សិស្សដែលត្រៀមប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបគ្រប់រូបតែងតែជួបបញ្ហាភ័យព្រួយ ឬខ្វះទំនុកចិត្តចំពោះខ្លួនឯងមុនពេល និងកំឡុងពេលប្រឡង។ កង្វះទំនុកចិត្តនេះអាចបង្កឡើងពីការព្រួយពីការប្រឡងដែលធ្វើមិនបានល្អ ការបារម្ភពីវិញ្ញាសាប្រឡងចេញមកមិនចេះ ឬមិនអាចធ្វើបាន និងការព្រួយបារម្ភពីសុខភាព ឬបញ្ហាដែលមិនបានត្រៀមទុកណាមួយ។

ដើម្បីជាទុនជួយដល់ប្អូនៗដែលត្រៀមប្រឡងសញ្ញាបត្របាក់ឌុប យុវជន ផាន សុភាក់ អតីតសិស្សនិទ្ទេស A ឆ្នាំ២០២២ ចែករំលែកបទពិសោធន៍ផ្ទាល់ខ្លួនចំនួន៣ចំណុច ដើម្បីឱ្យខ្លួនឯងមានទំនុកចិត្ត ឬអាចដោះស្រាយបញ្ហាមានប្រសិទ្ធភាព។ ទីមួយបេក្ខជនត្រូវប្រមូលស្មារតីខ្លួនឯង ដោយត្រូវគិតថា អ្នកប្រឡងមុនៗ ឬសិស្សនិទ្ទេស A ឆ្នាំមុនៗក៏សុទ្ធតែជាអ្នកដែលប្រឡងបាក់ឌុបលើកទីមួយដូចគ្នា ដូចនេះអ្វីដែលគេធ្វើបាន អ្នកក៏អាចធ្វើបានដូចគ្នា។ ទីពីរ នៅក្នុងថ្នាក់មុនពេលប្រឡង គឺអំឡុងពេលចូលថ្នាក់ដែលមុនពេលប្រឡង បេក្ខជនគួរនិយាយលេងជាមួយសិស្សនៅជុំវិញ អនុរក្ស ឬអប្បមាទដើម្បីបំបាត់ភាពភ័យព្រួយព្រោះពេលនោះមិនមែនជាពេលប្រឡងឡើយ។ ទីបី បេក្ខជនត្រូវគិតវិជ្ជមានទៅលើខ្លួនឯងដោយគិតថា ការប្រឡងនេះអ្នកបានចំណាយពេលសិក្សាអស់រយៈពេល១២ឆ្នាំ ហើយការប្រឡង២ថ្ងៃនេះជាថ្ងៃបញ្ចប់ថ្នាក់វិទ្យាល័យ។

ជាមួយគ្នានេះដើម្បីទទួលបានលទ្ធផលល្អក្នុងការប្រឡង បេក្ខជនត្រូវសរសេរឱ្យបានស្អាត និងមានរបៀបល្អ ព្រោះការធ្វើបែបនេះអាចធ្វើឱ្យអ្នកកែវិញ្ញាសាបានឃើញហើយ ចង់កែវិញ្ញាសារបស់អ្នកព្រោះមើលទៅមានរបៀបរៀបរយ និងគួរឱ្យចង់មើល។ ការធ្វើឱ្យទាន់ពេលវេលានិងគ្រប់សំណួរក្នុងវិញ្ញាសា បេក្ខជនត្រូវធ្វើឱ្យហើយមុនម៉ោងដើម្បីសល់ពេលវេលាសម្រាប់ផ្ទៀងផ្ទាត់ចម្លើយជៀសវាងការភាន់ច្រឡំ ឬចន្លោះខ្វះខាត។ ចំណុចគួរដឹងបន្ទាប់ បេក្ខជនមិនគួរលុប ឬឆូតចោលចម្លើយផ្ដេសផ្ដាសព្រោះអាចបង្កឱ្យមានលក្ខណៈមិនស្អាត និងរញ៉េរញ៉ៃក្នុងក្រដាសប្រឡងរបស់អ្នក។ លើសពីនេះបេក្ខជនត្រូវប្រុងប្រយ័ត្ន និងថែរក្សាក្រដាស់ឱ្យបានល្អក្នុងការតក្រដាសប្រឡង។

ជាចុងក្រោយលោក ផាន សុភាក់ សូមលើកទឹកចិត្តដល់ប្អូនៗដែលកំពុងត្រៀមប្រឡងនាថ្ងៃខាងមុខនេះថែរក្សាសុខភាពឱ្យបានល្អ និងសូមធ្វើដំណើរប្រកបដោយសុខសុវត្ថិភាព និងត្រៀមសម្ភារៈទៅប្រឡងឱ្យបានគ្រប់គ្រាន់៕