គម្រោងធុរកិច្ចបង្កើតថ្មី (Start-up) ដែលមានឈ្មោះថា Tam Dan របស់ក្រុមយុវជនមកពី សាកលវិទ្យាល័យ ខេមតិច ទទួលបានជ័យលាភីលេខ១ ខណៈលេខ ២បានទៅលើក្រុម VOLTS មកពីវិទ្យាស្ថានបច្ចេកវិទ្យាគីរីរម្យ និងលេខ៣ បានទៅលើគម្រោងរបស់ក្រុម UNIFLOW មកពីសាកលវិទ្យាល័យ ខេមតិច ក្នុងការប្រកួតកម្មវិធីប្រកួតប្រជែងនវានុវត្តន៍បច្ចេកវិទ្យា (Innovative Tech Challenge) កាលពីចុងសប្តាហ៍កន្លងទៅ។

ឯកឧត្តមបណ្ឌិត ឈៀង​ វណ្ណមុនិណ្ឌ នាយក​ប្រតិបត្តិ​នៃ​សហគ្រិន​ខ្មែរ​ (Khmer Enterprise) បានមានប្រសាសន៍ថា កម្មវិធីប្រកួតប្រជែងនវានុវត្តន៍បច្ចេកវិទ្យា មានគោលដៅលើកកម្ពស់ចំណេះដឹងផ្នែកបច្ចេកវិទ្យា និងវិទ្យាសាស្ត្រ, កសាងសមត្ថភាពសហគ្រិនភាពក្នុង ចំណោមនិស្សិតកម្រិតសាកលវិទ្យាល័យដែលអនាគត នឹងក្លាយជាស្ថាបនិកវ័យក្មេង ដែលមានគំនិតច្នៃប្រឌិត, និងជំរុញឱ្យមានការប្រើប្រាស់បច្ចេកវិទ្យា ក្នុងការចូលរួមជួយដោះស្រាយបញ្ហាសង្គម។ ឯកឧត្តមបន្ថែមថា សហគ្រិនខ្មែរ នឹងបន្តគាំទ្រ និងពង្រីកវិសាលភាពនៃកម្មវិធីប្រកួតប្រជែងនវានុវត្តន៍ និងសហគ្រិនភាពដល់សិស្សានុសិស្សសាកលវិទ្យាល័យ ព្រមទាំងបន្តសហការជាមួយគ្រឹះស្ថានអប់រំ វិស័យឯកជន និងដៃគូអភិវឌ្ឍនានា។ 

លោកបណ្ឌិត ឃៀង សុធី​ សាកលវិទ្យាធិការនៃសាកលវិទ្យាល័យ ខេមតិចមានប្រសាសន៍ថា សាកលវិទ្យាល័យ ខេមតិច បាននិងកំពុងខិតខំពង្រឹង និងពង្រីកកិច្ចសហប្រតិបត្តិការល្អជាមួយ ស្ថាប័នរដ្ឋ ក្រុមហ៊ុនឯកជន ដៃគូអភិវឌ្ឍន៍ និងសាកលវិទ្យាល័យ ទាំងក្នុងស្រុក និងនៅបរទេស ដើម្បីជំរុញឱ្យមានការបង្កើតគំនិតថ្មី និង នវានុវត្តន៍​ សម្រាប់ដោះស្រាយបញ្ហាប្រឈមរបស់សង្គម និងឧស្សាហកម្ម ក្នុងគោលបំណងជំរុញការអភិវឌ្ឍន៍ប្រកបដោយចីរភាពនៅកម្ពុជា។

សាកលវិទ្យាល័យខេមតិច បានត្រៀមខ្លួនគ្រប់ពេលវេលាជាមួយរដ្ឋាភិបាល ក្នុងការអភិវឌ្ឍ ក៏ដូចជាបង្កើនយន្តការនៃការកសាងភាពជាដៃគូរវាងស្ថាប័ន និងឯកជន។

លោក បណ្ឌិត ឃៀង សុធី សាកលវិទ្យាធិការនៃសាកលវិទ្យាល័យ ខេមតិច

លទ្ធផលនៃការប្រកួតវគ្គផ្ដាច់ព្រ័ត្រ ក្រុម Tam Dan បានក្លាយជាម្ចាស់ជ័យលាភីទី១ និងទទួលបានថវិកាចំនួន ៣៥០០ដុល្លារសហរដ្ឋអាមេរិក​។ Tam Dan គឺជាកម្មវិធីទូរសព្ទដៃ ដែលបានដាក់បញ្ចូល បច្ចេកវិទ្យាបញ្ញាសិប្បនិមិ្មត ដែលអាចអនុញ្ញាតឱ្យមាតាបិតា និងអាណាព្យាបាល តាមដានពីសកម្មភាពនៃការសិក្សា និងលទ្ធផលរបស់សិស្សានុសិស្ស។

យុវជន គីន សុសេដ្ឋា, កែប ស្រីណាច, ហូ ច័ន្ទពន្លឺសោភា និងអឿន បញ្ញាយុត្តិ សមាជិកក្រុម Tam Dam បានលើកឡើងដូចគ្នាថា ក្ដីស្រមៃ និងការរំពឹងទុករបស់ពួកគេ ដែលចង់ទទួលបានជ័យលាភីក្នុងការប្រកួតប្រជែងនេះ បានក្លាយជាការពិត ធ្វើ​ឱ្យពួកគេមានក្តីរំភើបខ្លាំងមែនទែន។ យុវជនឆ្នើមទាំងបួនរូប បន្ថែមថា ការបង្កើតដំណោះស្រាយនេះឡើង គឺសម្រាប់គ្រួសារ សាលារៀន និងសង្គម ជាពិសេសម្រាប់ការអប់រំនៅកម្ពុជា ដោយធ្វើយ៉ាងណាជួយឱ្យក្មេងៗបានពង្រឹងសមត្ថភាពនៅពេលចូលរៀនថ្នាក់មត្តេយ្យសិក្សា ព្រោះនេះជាចំណុចដំបូង ក្នុងការបណ្ដុះបណ្ដាលក្មេងៗជំនាន់ក្រោយ ហើយធ្វើយ៉ាងណាឱ្យឪពុកម្ដាយមានអារម្មណ៍ថា មានសុវត្ថិភាពនៅពេលដែលបញ្ចូនកូនទៅរៀន។

សូមជម្រាបជូនថា កម្មវិធីនេះត្រូវបានផ្ដួចផ្ដើមបង្កើតឡើងដោយ សាកលវិទ្យាល័យ ខេមតិច និងមានការគាំទ្រពីសំណាក់ សហគ្រិនខ្មែរ (Khmer Enterprise)  និងគណៈកម្មាធិកាសេដ្ឋកិច្ចនិងសង្គមរបស់អង្គការ សហប្រជាជាតិសម្រាប់អាស៊ីប៉ាស៊ីហ្វិក​​ (UN-ESCAP)។ កម្មវិធីនេះមាន ការចូលរួមពីនិស្សិតជិត ៤០ក្រុម និងត្រូវបានចម្រាញ់ជ្រើសរើសយ៉ាងម៉ត់ចត់បាន ១១ក្រុមចុងក្រោយ ដើម្បីប្រកួតប្រជែង ដែលស្មើនឹង ៤៦នាក់ មកពីសាកលវិទ្យាល័យ ៩ ដោយមានការរៀបចំរយៈពេល ៦ខែ៕