ការរុកកួនឆាឆៅតាមអនឡាញ ឬភាសាអង់គ្លេសហៅថា Cyberbullying សំដៅដល់ការប្រើប្រាស់បច្ចេកវិទ្យា ដូចជា បណ្តាញទំនាក់ទំនងសង្គម កម្មវិធីផ្ញើសារ ឬវេទិកាអនឡាញ មានគោលបំណងយាយី បំភិតបំភ័យ ឬធ្វើបាបបុគ្គលផ្សេងទៀត ។ វាកើតឡើងនៅពេលដែលនរណាម្នាក់ធ្វើសកម្មភាពដូចខាងលើម្តងហើយម្តងទៀតដោយចេតនា តាមរយៈការផ្ញើសារដែលបង្កគ្រោះថ្នាក់ ឬបំពាន ។ ការរុកកួនឆាឆៅតាមអនឡាញអាចបង្កផលប៉ះពាល់ដល់អារម្មណ៍ និងផ្លូវចិត្តធ្ងន់ធ្ងរលើកុមារ ។ បើតាមអង្គការ APLE Cambodia ដើម្បីការពារកូនៗពីការរុកកួនឆាឆៅតាមអនឡាញ មាតាបិតា ឬអ្នកអាណាព្យាបាល គួរអនុវត្តវិធានការ ៥ចំណុចសំខាន់ៗ ដូចខាងក្រោម ។

១. រក្សាទំនាក់ទំនងបើកចំហរជាមួយកូន ៖ ម្តាយឪពុកត្រូវរក្សាទំនាក់ទំនងបើកចំហរជាមួយកូន លើកទឹកចិត្តឱ្យពួកគេនិយាយជាមួយអ្នកអំពីបទពិសោធន៍លើអ៊ីនធឺណិតរបស់ពួកគេ រួមទាំងករណីនៃការរុកកួនឆាឆៅតាមអនឡាញ ឬការយាយីដែលពួកគេអាចជួបប្រទះ ។

២. ប្រាប់កូនឱ្យដឹងពីសកម្មភាពរុកកួនឆាឆៅតាមអនឡាញ និងផលប៉ះពាល់ ៖ បង្រៀនកូនរបស់អ្នកអំពីការរុកកួនឆាឆៅតាមអនឡាញ និងផលប៉ះពាល់របស់វា ។ ទន្ទឹមគ្នានេះ ជួយពន្យល់ពួកគេឱ្យយល់អំពីភាពខុសគ្នារវាងអាកប្បកិរិយាសមរម្យតាមអនឡាញ និងសកម្មភាពបង្កគ្រោះថ្នាក់ ហើយត្រូវប្រាកដថា ពួកគេដឹងថា ការរុកកួនឆាឆៅតាមអនឡាញ មិនអាចទទួលយកបានទេ ។

៣. អប់រំកូនឱ្យប្រើអ៊ីនធឺណិតប្រកបដោយការទទួលខុសត្រូវ ៖ ម្តាយឪពុកសម័យទំនើបត្រូវបំពេញភារកិច្ចអប់រំកូនពីការប្រើប្រាស់អ៊ីនធឺណិតប្រកបដោយការទទួលខុសត្រូវ ។ បង្រៀនពួកគេអំពីការកំណត់ឯកជនភាព សារៈសំខាន់នៃការការពារព័ត៌មានផ្ទាល់ខ្លួន របៀបរាយការណ៍ និងវិធីទប់ស្កាត់បុគ្គលដែលចូលរួមក្នុងការរុកកួនឆាឆៅតាមអនឡាញ ។ ជាមួយគ្នានេះ ត្រូវបង្ហាញពួកគេឱ្យយល់អំពីឥទ្ធិពលនៃពាក្យសម្ដី និងសកម្មភាពរបស់ពួកគេនៅលើអនឡាញ និងផលវិបាកដែលអាចកើតមានចំពោះអ្នកដទៃ ។

៤. បង្រៀនកូនពីរបៀបរាយការណ៍ព័ត៌មាន ៖ ម្តាយឪពុកត្រូវប្រាកដថាកូនរបស់អ្នកដឹងពីរបៀបរាយការណ៍ពីឧប្បត្តិហេតុនៃការរុកកួនឆាឆៅតាមអនឡាញ ។ លើកទឹកចិត្តពួកគេឱ្យរាយការណ៍អំពីអាកប្បកិរិយាបំពានណាមួយដែលបានកើតឡើង ។ លើសពីនេះ សូមគាំទ្រកូនរបស់អ្នកក្នុងការពិភាក្សាអំពីបទពិសោធន៍របស់ពួកគេដោយមិនខ្លាចការវិនិច្ឆ័យ។ លើកទឹកចិត្តពួកគេឱ្យស្វែងរកជំនួយពីមនុស្សពេញវ័យដែលគួរឱ្យទុកចិត្ត ប្រសិនបើពួកគេកំពុងត្រូវបានរុកកួនឆាឆៅតាមអនឡាញ ឬប្រសិនបើពួកគេឃើញអ្នកដទៃត្រូវបានគេគំរាមកំហែង ។

៥. សារៈសំខាន់នៃការការពារព័ត៌មានផ្ទាល់ខ្លួន ៖ ម្តាយឪពុកត្រូវបង្រៀនកូនអំពីសារៈសំខាន់នៃការការពារព័ត៌មានផ្ទាល់ខ្លួនរបស់ពួកគេ និងចៀសវាងការចែករំលែកពាក្យសម្ងាត់ ឬព័ត៌មានផ្ទាល់ខ្លួនជាមួយនរណាម្នាក់ដែលពួកគេមិនទុកចិត្ត ។ លើកទឹកចិត្តកូនឱ្យចូលរួមសកម្មភាពដោយផ្ទាល់ (ក្រៅអនឡាញ) ដែលលើកកម្ពស់សុខុមាលភាពរបស់ពួកគេ។ ពិសេសជាងនេះ សូមជួយកូនឱ្យស្វែងរកតុល្យភាពរវាងការប្រើប្រាស់បច្ចេកវិទ្យា និងទិដ្ឋភាពផ្សេងទៀតនៃជីវិតរបស់ពួកគេ៕