កាលពីថ្ងៃទី២៥ ខែធ្នូ ឆ្នាំ២០២៣ ក្រសួងអប់រំ យុវជន និងកីឡា បានប្រកាស​ដាក់​ឱ្យ​អនុវត្ត​នូវ​ស្តង់ដាសាលា​មធ្យមសិក្សា​ចំណេះ​ទូទៅ​សាធារណៈគំរូ និង​អង្គវិបស្សនាគម្រោង USESDP-2 STEP UP។

ការដាក់ឲ្យអនុវត្តស្តង់ដាសាលាមធ្យមសិក្សាចំណេះទូទៅសាធារណៈគំរូ និងអង្គវិបស្សនានេះឡើង ក្នុងគោលបំណងសំខាន់បី គឺ ៖ ១)ការប្រកាសដាក់ឱ្យអនុវត្តស្តង់ដាសាលាមធ្យមសិក្សាចំណេះ ទូទៅសាធារណៈគំរូ និងយន្តការអនុវត្ត ២)ការពិនិត្យឡើងវិញនូវវឌ្ឍនភាព និងទិសដៅអនុវត្តបន្តរបស់ គម្រោង USESDP 2 និងគម្រោង STEP UP ៣)ការបញ្ចូលវិធីសាស្ត្របង្រៀនសាលាជំនាន់ថ្មីទៅក្នុង សាលារៀនគំរូ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា តាមអនុសាសន៍របស់សម្តេចមហាបវរធិបតី នាយករដ្ឋមន្រ្តី បានដាក់ចេញវិធានការ​គន្លឹះចំនួន ៤ ក្នុងគោលដៅគោលដៅពង្រឹងគុណភាពគ្រឹះស្ថានសិក្សា រដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា រួមមាន៖ ទី១).ការពង្រឹង អភិបាលកិច្ចសាលារៀន, ទី២).ការពិនិត្យ កែសម្រួល និងរៀបចំកម្មវិធីសិក្សា, និងសកម្មភាព ក្រៅម៉ោងសិក្សាឱ្យស្រប ទៅតាមតម្រូវការក្នុងការពង្រឹងចំណេះដឹង, វិន័យ, សីល ធម៌ និងឥរិយាបថ របស់សិស្ស, ទី៣).ការយកចិត្តទុកដាក់លើសុខភាពរបស់សិស្ស តាមរយៈ កម្មវិធីអាហារូបត្ថម្ភដល់កុមារ និង ការត្រួតពិនិត្យគុណភាពចំណីអាហារនៅតាមសាលារៀន, ទី៤). ការជំរុញ និងលើកទឹក ចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការអប់រំស្របតាមពាក្យ ស្លោក «ភាពជាដៃគូរដ្ឋ និង សហគមន៍ ដើម្បីការអប់រំ»។

បន្ថែមពីលើនេះ ក្រសួងអប់រំ ក៏បានកំណត់អាទិភាពចំនួន ៤ បន្ថែមទៀត គឺ ទី៥).ការអប់រំឌីជីថល, ទី៦).ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា, ទី៧).ការកសាងប្រព័ន្ធនិងការ អភិវឌ្ឍសមត្ថភាព, និង ទី៨) ការអភិវឌ្ឍការអប់រំកាយនិងកីឡា។

បើតាមប្រសាសន៍របស់ ឯកឧត្តម ហង់ជួន ណារ៉ុន ក្រសួងអប់រំក៏បានយកចិត្តទុកដាក់លើគ្រូបង្រៀន ដោយចាត់ទុកថា គ្រូបង្រៀននៅកម្ពុជានឹងត្រូវទទួលបានការជឿទុកចិត្តនិងការទទួលស្គាល់ថាជា “អ្នកផលិតចំណេះដឹង ពិតប្រាកដនៅកម្រិតសាលារៀន និងជាដៃគូសម្រាប់កែលម្អគោលនយោបាយ”។

ជាមួយគ្នានេះ ក្រសួងអប់រំ ក៏​បានការពង្រឹងអភិបាលកិច្ចសាលារៀនមានគោលដៅកែលម្អលទ្ធផលសិក្សារបស់សិស្សផ្លាស់ប្តូរវប្បធម៌សាលារៀន ពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់បុគ្គលិកអប់រំ និងសិស្សានុសិស្ស, ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅ ម៉ោងសិក្សា ដើម្បីពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, យកចិត្តទុកដាក់លើសុខភាពរបស់សិស្ស, ភាពជាដៃគូរដ្ឋ និងសហគមន៍ដើម្បីលើកកម្ពស់ការអប់រំ ។

យ៉ាងណាក៏ដោយ “ស្តង់ដាសាលារៀន គំរូ” សម្រាប់មត្តេយ្យសិក្សារហូតដល់មធ្យមសិក្សា ត្រូវ​បានកំណត់ស្តង់ដារចំនួន៥ រួមមាន ៖ ស្តង់ដាទី១ ផ្តោតលើ លទ្ធផលសិក្សារបស់សិស្ស, ស្តង់ដាទី២ ផ្តោតលើ ការបង្រៀននិងរៀន, ស្តង់ដាទី៣ ផ្តោតលើ ការចូលរួមរបស់សហគមន៍, ស្តង់ដាទី៤ ផ្តោតលើ ដំណើរប្រតិបត្តិការនិងរដ្ឋបាលសាលារៀន និង ស្តង់ដាទី៥ ផ្តោតលើ គណនេយ្យភាពរបស់សាលារៀន។

ជារួម លក្ខណៈសម្បត្តិ នៃសាលារៀនគំរូ រួមមាន ទី១.សាលារៀនមានគណនេយ្យភាពជាមួយសហគមន៍ និងសម្រេចបានស្តង់ដាសាលារៀនគំរូ, ទី២. សាលារៀនមានស្វ័យភាពក្នុងការងារផែនការ​កែលម្អ​សាលារៀន ផែនការ​កែលម្អថ្នាក់រៀន និង​ផ្តល់​ការ​អភិវឌ្ឍវិជ្ជាជីវៈ​ជាប្រចាំដល់ គណៈគ្រប់គ្រងនិងគ្រូបង្រៀន, ទី៣. សិស្សត្រូវបានធ្វើតេស្តស្តង់ដា​ប្រកប​ដោយ​តម្លាភាព និង​យុត្តិធម៌ ដើម្បីបម្រើ​ដល់​ការ​កែលម្អ​ការ​បង្រៀន និងរៀន ការជួយសិស្សរៀនយឺត និងផ្តល់ព័ត៌មានដល់មាតាបិតា ឬអ្នកអាណាព្យាបាល​និង​សហគមន៍, ទី៤. គ្រូបង្រៀនប្រើប្រាស់លទ្ធផលតេស្ត ដើម្បីកែលម្អ​ការ​បង្រៀន និងទទួលបានការ​អភិវឌ្ឍគុណវុឌ្ឍិជាប្រចាំ, ទី៥. ការបង្កើតសកម្មភាព​ក្រៅម៉ោងសិក្សា ដើម្បីការអប់រំ​ចរិយាធម៌ និងសីលធម៌, ទី៦. ការយកចិត្តទុកដាក់ដលើសុខភាពសិក្សា និង ទី៧. ការចូលរួមរបស់មាតាបិតា អ្នកអាណាព្យាបាល និង​សហគមន៍ ក្នុងការ​គាំទ្រ និង​អភិវឌ្ឍសាលារៀន៕