បន្ទាប់ពីឆ្លងកាត់ការប្រកួតជាច្រើនវគ្គ ទីបំផុតទៅ​ គេបានរកឃើញម្ចាស់ជ័យលាភីលេខ១ ក្នុងកម្មវិធីជជែកដេញដោលយុវជនថ្នាក់ជាតិ ឆ្នាំ២០២៥ ដោយ​បានទៅលើក្រុមបេក្ខជនក្រុម​បដិសេធ មកពីវិទ្យាល័យពោធិ៍សាត់ ខេត្តពោធិ៍សាត់។

យុវសិស្ស ឃូ រិទ្ធីវ៉ាន់ សិស្សថ្នាក់ទី១១ នៃវិទ្យាល័យពោធិ៍សាត់ និងជាតំណាងក្រុមជ័យលាភី បានបង្ហាញអារម្មណ៍រំភើប និងរីករាយជាខ្លាំង នៅពេលគណៈកម្មការប្រកាសលទ្ធផលថា ក្រុមរបស់ខ្លួនជាប់ជ័យលាភីលេខ១ ហើយថា ជ័យលាភីមួយនេះ គឺបានមកពីសមត្ថភាព និង​ការព្យាយាម។

សម្រាប់ការ​ឈ្នះជ័យលាភីលេខ១ប្រចាំប្រទេសនេះ រិទ្ធីវ៉ាន់ ក៏បានអរគុណដល់ក្រុមគ្រួសារដែលបានផ្តល់​ឱកាសឱ្យរូបគេ បានចូលរួមប្រកួតក្នុងកម្មវិធីដ៏អស្ចារ្យមួយនេះ ហើយក៏អរគុណដល់អ្នករៀបចំកម្មវិធី គឺអគ្គនាយកដ្ឋានយុវជន នៃក្រសួងអប់រំ យុវជន និងកីឡា ដែលបានបង្កើតកម្មវិធីនេះឡើង ធ្វើឱ្យពួកគេបានចូលរួម និងទទួលបានបទពិសោធន៍ដ៏មានតម្លៃសម្រាប់ប្រើប្រាស់ក្នុងជីវិត។ យុវសិស្ស ឃូ រិទ្ធីវ៉ាន់ ក៏មិនភ្លេចអរគុណដល់អភិបាលខេត្តពោធិ៍សាត់ ដែលតែងលើកទឹកចិត្ត ផ្ដល់ដំបូន្មានល្អៗ និងផ្ដល់ថវិកា សម្រាប់ចូលរួមប្រកួតក្នុងកម្មវិធីនេះតាំងពីដើមរហូតទទួលបានជ័យលាភី។ “ជាពិសេស អរគុណដល់មិត្តភក្ដិ ដែលបានគាំទ្រ ផ្ដល់កម្លាំងចិត្ត គាំទ្រទាំងខាងក្រៅផង និងតាមប្រព័ន្ធអនឡាញផង“។

យុវសិស្ស ឃូ រិទ្ធីវ៉ាន់ ក៏បានលើកទឹកចិត្តប្អូនៗសិស្សានុសិស្សដទៃទៀត ប្រសិនបើមានឱកាស គួរចូលរួមប្រកួតក្នុងកម្មវិធីនេះ ដោយ​វា​មិនត្រឹមតែពង្រឹងភាពក្លាហានប៉ុណ្ណោះទេ​ ប៉ុន្តែក៏ផ្ដល់នូវបទពិសោធន៍ថ្មីៗជាបំណិនសតវត្សទី២១ ជាច្រើន។

យុវតី យ៉ុក ស៊ីវម៉ី ជាសិស្សថ្នាក់ទី១១ នៃវិទ្យាល័យពោធិ៍សាត់ ជាសមាជិកក្រុមបានលើកឡើងថា ការខិតខំប្រឹងប្រែងរបស់ក្រុមរយៈពេល៨ខែមកនេះ ពិតជាធ្វើឱ្យក្រុមទទួលបានលទ្ធផលល្អដូចអ្វីដែលធ្លាប់ប៉ងប្រាថ្នា។ ស៊ីវម៉ី បន្តថា កម្មវិធីប្រកួតជជែកដេញដោលយុវជនថ្នាក់ជាតិ មិន​មែន​ត្រឹមតែជាការប្រកួត តែក៏ផ្តល់ចំណេះដឹងជាច្រើន ជួយក្នុង​ការ​អភិវឌ្ឍសមត្ថភាពខ្លួនផងដែរ។

ក្នុងការ​ប្រកួតជាក្រុមបដិសេធលើប្រធានបទ “យុវជន​កម្ពុជា ត្រូវ​មាន​ចំណេះដឹង​បញ្ញាសិប្បនិម្មិត (AI) ជាអាទិភាព​ដើម្បី​ចូលរួម​ប្រកប​ដោយ​ប្រសិទ្ធភាព​ក្នុងការ​ធ្វើ​ពិពិធកម្ម​សេដ្ឋកិច្ច​កម្ពុជា” បើតាម ស៊ីវម៉ី ក្រុម​ខ្លួនពិតជាពិបាករកចំណុចបដិសេធ ហើយក៏​មិនដឹងរកឯកសារមកពីណានោះឡើយ។ ប៉ុន្តែក្រុមរបស់ខ្លួននៅ​តែព្យាយាមរក្សាគោលជំហ និងស្វែងរកឯកសារជាច្រើន ព្រមទាំងសិក្សាឱ្យស៊ីជម្រៅ ដោយមិនត្រឹមតែផ្ដោតលើក្រុមបដិសេធទេ គឺសិក្សាពីក្រុមស្របផងដែរ ដើម្បីដឹងថា ក្រុមគេអាចនិយាយពីអ្វី អាចវាយបកវិញកន្លែងណា ដើម្បីងាយស្រួលក្នុងការយកឈ្នះ ទៅលើដៃគូរបន្ថែមទៀត។

ស៊ីវម៉ី បានចែក​រំលែក​បទពិសោធន៍​របស់ខ្លួនក្នុង​ការ​ចូលរួមកម្មវិធីប្រកួតនេះថា ដំបូងឡើយ គឺអ្វីៗហាក់ថ្មីទាំងអស់ ដោយ​មិនដឹងថា អ្វីជាការប្រកួតជជែកដេញដោលនោះទេ, បន្ទាប់ពីបានចូលរួមកម្មវិធីនេះ បច្ចុប្បន្ន​ខ្លួន​ទទួលបានចំណេះដឹងថ្មីៗ ចេះមានភាពបទបែន ចេះសម្របសម្រួលទៅតាមកាលៈទេសៈ ហើយចេះស្រាវជ្រាបបានច្រើនជាងមុន។ ស៊ីវម៉ី បន្តថា សម្រាប់ចំណេះដឹងដែល​ទទួល​បាន​ពីកម្មវីធីនេះ ខ្លួន​នឹងយកទៅជំនួយដល់ការសិក្សា និងធ្វើជាគំរូ ដល់សិស្សានុសិស្សដទៃទៀត ដើម្បីពង្រឹងភាពក្លាហាន និងចូលរូមកម្មវិធីសង្គមឱ្យបានច្រើន ព្រោះវាអាចចូលរួមចំណែកជួយដល់ប្រទេសជាតិរបស់យើង។

គួរជំរាបជូនថា កម្មវិធីជជែកដេញដោលយុវជនថ្នាក់ជាតិ ត្រូវ​បានរៀបចំឡើងដោយ​អគ្គនាយកដ្ឋានយុវជន នៃក្រសួងអប់រំ​យុវជន និងកីឡា ក្នុងគោលបំណងបណ្តុះបណ្តាលយុវជនឱ្យចេះសិក្សាស្រាវជ្រាវ ចងក្រងឯកសារ និងចេះប្រើប្រាស់វប្បធម៌សន្ទនាក្នុងការរួមចំណែកដោះស្រាយបញ្ហាផ្សេងៗ ដែលពួកគេជួបប្រទះ ជាពិសេសកសាងសមត្ថភាពយុវជនឱ្យមានភាពក្លាហាន ប្រកបដោយភាពឈ្លាសវៃក្នុងការបញ្ចេញមតិ ដើម្បីជាប្រយោជន៍សម្រាប់សង្គមជាតិ៕