ស្របពេលដែលកម្ពុជាកំពុងមានអាកាសធាតុក្តៅហួតហែងខ្លាំង អគ្គីសនីកម្ពុជា បានអំពាវនាវឱ្យសាធារណជន ចូលរួមកាត់បន្ថយការប្រើប្រាស់ថាមពលអគ្គិសនីទៅតាមលទ្ធភាព និងតាមវិធីសាស្រ្តផ្សេងៗគ្នា ដោយហេតុថា ការប្រើប្រាស់ថាមពលអគ្គិសនីនៅចុងរដូវប្រាំងដែលមានអាកាសធាតុក្តៅហួតហែងខ្លាំងក្នុងបរិមាណច្រើនពេក បង្កឱ្យជះផលអវិជ្ជមានទាំងបុគ្គលផ្ទាល់ខ្លួន និងអគ្គិសនីកម្ពុជាផងដែរ។

បើតាមសេចក្តីជូនដំណឹងរបស់ អគ្គិសនីកម្ពុជា នៅ​ក្នុងរដូវប្រាំង ឆ្នាំ២០២៤ នេះ កម្ពុជាទទួលរងនូវបាតុភូត អែលនីញ៉ូ (El Nino) ដែលចាប់ពីដើមខែមេសានេះ សីតុណ្ហភាពកើនកំដៅជាខ្លាំង បណ្តាលឱ្យការប្រើប្រាស់អគ្គិសនីចេញពីប្រព័ន្ធផ្គត់ផ្គង់របស់អគ្គិសនីកម្ពុជាកើនឡើងប្រមាណជាង ៣០% បើប្រៀបធៀបជាមួយឆ្នាំមុន។ ហើយដើម្បីដោះស្រាយបំពេញបង្គ្រប់តម្រូវការប្រើប្រាស់ថាមពលអគ្គិសនីដែលកើនឡើង អគ្គិសនីកម្ពុជាចាំបាច់ត្រូវផលិតអគ្គិសនីចេញពីរោងចក្រប្រើប្រេងឥន្ធនៈ ដែលចំណាយថ្លៃដើមខ្ពស់ខ្លាំង។ អគ្គិសនីកម្ពុជាស្នើសុំអ្នកប្រើប្រាស់អគ្គិសនីទាំងអស់ជួយចូលរួមសហការតាមរយៈកាត់បន្ថយការប្រើប្រាស់ដែលមិនចាំបាច់ និងត្រួតពិនិត្យសម្ភារបរិក្ខារតាមលក្ខណបច្ចេកទេស។

ក្នុងសេចក្ដីជូនដំណឹងរបស់អគ្គិសនីកម្ពុជា ក៏បានរំលេចដែរថា ការជួយសន្សំសំចៃថាមពលអគ្គិសនីរបស់បងប្អូនតាមវិធីខាងលើ មិនត្រឹមតែបានកាត់បន្ថយចំណាយក្នុងការទូទាត់ថ្លៃប្រើប្រាស់អគ្គិសនីរបស់ខ្លួនផ្ទាល់ប៉ុណ្ណោះទេ គឺបានចូលរួមចំណែកជួយកាត់បន្ថយការចំណាយរបស់អគ្គិសនី កម្ពុជាក្នុងការផលិតថាមពលដែលមានថ្លៃដើមខ្ពស់។

តើយើងអាចសន្សំសំចៃថាមពល ឬកាត់បន្ថយចំណាយលើថាមពលនៅផ្ទះដោយរបៀបម៉េច?

យោង​តាម ឯកសាររបស់កម្មវិធីអភិវឌ្ឍន៍របស់អង្គការសហប្រជាជាតិ (UNDP) ស្តីពីប្រសិទ្ធភាពថាមពល បានបង្ហាញគន្លឹះ​មួយ​ចំនួន​ក្នុងការសន្សំសំចៃថាមពល ដ៏មានប្រសិទ្ធភាព ដូចជា ៖

បិទកុងតាក់ ៖ បិទអំពូលភ្លើង កង្ហារ ម៉ាស៊ីនត្រជាក់ ទូរទស្សន៍ និង​កុំព្យូទ័រ​នៅពេល​មិន​ប្រើ ។ ដូចគ្នានេះផងដែរ ចៀសវាង​ដោត​ដុយទុកទូរទស្សន៍ និង​ឧបករណ៍​ផ្សេងទៀត​នៅ​លើរបៀបរង់ចាំ​ដែលអាច​នៅ​ស៊ីភ្លើង។

ប្រើអំពូលមានប្រសិទ្ធភាព ៖ ដូរអំពូលភ្លើងពងមាន់ទាំងអស់ ជាមួយ​អំពូលអិលអ៊ីឌី ដែលមានគុណភាពល្អ ។ ការចំណាយនេះ នឹងបានវិញភ្លាមៗ​ដោយ​សារ​ការ​ថយចុះ​ការ​ចំណាយ​លើថ្លៃអគ្គិសនីរបស់អ្នក។ ប្រសិនបើ​អ្នក​កំពុង​ប្រើ​អំពូល ស៊ីអេហ្វអិល សូមជំនួសវាដោយអំពូល អិលអ៊ីឌី នៅពេលដែលវាខូច។

ផ្លាស់ប្តូរបរិក្ខារអគ្គិសនីចាស់ៗ​មិន​មានប្រសិទ្ធភាព ៖ តើទូរទឹកកក ឬម៉ាស៊ីនត្រជាក់​នៅផ្ទះមានអាយុលើសពី ៥ឆ្នាំមែនទេ? អ្នក​អាចសន្សំ​សំចៃ​ថាមពល​បាន​ច្រើននៅពេលផ្លាស់ប្តូរ​វា​ជាមួយបរិក្ខាថ្មី ដែលមាន​ប្រសិទ្ធភាពថាមពល។ ការវិនិយោគនឹងសងត្រឡប់វិញ​ក្នុងរយៈ​ពេលតិចជាង១ឆ្នាំ។ សូមរកមើល​បរិក្ខារណាដែលមានស្លាកសញ្ញាថាមពល​នៅក្នុងហាង។ ទិញ​តែទូទឹកកក ទូរក្លាសេ ម៉ាស៊ីនត្រជាក់​ដែលមាន​ផ្កាយ៥ រួចហើយ​វិក្កយបត្រអគ្គិសនីរបស់អ្នកនឹងថយចុះ៕