ខណៈ​ដែលរាជរដ្ឋាភិបាល​អាណត្តិទី៧ បានប្រកាស​អំពីការ​រៀបចំ​កម្មវិធីបណ្តុះបណ្តាល​ជំនាញបច្ចេកទេស​វិជ្ជាជីវៈ​ដល់យុវជន​មក​ពី​គ្រួសារក្រីក្រ និង​គ្រួសារងាយរងហានិភ័យ​ចំនួន ១លាន៥សែននាក់ ព្រមទាំង​មានការ​សម្របសម្រួលឱ្យ​បងប្អូន​កម្មករ​និយោជិត​អាច​ចូលរៀន​ជំនាញវិជ្ជាជីវៈផងដែរនោះ សហជីព​ក៏​បានធ្វើអំពាវនាវ​ដល់បងប្អូន​កម្មករត្រៀម​ខ្លួន​ចូលរៀនជំនាញបន្ថែម ដើម្បីជាទុនចាប់យក​ឱកាស​ការងារដែលមានប្រាក់ចំណូលខ្ពស់ ក្នុង​បរិបទទីផ្សារ​ការងារថ្មីនាពេលបច្ចុប្បន្ន និង​អនាគត​។

លោកស្រី សៀ គន្ធា ប្រធាន​សហជីពការងារស្រ្តី​កម្ពុជា លើក​ឡើងថា នៅពេលកម្មករមានជំនាញវិជ្ជាជីៈច្បាស់លាស់ ពួកគេនឹងអាចទទួលបានចំណូលល្អប្រសើរសម្រាប់ការផ្គត់ផ្គង់ជីវភាពគ្រួសារ ព្រោះការមានជំនាញច្បាស់លាស់នេះ គឺជាទន់មួយនៅពេលពួកគេជួបហានិភ័យក៏មានចំណេះជំនាញអាចរកចំណូលផ្គត់ផ្គង់បានផងដែរ។ លោកស្រីមានប្រសាសន៍បញ្ជាក់ថា បងប្អូនកម្មករ​ត្រូវ​ចេះផ្លាស់ប្តូរ​គំនិត និង​ព្យាយាម​ស្វែង​រក​ចំណេះដឹងថ្មីៗ​ដើម្បី​អភិវឌ្ឍន៍​មុខរបរ​ឱ្យ​បានរីកចម្រើន ដើម្បី​ចូលរួមអភិវឌ្ឍសង្គមជាតិ។

ចំណែក​លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ មានប្រសាសន៍ថា ការបណ្តុះបណ្តាល​ជំនាញវិជ្ជាជីវៈ នឹង​ធ្វើ​ឱ្យ​កម្មករ​មាន​ចំណេះការងារ​ពិតប្រាកដក្នុងការ​អភិវឌ្ឍជំនាញ ឬអាច​បើក​អាជីវកម្មបានថែមទៀតផង។ ​លោកថា បច្ចុប្បន្ននេះ បើនិយាយ​ពីវិស័យ​កាត់ដេរ លោក​មើលឃើញថា ភាគច្រើន​អ្នក​គ្រប់គ្រង​គឺជាជនបរទេស ពួកគេ​មាន​ប្រាក់ខែច្រើនគុណនឹងមួយ គុណនឹងពីរ ឬគុណនឹងបី, ដូច្នេះ ប្រសិន​បើ​កម្មករ​យើង​មានជំនាញ​ច្បាស់លាស់ នោះយើងនឹងទទួលបានប្រាក់ចំណូល​ខ្ពស់​ដូចគេដែរ។

សូមបញ្ជាក់ថា កម្មវិធីបណ្តុះបណ្តាលបច្ចេកទេស និងជំនាញវិជ្ជាជីវៈលើយុវជនប្រមាណ១លាន៥សែននាក់ដែលរួមមានទាំងកម្មករនេះ គឺជាចំណុចមួយក្នុងចំណោមអនុសាសន៍ចំនួន៥ផ្សេងទៀតដែលរាជរដ្ឋាភិបាលបានដាក់ចេញដើម្បីធ្វើឱ្យប្រសើរឡើងនៃវិស័យកាត់ដេរជាពិសេសភាពប្រសើរឡើងនៃលក្ខខណ្ឌការងាររបស់កម្មករ និងការបង្កើនលទ្ធភាពការងារក្នុងគោលដៅធ្វើឱ្យប្រសើរឡើងជាលំដាប់នូវជីវភាពរបស់ប្រជាពលរដ្ឋដែលមកពីគ្រួសារងាយរងគ្រោះដែលក្នុងនោះមានកម្មករផងដែរ៕