ប្រទេសកម្ពុជាតែងតែទទួលរងគ្រោះមហន្តរាយដោយធម្មជាតិស្ទើរតែរៀងរាល់ឆ្នាំដូចជា ទឹកជំនន់ ខ្យល់ព្យុះ និងភាពរាំងស្ងួត នៅតាមតំបន់ងាយរងគ្រោះមួយចំនួន។ រយៈពេលប៉ុន្មានឆ្នាំចុងក្រោយនេះ ទឹកជំនន់បានបំផ្លាញផ្ទះសម្បែង ទ្រព្យសម្បត្តិ ដំណាំស្រូវ បន្លែ និងហេដ្ឋារចនាសម្ព័ន្ធជាច្រើនដូចជា ផ្លូវថ្នល់ ស្ពាន មន្ទីរពេទ្យ និងសាលារៀនជាដើម។

ដូចដែលធ្លាប់ដឹងហើយថា បញ្ហាចម្បងៗដែលកុមារ និងក្រុមគ្រួសារអាចប្រឈមជាមួយក្នុងពេលមានគ្រោះមហន្តរាយកើតឡើងរួមមាន៖

• មិនមានស្បៀងគ្រប់គ្រាន់ ខ្វះទឹកស្អាតសម្រាប់ហូប ខ្វះទីជម្រកសមរម្យ
• កង្វះអនាម័យផ្ទាល់ខ្លួន និងការបន្ទោបង់ពាសវាលពាសកាលកើនឡើងដោយសារតបង្គន់ត្រូវលិចទឹក ឬខូចមិនអាចប្រើបាន
• ខូចខាត ឬបាត់បង់ផ្ទះសម្បែង សម្ភារបរិក្ខារ ឯកសារនានា និងទ្រព្យសម្បត្តិផ្សេងៗ
• បាត់បង់ចំណូល ផលដំណាំ និងសត្វពាហនៈមិនអាចទទួលបានសេវាសំខាន់ៗផ្សេងៗ
• មានការផ្ទុះឡើងនូវជំងឺឆ្លងនានារងរបួសស្នាម គ្រោះថ្នាក់ផ្សេងៗដូចជា លង់ទឹក ពស់ចឹក និងគ្រោះថ្នាក់ផ្សេងៗទៀតការធ្វេសប្រហែស ឬមិនយកចិត្តទុកដាក់ចំពោះកុមារ
• ការឃ្លាតឆ្ងាយពីក្រុមគ្រួសារ (កុមារ សមាជិកក្រុមគ្រួសារដែលពិការ ចាស់ជរាដែលមិនបានទទួលការថែទាំយកចិត្តទុកដាក់ត្រឹមត្រូវពីក្រុមគ្រួសារ ឬអាណាព្យាបាល)
• សាលារៀនត្រូវបិទ កុមារមិនបានចូលរៀនដែលធ្វើឲ្យប៉ះពាល់ដល់ម៉ោងសិក្សា និងគុណភាពសិក្សា
• ការតានតឹង ថប់អារម្មណ៍ និងបញ្ហាតក់ស្លុតផ្លូវចិត្តដែលអាចប៉ះពាល់ដល់សុខភាពផ្ទាល់ខ្លួន ការអភិវឌ្ឍ និងការសិក្សារបស់កុមារ
• ប្រឈមមុខទៅនឹងអំពើហឹង្សាក្នុងគ្រួសារ ការកេងប្រវ័ញ្ចផ្លូវភេទទៅលើស្រ្តី និងកុមារ។

ដូច្នេះ ការត្រៀមបង្ការជាមុនឱ្យបានល្អចំពោះគ្រោះធម្មជាតិនានា ជាពិសេសគ្រោះទឹកជំនន់អាចជួយក្រុមគ្រួសាររបស់អ្នកមានសុវត្ថិភាព និងមានសុខភាពល្អ។

 ១. មុនពេលទឹកជំនន់

តើត្រូវត្រៀមបង្ការដូចម្ដេចមុនពេលមានគ្រោះទឹកជំនន់?

នៅកម្ពុជាគ្រោះមហន្តរាយដោយទឹកជំនន់មានពីរប្រភេទគឺ ទឹកជំនន់ទន្លេមេគង្គ និងជំនន់រហ័ស។ ទឹកជំនន់ទន្លេមេគង្គ គឺបណ្តាលមកពីការធ្លាក់ភ្លៀងខ្លាំងផ្ទួនៗគ្នានៅតំបន់ខាងលើជាមួយការមកដល់នូវសម្ពាធនៃខ្យល់ព្យុះត្រូពិកធ្វើឱ្យទឹកទន្លេកើនឡើង។ រីឯទឹកជំនន់រហ័សបណ្តាលមកពីការធ្លាក់ភ្លៀងខ្លាំងនៅតំបន់ភ្នំហើយហូរចាក់មកស្ទឹងនានាស្របពេលទឹកទន្លេឡើងខ្ពស់ផងធ្វើឱ្យទឹកស្ទឹងកើនជន់លិច ប៉ុន្តែមានរយៈពេលខ្លី យូរបំផុតត្រឹមពីរ ឬបីថ្ងៃប៉ុណ្ណោះ។

ដូចនេះហើយប្រការដែលគួរយកចិត្តទុកដាក់ជាសំខាន់នោះ គឺការប្រកាស​ឱ្យដឹងមុនជូនដល់ប្រជាពលរដ្ឋបានយល់ដឹង និងត្រៀមខ្លួនមុនពេលទឹកជំនន់មកដល់ ហើយដែលអាចជួយដល់ប្រជាពលរដ្ឋក្នុងតំបន់ដែលងាយទទួលរងគ្រោះបានត្រៀមលក្ខណៈជម្លៀសទៅទីទួលសុវត្ថិភាពទាន់ពេលវេលា។ ការប្រកាសដំណឹងដល់សាធារណជនធ្វើឡើងដោយក្រសួងធនធានទឹក និងឧត្តុនិយម និងគណៈកម្មាធិការជាតិគ្រប់គ្រងគ្រោះមហន្តរាយនៅពេលណាដែលពិនិត្យឃើញថាស្ថានភាពកម្ពស់ទឹកអាចកើនឡើងដល់ ឬកើនហួសកម្រិតប្រកាសអាសន្ន ។

ហេតុនេះ ត្រូវយកចិត្តទុកដាក់តាមដានស្តាប់ព័ត៌មានតាមវិទ្យុ ទូរទស្សន៍ ផ្ទាំងរូបភាពផ្សព្វផ្សាយ សារតាមទូរស័ព្ទចល័តការនិយាយគ្នាពីមាត់មួយទៅមាត់មួយ តាមរយៈអាជ្ញាធរមូលដ្ឋាន និងការព្យាករណ៍អាកាសធាតុដើម្បីបានដឹងពីស្ថានភាពវិវឌ្ឍន៍របស់ទឹកជំនន់។

មុនពេលទឹកជំនន់មកដល់គ្រួសារដែលស្ថិតក្នុងតំបន់ងាយរងគ្រោះត្រូវត្រៀមបម្រុងទុកស្បៀងអាហារមួយចំនួន​ឱ្យទាន់ពេលវេលា រួមមាន ល្ពៅ ត្រាវ ដំឡូង ពោត ត្រីឆ្អើរ ប្រហុក ផ្អក ទឹកស៊ីអីវ ប្រេងឆា ទឹកត្រី ត្រីងៀត មី អង្ករ អំបិល ត្រីខកំប៉ុង។ល។  ក្នុងនោះ សម្ភារសំខាន់ៗដែលត្រូវត្រៀមបម្រុងមុនពេលទឹកជំនន់មកដល់ រួមមាន ធុងទឹក ឆ្នាំង ស្លាបព្រា ចាន កាំបិត កំសៀវទឹក កែវទឹក សាប៊ូដុំ ភួយ កន្ទេល អង្រឹង ពោង ចង្ក្រាន អុស ធ្យូង ដែកកេះ ក្រណាត់កៅស៊ូ (តង់) ប៊ីដុងទឹក ចបកាប់ ចបជីក ឬស្សីសម្រាប់ធ្វើក្បូន ជាដើម។

មិនតែប៉ុណ្ណោះ ត្រូវត្រៀមថ្នាំចាំបាច់មួយចំនួនសម្រាប់ព្យាបាលជំងឺបន្តិចបន្តួច រួមមាន ថ្នាំប៉ារ៉ាសេតាម៉ុល សម្រាប់គ្រុនផ្ដាសាយធម្មតា និងថ្នាំជាតិស័ង្កសីប្រើសម្រាប់ជំងឺរាគ ។ លើសពីនេះ រៀបចំរបប់របរក្មេងលេង សៀវភៅ និងសម្ភារផ្សេងៗទៀតសម្រាប់កុមារ។ ម៉្យាងវិញទៀត ត្រូវទុកដាក់ឯកសារសំខាន់ៗឱ្យមានសុវត្ថិភាព ជាពិសេសអត្តសញ្ញាណប័ណ្ណ សំបុត្រកំណើត ត្រូវទុកដាក់នៅក្នុងថង់ ឬប្រអប់រជ័របិទជិតដែលអាចការពារកុំឱ្យទទឹក ឬសើមបាន។

• ការត្រៀមបង្ការសម្រាប់ស្ត្រីមានផ្ទៃពោះ និងផែនការសម្រាលកូនដោយសុវត្ថិភាព

ចំពោះការត្រៀមបង្ការសម្រាប់ស្ត្រីមានផ្ទៃពោះ និងផែនការសម្រាលកូនដោយសុវត្ថិភាព រួមមាន៖

• បន្តការតាមដាន និងពិនិត្យផ្ទៃពោះតាមការណាត់របស់មណ្ឌលសុខភាព និងត្រូវដឹងឱ្យបានច្បាស់ពីថ្ងៃខែដែលត្រូវសម្រាលកូន
• សន្សំប្រាក់មួយចំនួនដើម្បីទុកសម្រាប់ពេលសម្រាលកូន និងក្រោយពេលសម្រាល
• ត្រូវត្រៀមសម្ភារចាំបាច់សម្រាប់ប្រើប្រាស់ក្នុងពេលសម្រាលដូចជា សំពត់ កន្សែងខោអាវកូន ស្រោមដៃ ស្រោមជើងសាប៊ូ បំពង់ទឹកក្តៅ កន្ថោរ។ល។
• ត្រៀមរកអ្នកមកជួយថែទាំនៅពេលសម្រាលពិភាក្សាឯកភាពគ្នានៅក្នុងគ្រួសារពីទីកន្លែងដែលត្រូវសម្រាលកូនដូចជានៅមន្ទីរពេទ្យឬមណ្ឌលសុខភាពណា?
• ត្រៀម ឬពិភាក្សាពីមធ្យោបាយធ្វើដំណើរនៅពេលឈឺពោះសម្រាលដូចជា ទូក កាណូត ឡាន ឬមធ្យោបាយផ្សេងទៀតដែលមាន។
• ប្រសិនបើមានការចាំបាច់ត្រូវត្រៀមរៀបចំកន្លែងស្នាក់នៅមុនពេលសម្រាលកូនជិតមណ្ឌលសុខភាពដើម្បីងាយស្រួលក្នុងការធ្វើដំណើរនៅពេលឈឺពោះសម្រាល។

• អ្វីដែលក្រុមគ្រួសារ និងសហគមន៍អាចធ្វើបានដើម្បីបរិស្ថានស្អាត និងមានសុវត្ថិភាព

ជាមួយគ្នានេះ  អ្វីដែលក្រុមគ្រួសារ និងសហគមន៍អាចធ្វើបានដើម្បីបរិស្ថានស្អាត និងមានសុវត្ថិភាព មុនពេលមានទឹកជំនន់ រួមមាន៖

• ត្រូវធ្វើរបងព័ទ្ធជុំវិញស្រះ បឹង ត្រពាំង ឬកន្លែងមានទឹកជ្រៅ។
• ធ្វើរបងជាមួយសម្ភារដែលអាចរកបានព័ទ្ធជុំវិញផ្ទះ ជាពិសេសនៅជិតកន្លែងដែលមានទឹកហូរដើម្បីកាត់បន្ថយកម្លាំងទឹកហូរ។
• ថែរក្សាបរិស្ថានឱ្យបានស្អាតកុំឱ្យមានសំរាម និងលាមកមនុស្ស/សត្វ ។ ត្រូវធ្វើការសម្អាតម្តង ឬពីរដងក្នុងមួយអាទិត្យ និងត្រូវប្រាប់អ្នកជិតខាងឱ្យធ្វើដូចយើងដែរ។
• សាងសង់បង្គន់ មានលក្ខណៈងាយស្រួលសម្រាប់ស្ត្រីមានផ្ទៃពោះ កុមារតូចៗ មនុស្សចាស់ និងសមាជិកគ្រួសារដែលពិការ។

២. អំឡុងពេលមានទឹកជំនន់

តើត្រូវអនុវត្តដូចម្តេចក្នុងអំឡុងពេលមានទឹកជំនន់?

ប្រការគួរយកចិត្តទុកដាក់ក្នុងអំឡុងពេលមានទឹកជំនន់ រួមមាន៖

• មិនត្រូវចូលក្នុងផ្ទះចាស់ ឬអាគារសាលារៀនទ្រុឌទ្រោមដែលអាចស្រុត បាក់បែកបង្កគ្រោះថ្នាក់
• មិនត្រូវប៉ះពាល់គ្រឿងប្រើប្រាស់អគ្គីសនីដោយដៃសើម ឬកំពុងឈរនៅក្នុងទឹក
• ត្រូវបន្តយកចិត្តទុកដាក់តាមដានស្តាប់ព័ត៌មានពីស្ថានភាពវិវឌ្ឍន៍នៃទឹកជំនន់តាមវិទ្យទូរទស្សន៍ ផ្ទាំងរូបភាពផ្សព្វផ្សាយ សារតាមទូរស័ព្ទចល័ត ការនិយាយគ្នាពីមាត់មួយទៅមាត់មួយ តាមរយៈអាជ្ញាធរមូលដ្ឋាន និងព្យាករណ៍អាកាសធាតុ
• ត្រូវត្រៀមលក្ខណៈជាស្រេចដើម្បីជម្លៀសទៅរកទីទួលសុវត្ថិភាពក្នុងករណីចាំបាច់
• ត្រូវយកប្រដាប់ប្រដាតាមខ្លួនដូចជា៖ ពោង កាដុង ដែលអាចជួយយើងបាននៅពេលលង់ទឹករាល់ពេលចេញពីផ្ទះ
• ត្រូវបន្ថយល្បឿនទូក ម៉ាស៊ីន ឬកាណូតពេលធ្វើដំណើរនៅជិតទូកតូចៗ
• ត្រូវមានភ្លើងបំភ្លឺនៅពេលធ្វើដំណើរដោយជិះទូក ឬកាណូតនៅពេលយប់។

• ការយកចិត្តទុកដាក់ជាពិសេសចំពោះស្ត្រីមានផ្ទៃពោះអំឡុងពេលមានទឹកជំនន់

ចំពោះការយកចិត្តទុកដាក់ជាពិសេសចំពោះស្ត្រីមានផ្ទៃពោះអំឡុងពេលមានទឹកជំនន់ ត្រូវបន្តការតាមដាន និងពិនិត្យផ្ទៃពោះតាមការណាត់របស់មណ្ឌលសុខភាព និងត្រូវដឹងច្បាស់ពីថ្ងៃខែដែលត្រូវសម្រាលកូន និងត្រូវផ្ដល់ព័ត៌មានដល់សមាជិកគ្រួសារ និងសាច់ញាតិ។ លើសពីនេះ រកទីតាំងស្នាក់នៅជិតមណ្ឌលសុខភាព ឬមន្ទីរពេទ្យសម្រាប់ពេលសម្រាល។ ប្រសិនបើថ្ងៃខែដែលត្រូវសម្រាលកូនខិតជិតមកដល់ត្រូវច្បាស់ថាម្ចាស់មធ្យោបាយធ្វើដំណើរដែលអ្នកបានកំណត់ដឹងពីពេលវេលានេះ និងត្រៀមលក្ខណៈរួចជាស្រេច។

ដូច្នេះ ស្ត្រីមានផ្ទៃពោះ កុមារតូចៗ មនុស្សចាស់ និងសមាជិកគ្រួសារដែលពិការត្រូវការការយកចិត្តទុកដាក់ជាពិសេស និងការថែទាំបន្ថែមទៀតពីព្រោះថាផលវិបាកនៃគ្រោះមហន្តរាយ ឬក៏គ្រោះទឹកជំនន់នឹងធ្វើឱ្យពួកគេកាន់តែងាយរងគ្រោះដែលតម្រូវឱ្យពួកគេកាន់តែត្រូវការអ្នកជួយមើលថែ។

• ការយកចិត្តទុកដាក់ជាពិសេសចំពោះកុមារតូចៗអំឡុងពេលមានទឹកជំនន់

សម្រាប់ការយកចិត្តទុកដាក់ជាពិសេសចំពោះកុមារតូចៗអំឡុងពេលមានទឹកជំនន់ គឺត្រូវប្រាកដថាកូនៗរបស់អ្នកបានទទួលថ្នាំបង្ការ មីក្រូសារជាតិបន្ថែម និងថ្នាំទម្លាក់ព្រូនតាមកាលកំណត់របស់គ្រូពេទ្យ។ លើសពីនេះ ផ្តល់អាហារដល់កូនៗរបស់អ្នកឱ្យបានត្រឹមត្រូវ គឺអាចជួយគេឱ្យនៅតែមានសុខភាពល្អក្នុងពេលដ៏លំបាកនេះ។ ប្រសិនបើកូនរបស់អ្នកអាយុតិចជាង ៦ខែ ត្រូវបន្តបំបៅកូនដោយទឹកដោះសុទ្ធតែមួយមុខគត់ ហើយប្រសិនបើកូនរបស់អ្នកអាយុ ៦ខែដល់២៤ខែ ត្រូវបន្តបំបៅដោះ និងត្រូវផ្តល់អាហារបន្ថែមដល់កូន។

លើសពីនេះ ឪពុកម្ដាយត្រូវមានពេលវេលាខ្លះសម្រាប់កូនៗដើម្បីលេងជាមួយពួកគេ គូររូបនិយាយរឿង ហើយសួរពីអារម្មណ៍របស់ពួកគេ និងផ្តល់ភាពកក់ក្ដៅដល់ពួកគេជារៀងរាល់ពេល ។ ប្រសិនបើទីកន្លែងមានសុវត្ថិភាព អនុញ្ញាតឱ្យពួកគេលេងជាមួយក្មេងដទៃទៀត។ ប្រសិនបើអាចធ្វើបានត្រូវតែបន្តឱ្យកូនតូចៗរបស់អ្នកទៅរៀនសាលាមតេយ្យ។ ត្រូវត្រៀមទូកដើម្បីដឹកជញ្ជូនកូនៗរបស់អ្នកទៅ និងត្រឡប់មកពីសាលារៀនវិញជារៀងរាល់ពេល។

• ការយកចិត្តទុកដាក់ជាពិសេសចំពោះមនុស្សចាស់

ចំពោះការយកចិត្តទុកដាក់ជាពិសេសចំពោះមនុស្សចាស់ គឺត្រូវជួយមនុស្សចាស់ៗក្នុងគ្រួសាររបស់អ្នក និងចាស់ៗដែលនៅជិតខាង ជាពិសេសចាស់ជរាដែលជាមេគ្រួសារ ឬក៏អ្នករស់នៅតែម្នាក់ឯង។ លើសពីនេះ លើកទឹកចិត្តឱ្យមានការចូលរួមពីចាស់ៗគ្រប់រូបក្នុងការសម្រេចចិត្តនានាព្រោះពួកគាត់អាចមានបទពិសោធន៍ និងចំណេះដឹងច្រើនដើម្បីចែករំលែកក្នុងការរស់រានមានជីវិត និងការធ្វើឱ្យប្រសើរឡើងវិញក្រោយពេលមានគ្រោះមហន្តរាយ។ បន្ថែមពីនេះ សម្រាប់ការយកចិត្តទុកដាក់ជាពិសេសចំពោះសមាជិកគ្រួសារ រួមទាំងកុមារពិការ គឺអាចជួយ និងផ្ដល់ការគាំទ្រដូចជា ឈើច្រត់ រទេះរុញ ឬក៏ថ្នាំពេទ្យមួយចំនួនដែលជាតម្រូវការជាប្រចាំរបស់ពួកគាត់។ល។

នៅអំឡុងពេលទឹកជំនន់ ជំងឺរាគ ជំងឺរាគមួល និងជំងឺរលាកផ្លូវដង្ហើមស្រួចស្រាល គឺជាជំងឺដែលតែងតែកើតញឹកញាប់ដែលបណ្ដាលមកពី កង្វះទឹកស្អាត កង្វះអនាម័យផ្ទាល់ខ្លួន និងអនាម័យបរិស្ថាន ព្រមទាំងកង្វះបង្គន់ប្រើប្រាស់។ កុមារតូចៗនឹងចុះស្គមព្រមទាំងខ្សោយនៅពេលពួកគេមានជំងឺដែលបង្កឱ្យពួកគេងាយប្រឈមទៅនឹងជំងឺផ្សេងៗទៀត។ ដូច្នេះ ការផ្ដល់អាហារូបត្ថម្ភគ្រប់គ្រាន់ត្រឹមត្រូវ និងអនុវត្តអនាម័យល្អ គឺមានសសារៈសំខាន់ដូចគ្នាដែលអាចបង្ការជំងឺឆ្លងនានា។

ដើម្បីអាចទទួលបានទឹកស្អាតប្រើប្រាស់តាមគ្រួសារ មានវិធីសាស្រ្តសាមញ្ញដែលអាចអនុវត្ត រួមមាន វិធីធ្វើទឹកឱ្យរងដោយទុកឱ្យកករធ្លាក់ចុ, វិធីធ្វើទឹកឱ្យរងដោយប្រើសាច់ជូរ, វិធីធ្វើទឹកឱ្យរងដោយប្រើធុងចម្រោះ, វិធីធ្វើទឹកឱ្យរងដោយប្រើថ្នាំក្លរីន និងការដាំទឹកឱ្យពុះ។

៣. ក្រោយពេលមានទឹកជំនន់

តើកិច្ចការសំខាន់ៗអ្វីខ្លះដែលត្រូវអនុវត្តក្រោយពេលមានទឹកជំនន់?

ទោះបីជាទឹកចាប់ផ្តើមស្រកទៅវិញក៏ដោយប៉ុន្តែបញ្ហាមិនទាន់បញ្ចប់នៅឡើយទេ។ ប្រការគួរយកចិត្តទុកដាក់ និងអនុវត្តក្រោយពេលមានទឹកជំនន់ រួមមាន៖

• តាមដានស្តាប់ព័ត៌មាន ជាពិសេសស្តាប់ការណែនាំរបស់អាជ្ញាធរមូលដ្ឋានថា តើយើងអាចត្រឡប់ទៅកាន់លំនៅដ្ឋានវិញដោយសុវត្ថិភាពហើយឬនៅ?
• ពេលដែលទៅដល់លំនៅដ្ឋានត្រូវពិនិត្យបរិវេណជុំវិញផ្ទះ និងក្នុងផ្ទះដោយយកចិត្តទុកដាក់ដូចជា ពិនិត្យក្រែងមានគ្រាប់ ឬកាកសំណល់ជាតិផ្ទុះនានាដែលអាចហូរមកតាមទឹកក្នុងពេលទឹកជំនន់។ ពិនិត្យមើលផ្ទះក្រែងមានបាក់ស្រុត ឬប្រេះសាំមុននឹងចូលទៅក្នុងផ្ទះត្រូវពិនិត្យដោយប្រុងប្រយ័ត្ន ក្រែងមានសត្វពស់ ឬសត្វអសិរពិសផ្សេងៗទៀត។ ប្រសិនបើមានប្រើប្រាស់សម្ភារអគ្គីសនី ត្រូវប្រុងប្រយ័ត្នបំផុតមុនពេលចាប់កាន់ឬប្រើប្រាស់របស់របរទាំងនោះដែលអាចមានគ្រោះថ្នាក់ខ្សែភ្លើងឆក់។
• ស្វែងយល់ពីបញ្ហាសុខភាព និងការបង្ការជំងឺនានាដែលអាចកើតមានក្រោយពេលទឹកស្រក។ ជំងឺមួយចំនួនដែលអាចកើតមានក្រោយពេលទឹកស្រករួមមាន ជំងឺរាគ (ញឹកញាប់) ជំងឺកមរមាស់ ជំងឺព្រូន និងជំងឺគ្រុនឈាម។ល។

ជាមួយគ្នានេះ ការអនុវត្តអនាម័យទូទៅជាប្រចាំនៅក្នុងគ្រួសារក្រោយពេលមានទឹកជំនន់ រួមមាន៖

• ផឹកទឹកមានសុវត្ថិភាព៖ ជានិច្ចកាលត្រូវផឹកទឹកមានសុវត្ថិភាព (ទឹកស្អាតគ្មានមេរោគ) ដូចជា៖ទឹកដាំពុះ ទឹកធុងចម្រះ ទឹកដាក់ថ្នាំក្លរីនជាដើម ។ល។
• លាងសម្អាតដៃជាមួយសាប៊ូ៖ ជានិច្ចកាលត្រូវលាងសម្អាតដៃជាមួយសាប៊ូឱ្យបានញឹកញាប់ជាពិសេសក្នុងពេលចាំបាច់មួយចំនួនដូចជា មុនពេលបរិភោគ ឬចាប់កាន់ចំណីអាហារ មុនពេលបញ្ចកអាហារកូន មុនពេលបំបៅដោះកូន ក្រោយពេលបន្ទោបង់ក្រោយពេលលាងសម្អាតគូទកូន ក្រោយពេលប៉ះពាល់វត្ថុកខ្វក់ ក៏ក្រោយពេលត្រឡប់មកពីធ្វើការក្រៅផ្ទះ។ល។
• ស្តារ និងសម្អាតអណ្តូងឡើងវិញមុននឹងប្រើប្រាស់៖ នៅពេលមានទឹកជំនន់ទឹកកខ្វក់បានហូរចូលទៅក្នុងអណ្តូងដែលធ្វើឲ្យទឹកក្នុងអណ្ដូងកខ្វក់ និងមានមេរោគ។
• ជួសជុល និងសាងសង់បង្គន់ឡើងវិញ៖ ជានិច្ចកាលត្រូវបន្ទោបង់ក្នុងបង្គន់។

ជារួមមក ការពារប្រសើរជាងព្យាបាល! ការត្រៀមបង្ការឱ្យបានត្រឹមត្រូវ អាចជួយអ្នកមិនឱ្យមានការខាតបង់ ឬខាងបង់តិចតួចក្នុងពេលជួបគ្រោះមហន្តរាយ៕