ថ្លែងក្នុងពិធីប្រកាសទទួលស្គាល់ ខេត្តកែបជាខេត្តទី៦ ដែលសម្រេចបានជាខេត្តបញ្ចប់ការបន្ទោបង់ពាសវាលពាសកាល (ODF) នាព្រឹកថ្ងៃទី១៥ ខែសីហា ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ អំពាវនាវដល់ខេត្តដែលបានប្រកាស​ការ​បញ្ចប់បន្ទោរបង់ពាសវាលពាសកាល សូម​កុំត្រឡប់មកជាខេត្តដែលបន្ទោរបង់ពាសវាលពាសកាលវិញ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន មានប្រសាសន៍ថា ​ខេត្តកែប​ជា​ខេត្ត​ទី​៦ហើយ នៅ​ក្នុង​ព្រះរាជាណាចក្រកម្ពុជា ដែល​សម្រេចបាន​​ជា​ខេត្ត​បញ្ចប់ការ​បន្ទោបង់​ពាសវាលពាសកាល (ODF) ។ ការសម្រេចបាននេះ មាន​ន័យ​ថា​​​ គ្រប់ខ្នងផ្ទះ​ទាំងអស់នៅក្នុងខេត្តកែបមាន​បង្គន់អនាម័យផ្ទាល់ខ្លួន ឬមាន​បង្គន់អនាម័យរួមគ្នាប្រើប្រាស់ ។ ឯកឧត្តមបញ្ជាក់ថា លទ្ធផលដែលទទួលបាន​​នាពេលនេះ បាន​ឆ្លុះបញ្ចាំងពី​ការចូលរួម និង​ការ​ខិតខំប្រឹងប្រែង​របស់ខេត្តទាំងមូល អាជ្ញាធរគ្រប់លំដាប់ថ្នាក់ ក្រុមការងារបច្ចេកទេសថ្នាក់ខេត្ត (PWG) មន្ទីរអភិវឌ្ឍន៍ជនបទ ក៏ដូចជា​មន្ទីរពាក់ព័ន្ធ​​ដៃគូអភិវឌ្ឍន៍នានា និង​​​អង្គការមិនមែនរដ្ឋាភិបាលផងដែរ។

«ខ្ញុំសង្ឃឹមយ៉ាង​មុតមាំថា រដ្ឋបាលខេត្ត និង​គ្រប់ភាគីពាក់ព័ន្ធ​​ទាំង​អស់​ នៅ​តែបន្ត​ការ​ចូលរួម និង​​ជម្រុញ​ការងារ​​ផ្គត់ផ្គង់ទឹក និង​អនាម័យជនបទ ជាពិសេស​គឺ​ការ​រិះរក​យន្តការ​​រក្សា​និរន្តរភាព​ខេត្ត ODF»

ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ

ក្នុងឱកាសនោះ ឯកឧត្តមបណ្ឌិត សោម ពិសិដ្ឋ អភិបាលខេត្តកែប លើកឡើងថា ឯកឧត្តមផ្ទាល់តែងតែមានការប្រុងប្រយ័ត្នចំពោះជ័យលាភីរបស់ខេត្តកែបតាំងពីដើមមក ដោយឯកឧត្តមមានទស្សនៈមួយថា ការដណ្ដើមយកពានរង្វាន់ ដណ្ដើមយកខ្សែក្រវ៉ាត់ ឬជ័យលាភីជារឿងមួយដ៏លំបាក ប៉ុន្តែអ្វីដែលលំបាកគឺការការពារខ្សែក្រវ៉ាត់ ការពារជ័យលាភី ដើម្បីកុំឱ្យធ្លាក់ ឬថយ ។ ឯកឧត្តមបណ្ឌិត បន្តថា ពេលនេះយើងបានបញ្ចប់នូវការបន្ទោរបង់ពាសវាលពាសកាល ដោយប្រជាពលរដ្ឋគ្រប់ខ្នងផ្ទះ គ្រប់គ្រួសារ មានបង្គន់ប្រើប្រាស់ ប៉ុន្តែអ្វីដែលយើងខិតខំបន្តទៀត គឺការផ្សព្វផ្សាយ អប់រំ ប្រមូលផ្ដុំតាមសហគមន៍របស់ប្រជាពលរដ្ឋជាប្រចាំ រួមមានក្រុមការងារថ្នាក់ជាតិ ក្រុមការងាររាជរដ្ឋាភិបាល ក៏ដូចជាក្រុមការងារផ្សេងៗទៀតក៏បានចុះទៅដល់ខ្នងផ្ទះ ផ្សព្វផ្សាយជាព័ត៌មាន បង្ការទប់ស្កាត់ និងឆ្លើយតបផងដែរ។

«ប្រជាពលរដ្ឋដែលប្រើប្រាស់បង្គន់រួមក្នុងគ្រួសារ ត្រូវតែជំរុញឱ្យមានបង្គន់ប្រើប្រាស់កាន់តែច្រើនទៀត»

ឯកឧត្តម បណ្ឌិត សោម ពិសិដ្ឋ អភិបាលខេត្តកែប

ឯកឧត្តមបណ្ឌិត សោម ពិសិដ្ឋ ក៏បានសម្តែងការប្តេជ្ញាចិត្តដែរថា ខេត្តកែបនៅតែបន្តជំរុញការលើកកម្ពស់ការបញ្ចប់ការបន្ទោរបង់ពាសវាលពាសកាលបន្ថែមទៀតចំពោះករណីដែលនៅសល់ប្រមាណជាង ២០០ខ្នងផ្ទះ ឬស្មើនឹង៣ភាពរយ ។ ឯកឧត្តមបណ្ឌិតបន្តថា ការងារនេះមិនបញ្ចប់តែត្រឹមនេះទេ ត្រូវខំជំរុញបន្តទៀតតាមរយៈការរៀបចំផែនការសកម្មភាពបីឆ្នាំរំកិល និងផែនការអភិវឌ្ឍន៍ជាប្រចាំ។ ដូច្នេះ មន្ទីរអភិវឌ្ឍន៍ជនបទ ក៏ដូចជា អាជ្ញាធរក្រុងសង្កាត់ត្រូវបញ្ចូលផែនការសកម្មភាពនៃការបញ្ចប់ការបន្ទោរបង់ពាសវាលពាសកាលនេះ ដើម្បីជំរុញឱ្យមានការប្រើប្រាស់បង្គន់ និងបន្ទប់ទឹកគ្រប់ខ្នងផ្ទះនៅក្នុងភូមិសាស្រ្តរបស់ខេត្តកែប។

គួរជម្រាបជូនថា នៅក្នុងពិធីនេះ ក៏មានការផ្ដល់ជូនពានជ័យលាភី ODF និងប្រកាសនីយប័ត្រខេត្តដល់អភិបាលខេត្ត ប្រធានក្រុមប្រឹក្សាខេត្ត ផ្ដល់ជូនបណ្ណសរសើរជូនទៅដល់ថ្នាក់ដឹកនាំខេត្ត និងអង្គការដៃគូ ព្រមទាំងមានការហែរក្បួនអបអរសាទរខេត្តកែប ជាខេត្តលែងមានការបន្ទោរបង់ពាសវាលពាសកាល៕