កុមារី ហុង ស៊ីដាណា ជាសិស្សថ្នាក់ទី៩ មកពីអនុវិទ្យាល័យ សំប៉ាន ខេត្តកណ្ដាល បានជាប់ជ័យលាភីលេខ១ លើសិស្ស ២ម៉ឺន៣ពាន់នាក់ ដែលបានឆ្លើយសំណួរសរុប ២៧ ៨៦៧ ច្រើនជាងគេក្នុងកម្មវិធីស្វ័យសិក្សាសន្លឹកកិច្ចការ ហៅថា GEIP EDTech។

មុនដើមឆ្នាំសិក្សាថ្មីនេះ កុមារី ហុង ស៊ីដាណា បានធ្វើសន្លឹកកិច្ចការក្នុង អេប GEIP EDTech ចាប់ពីថ្នាក់ទី៧ ដល់ថ្នាក់ទី១២ ចំនួន ៣០,៨៦៧សំណួរ និងសំណួរដែលឆ្លើយត្រូវមាន ២១,២៨២សំណួរ។ ហើយសម្រាប់មុខវិជ្ជាដែលខ្លាំងបំផុត រួមមាន អង់គ្លេស, គណិតវិទ្យា និងសីលធម៌-ពលរដ្ឋ។

អេប GEIP EdTech ជាកម្មវិធីទូរសព្ទដៃសម្រាប់សិស្សអាចស្វ័យសិក្សា ពីថ្នាក់ទី៣ ដល់ទី១២ដោយប្រើប្រាស់សន្លឹកកិច្ចការ និងការប្រឡងសំណួរតេស្តដើម្បីជាជំនួយជួយដល់ការបង្រៀន និងការរៀនតាមរយៈវេទិកាឌីជីថល ដោយមានមុខងារសំខាន់ៗជាច្រើនអាចជួយដល់សិស្សានុសិស្សចាប់អារម្មណ៍ក្នុងការរៀនសូត្រ។ បច្ចុប្បន្នមានសិស្សានុសិស្សប្រើ និងធ្វើតេស្តចំនួន៤មុឺននាក់។

កុមារី ហុង ស៊ីដាណា និយាយថា រូបនាងបានស្គាល់ អេប GEIP EDTech នេះ ដោយសារមានលោកគ្រូ និងអ្នកគ្រូនៅឯសាលារៀនបានចែករំលែកអំពីកម្មវិធីនេះមកកាន់សិស្សទាំងអស់គ្នា ដើម្បីឱ្យសិស្សានុសិស្សធ្វើស្វ័យសិក្សារៀនដោយខ្លួនឯងបន្ថែម។ ស៊ីដាណា បន្តថា អេប GEIP EDTech នេះ បានជួយពង្រឹងការសិក្សារបស់ខ្លួនបានមួយកម្រិតទៀត ព្រោះសន្លឹកកិច្ចការកម្រិតជាតិនៅក្នុងអេបនេះ គឺដូចទៅនឹងឯកសារស្វ័យសិក្សា ឬសន្លឹកកិច្ចការដែលលោកគ្រូ អ្នកគ្រូបានដាក់ឱ្យសិស្សធ្វើដែរ។

“ក្នុងការធ្វើសន្លឹកកិច្ចការក្នុងកម្មវិធី GEIP EDTech បានធ្វើឱ្យខ្ញុំចេះធ្វើសន្លឹកកិច្ចការ និងស្វ័យសិក្សាដោយខ្លួនឯង ឬជាមួយមិត្តភក្ដិឱ្យបានមុនគ្រូ មានន័យថា អាចរៀនដោយខ្លួនឯងមុនកម្មវិធីសិក្សា”

សិស្សវ័យ១៤ឆ្នាំ រូបនេះ បញ្ជាក់បន្ថែមថា កត្តាដែលធ្វើឱ្យរូបនាងទទួលបានពិន្ទុច្រើនក្នុងការប្រើប្រាស់ អេប GEIP EDTech នេះ គឺដោយសារការព្យាយាមធ្វើសន្លឹកកិច្ចការក្នុងកម្រិតថ្នាក់របស់ខ្លួនឱ្យចប់អស់សិន ទើបបន្តចូលរួមប្រកួតសន្លឹកកិច្ចការជាមួយមិត្តភក្តិ និងសិស្សានុស្សដទៃទៀត។ កុមារី ស៊ីដាណា បន្តថា រាល់ការចូលធ្វើសន្លឹកកិច្ចការ សម្រាប់មុខវិជ្ជាគណិតវិទ្យា ដែលជាមុខវិជ្ជាមានលំហាត់ គឺត្រូវប្រើពេលឱ្យបានខ្លីបំផុត ដើម្បីគណនារកចម្លើយដែលត្រូវ ចំណែក​មុខវិជ្ជាផ្សេងទៀត ដូចជា ភាសាខ្មែរ ភូមិវិទ្យា ពលរដ្ឋ និងប្រវត្តិវិទ្យា ជាមុខវិជ្ជាមានសំណួរនិងចម្លើយសម្រាប់ជ្រើសរើស ដូចនេះ ដើម្បីឆ្លើយសំណួរទាំងនោះ គឺត្រូវរកចម្លើយនៅក្នុងសៀវភៅសិក្សាគោល។

លោក លី យ៉ានី នាយក នៃអនុវិទ្យាល័យ សំប៉ាន មានប្រសាសន៍ថា សម្រាប់ការសិក្សារបស់សិស្ស ហុង ស៊ីដាណា នៅពេលចាប់ផ្ដើមប្រើ អេប GEIP EDTech នេះ លោកសង្កេតឃើញថា គាត់យកចិត្តទុកដាក់រៀនខ្លាំង ហើយធ្វើឱ្យទទួលបាននិទ្ទេស A ក្នុងលទ្ធផលចុងឆ្នាំសិក្សា។ លោក លី យ៉ានី បន្តថា សិស្ស ហុង ស៊ីដាណា ប្រើអេប GEIP EDTech នេះ តែពេលនៅផ្ទះសម្រាប់ស្វ័យសិក្សាប៉ុណ្ណោះ ប៉ុន្តែពេលរៀនក្នុងថ្នាក់ គឺរៀនជាមួយគ្រូធម្មតា។

“ក្នុងនាមជានាយកសាលាខ្ញុំមានមោទនភាពខ្លាំងមែនទែន ដោយឃើញថាសិស្សដែលចូលទៅប្រើ GEIP EDTech នេះ មានរហូតដល់រាប់ម៉ឺននាក់ ហើយអ្វីដែលអស្ចារ្យបំផុត គឺបានបង្ហាញពីលទ្ធផលដែលសិស្សជាប់ជ័យលាភីលេខ១ អាចមានសមត្ថភាពធ្វើលំហាត់ទៅដល់ថ្នាក់ទី១២”

លោក រ័ត្ន សំណាងវិសុទ្ធិពង្ស អ្នកសរសេរអេប GEIP EdTech របស់មហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ យល់ថា អេប GEIP EdTech បានដើរតួយ៉ាងសំខាន់ក្នុងការជួយឱ្យសិស្សានុសិស្សចេះស្វ័យសិក្សារៀនសូត្រ ដែលពួកគេអាចមានពេលវេលារៀនសូត្របន្ថែមបានលឿនរហ័សគ្រប់ពេលវេលាគ្រប់ទីកន្លែង។

លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ មានប្រសាសន៍ថា អេប GEIP EDTech នេះ ជាវិធីមួយដើម្បីជួយរំលេចសមត្ថភាពសិស្ស។ ប្រសិនបើធ្វើតេស្តកម្រិត PISA បានពិន្ទុល្អទៀត សិស្សរូបនេះ ជាសិស្សមានទេពកោសល្យដែលអាចនឹងមានសមត្ថភាពខ្ពស់។

គួរជម្រាបជូនថា App GEIP EDTech ត្រូវ​បាន​ង្កើតឡើង និងដាក់ដោយប្រើប្រាស់សាកល្បងនៅក្នុង​ឆ្នាំ២០២៤នេះ ដោយមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ និងមានការចូលរួមប្រឹក្សាយោបល់ពីក្រុមការងារ GEIP, PED និង EQUID ដើម្បីធានានូវគុណភាពនៃសំណួរតេស្ត ការគ្រប់គ្រងទិន្នន័យដ៏រឹងមាំ និងស្ថេរភាពនៃប្រព័ន្ធបច្ចេកវិទ្យាទំនើប៕