ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រសួងអប់រំ យុវជន និងកីឡា បានប្រកាសពីការរៀបចំធ្វើ «យុទ្ធនាការគាំទ្រការអប់រំឌីជីថលសម្រាប់សិស្សានុសិស្សនៅគ្រឹះស្ថានមធ្យមសិក្សារាជធានីភ្នំពេញ » ដែលនឹងប្រព្រឹត្តទៅនៅក្នុងខែកក្កដា ឆ្នាំ២០២៣នេះ នៅគ្រប់វិទ្យាល័យរដ្ឋទាំងអស់នៅរាជធានីភ្នំពេញ។
បើតាមការបញ្ជាក់របស់ក្រសួងអប់រំ យុទ្ធនាការនេះនឹងត្រូវអនុវត្តដោយ មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ ដោយមានកិច្ចសហការពីវិទ្យាស្ថានជាតិអប់រំ វិទ្យាស្ថានគរុកោសល្យរាជធានីភ្នំពេញ និងមន្ទីរអប់រំ យុវជន និងកីឡា រាជធានីភ្នំពេញ។
តាមរយៈយុទ្ធនាការនេះ គរុនិស្សិត នៃវិទ្យាស្ថានជាតិអប់រំ និងគរុសិស្ស នៃវិទ្យាស្ថានគរុកោសល្យរាជធានីភ្នំពេញ នឹងផ្តល់ជូនដល់សិស្សានុសិស្សពីថ្នាក់ទី១០ ដល់ថ្នាក់ទី១២ ដោយផ្តល់ការបណ្តុះបណ្តាលនៅតាមថ្នាក់រៀននីមួយៗដោយផ្ទាល់ លើប្រធានបទចំនួន៦ រួមមាន ៖ ១.ការស្វែងយល់ពីវិធីសាស្រ្តរៀន (Learning how to learn) ដោយសិស្សម្នាក់ៗអាចស្វែងរកឃើញវិធីសាស្រ្តរៀនដែលសមស្របសម្រាប់មេរៀន និងមុខវិជ្ជានីមួយៗ ក៏ដូចជាវិធីសាស្រ្តរៀនដែលសមស្របទៅតាមបុគ្គលិកលក្ខណៈរបស់ខ្លួន។
២.ការរៀនដោយស៊ីជម្រៅ (Enrichment Learning) ដោយប្រើប្រាស់ធនធានសិសក្សាចម្រុះ ៖ សិស្សម្នាក់ៗអាចចេះប្រើប្រាស់ធនធានសិក្សាសមស្រប ដើម្បីរៀនជាលក្ខណៈស្វ័យសិក្សា មុនពេលចូលរៀនក្នុងថ្នាក់ និងការរៀនលក្ខណៈសហការដោះស្រាយលំហាត់ បន្ទាប់ពីការរៀនក្នុងថ្នាក់រួច ក៏ដូចជាការហ្វឹកហាត់ ឬប្រតិបត្តិបន្ថែមជាមួយកិច្ចការផ្ទះ។
៣.ការរៀនតាមបែបពន្លឿន (Accelerated Learning) ៖ សម្រាប់សិស្សដែលរៀនយឺត ឬពុំសូវយល់ច្បាស់លើមេរៀន ឬខកខានពុំបានចូលរៀន ដោយការរៀនជាមួយធនធានសិក្សាដែលផលិតជាពិសេសសម្រាប់ការស្វែងយល់ជាពិស្តារលើមេរៀននីមួយៗ។
៤.ការបង្កើតក្លឹបសិក្សាសម្រាប់សិស្សរៀនយឺត (Study Club) ឬក្លឹបសិក្សាមុខវិជ្ជា (Interest Club) ៖ សិស្សអាចរួមគ្នាបង្កើតក្លឹបសិក្សាដោយមានសិស្សពូកែជួយបង្រៀនសិស្សដែលរៀនយឺត ឬសិស្សដែលមានចំណាប់អារម្មណ៍លើការសិក្សាដោយបង្កើតគម្រោង (Project Based Learning) ដើម្បីសិក្សាកាន់តែស៊ីជម្រៅ និងជាលក្ខណៈសហការ។
៥.ការបំប៉នសមត្ថភាពត្រៀមប្រឡងសញ្ញាបត្រមធ្យមសិក្សាទុតិយភូមិ ៖ សិស្សនឹងទទួលបានការពន្យល់ពីគន្លឹះសំខាន់ៗនៃការត្រៀមខ្លួនដើម្បីប្រឡង និងការណែនាំអំពីធនធានសិក្សាសំខាន់ៗ ដើម្បីបំប៉ន និងលើកកម្ពស់សមត្ថភាព។
៦.ការប្រើប្រាស់កម្មវិធីទូរស័ព្ទដៃ Duraseksa-ទូរសិក្សា ៖ សិស្សអាចទទួលបានធនធានសិក្សាដែលមានលក្ខណៈពេញលេញ (គ្រប់មេរៀន គ្រប់មុខវិជ្ជា គ្រប់កម្រិតថ្នាក់) ចំរុះ (ដែលមានច្រើនប្រភេទជាវីដេអូ សន្លឹកកិច្ចការ សៀវភៅមេរៀនសង្ខេប សៀវភៅលំហាត់អនុវត្ត…) និងសម្បូរបែប (ការរៀនដោយសង្ខេប ការរៀនជាមួយសំណួរ-ចម្លើយ ការរៀនជាមួយវីដេអូបង្រៀន ការធ្វើតេស្តសមត្ថភាពដោយខ្លួនឯង)។ បើតាមការបញ្ជាក់បន្ថែមរបស់ក្រសួងអប់រំ យុទ្ធនាការនេះ នឹងត្រូវអនុវត្តនៅតាមគ្រឹះស្ថានមធ្យមសិក្សារដ្ឋចំនួន៣៨ នៅក្នុងរាជធានីភ្នំពេញ ហើយសិស្សានុសិស្សជាង៤០ពាន់នាក់ដែលកំពុងសិក្សានៅកម្រិតមធ្យមសិក្សាទុតិយភូមិ នឹងទទួលការបណ្តុះបណ្តាលដោយគរុនិស្សិត និងគរុសិស្សស្ម័គ្រចិត្តចំនួន៣៦៧នាក់ ហើយដែលត្រូវចុះផ្ទាល់ទៅកាន់ថ្នាក់រៀនជិត ១០០០បន្ទប់៕
