ភ្នំពេញ – « យុវជនទាំងអស់នៅពេលចង់ធ្វើអ្វីក៏ដោយចាំបាច់ត្រូវមានឯករាជ្យហិរញ្ញវត្ថុ តាមរយៈការអាចរកលុយបានដោយខ្លួនឯង។ ទន្ទឹមគ្នានេះ យុវជនជនត្រូវដឹងច្បាស់អំពីរបៀបរកលុយ ហើយកុំដាក់ក្ដីរំពឹងលើអ្នកទទៃ ទើបមិនធ្វើខ្លួនឱ្យមានវប្បធម៌ពឹងផ្នែកហិរញ្ញវត្ថុអ្នកដទៃ»។ នេះបើតាមការលើកឡើងរបស់ បណ្ឌិត តាន់ មុនីវណ្ណ អគ្គនាយករងក្រុមហ៊ុនម៉ុង ឬទ្ធី គ្រុប នៅក្នុងកម្មវិធីបំណិនជីវិត ដែលរៀបចំ​ដោយ​សហភាពសហព័ន្ធយុវជន​កម្ពុជារាជធានីភ្នំពេញ។

លោកបណ្ឌិត តាន់ មុនីវណ្ណ មានប្រសាសន៍ថា សម្រាប់ប្អូនៗថ្នាក់ទី១២ បើមិនទាន់អាចរកលុយក៏មិនជាអ្វី ព្រោះជាពេលត្រូវត្រៀមប្រឡងបាក់ឌុប មិនគួរធ្វើការងារផ្ដេសផ្ដាស លើកលែងតែការងារនោះធ្វើហើយអាចមានពេលរៀន។ ផ្ទុយទៅវិញ ប្រសិនប្អូនៗរៀនចប់ប្រឡងជាប់ ចូលទៅរៀននៅមហាវិទ្យាល័យឆ្នាំទី១ក៏ដោយ គឺត្រូវរកប្រាក់ដោយធ្វើការងារក្រៅម៉ោង ដើម្បីមានប្រាក់ចំនូលផ្ទាល់ខ្លួន មិនពឹងផ្អែកលើឪពុកម្ដាយទាំងស្រុង ព្រមទាំងទទួលបានបទពិសោធន៍ការងារ។

បណ្ឌិត តាន់ មុនីវណ្ណ អគ្គនាយករងក្រុមហ៊ុនម៉ុង ឬទ្ធី គ្រុប

“នៅក្រៅប្រទេសគេមិនឱ្យនិស្សិតទៅរៀនអត់ធ្វើការងារក្រៅម៉ោងទេ និស្សិតច្រើនធ្វើជាអ្នករត់តុក៏មាន លក់ក៏មាន គឺត្រូវមានឯករាជ្យផ្នែកហិរញ្ញវត្តុ រកលុយដោយខ្លួនឯង កុំរំពឹងថាលុយមានអ្នកជួយឱ្យសោះ”

អគ្គនាយករងក្រុមហ៊ុនម៉ុង ឬទ្ធី គ្រុប រូបនេះ បន្ថែមថា លុយបើសន្សំមិនមែនមិនសល់នោះទេ ប៉ុន្តែលោក​មើលឃើញថាមនុស្សភាគច្រើនគ្មានទឹកចិត្តក្នុងការសន្សំ។  លោកបន្តថា សម្រាប់ការចាយវាយលើអាហារប្អូនៗ​គួរជ្រើសរើសហូបរបស់ណាដែលមានប្រូតេអ៊ីន ហាត់ប្រាណ គិតល្អ ។ លោកបណ្ឌិតបន្តថា ប្រសិនបើ​យើងហូបមិនគិត គឺអាចឈឺ ដូច្នេះ​សូម​កុំហូបរបស់ណាដែល​បំផ្លាញលុយចោល ដោយ​ត្រូវហូបរបស់ណាដែលមានប្រូតេអ៊ីនគ្រប់គ្រាន់ដើម្បីសល់លុយផង ព្រោះប្អូនៗនៅរៀន ត្រូវចេះសន្សំលុយ ហើយនៅពេលប្អូនៗសន្សំលុយបាននឹងមានទឹកចិត្តសន្សំបន្ថែមទៀត ។

បណ្ឌិត តាន់ មុនីវណ្ណ អគ្គនាយករងក្រុមហ៊ុនម៉ុង ឬទ្ធី គ្រុប

“សម្រាប់អាហារពេលព្រឹកខ្ញុំហូបអស់ត្រឹម២ពាន់រៀល ឬចូលដល់១ម៉ឺនរៀល គឺខ្ញុំហូបតែពងមាន់២គ្រាប់ បន្លែបន្តិចបន្តួច ទ្រូងមាន់ ហើយហាត់ប្រាណក៏អាចមានរាងកាយរឹងមាំ និងមិនងាយឈឺដែរ។”

បើតាមបណ្ឌិត តាន់ មុនីវណ្ណ លុយមានរបៀបក្នុងការរក មានរបៀបក្នុងការគ្រប់គ្រង និងមានរបៀបក្នុងការចាយវាយ ។ ទន្ទឹមគ្នានេះ មនុស្សភាគច្រើនមិនចេះរបៀបគ្រប់គ្រងលុយ និងមិនចេះចាយលុយបានត្រឹមត្រូវនោះទេ បានជាពេលខ្លះរកលុយក៏មិនបាន គ្រប់គ្រងលុយក៏មិនត្រឹមត្រូវ។

អគ្គនាយករងក្រុមហ៊ុនម៉ុង ឬទ្ធី គ្រុប លើកទឹកចិត្តទៅដល់សិស្ស និស្សិតទាំងអស់ ទោះបីឪពុកម្ដាយយើងមាន ក្រ មធ្យមប៉ុណ្ណាក៏ដោយ ប៉ុន្តែចំណេះដឹងហិរញ្ញវត្ថុមិនអាចមើលរំលងបានទេ ដោយ​ប្អូនៗត្រូវយកចិត្តទុកដាក់ឱ្យខ្លាំង និងកុំប្រហែសឱ្យសោះ៕