល បានបញ្ចេញសមត្ថភាព និងក៏បានទទួលការលើកទឹកចិត្តពីរាជរដ្ឋាភិបាល ដូចជានៅក្នុងឆ្នាំនេះ សម្រាប់ជ័យលាភីសិស្សពូកែទូទាំងប្រទេស ចំណាត់ថ្នាក់លេខ១ ទទួលបានរង្វាន់លើកទឹកចិត្តពីរាជរដ្ឋាភិបាល ចំនួន ៣លាន៥សេនរៀល, មេដាយមាសមួយគ្រឿង, វិញ្ញាបនបត្របញ្ជាក់សិស្សពូកែទូទាំងប្រទេសមួយច្បាប់ និងអាហារូបករណ៍ក្នុងតម្លៃ១០០% រយៈពេល ៤ឆ្នាំ ពីសាកលវិទ្យាល័យអន្តរជាតិ ផារ៉ាហ្គន និងសាកលវិទ្យាល័យអាមេរិកាំងភ្នំពេញ (AUPP) ជាដើម៕
