ភ្នំពេញ – អគ្គនាយកដ្ឋានអប់រំបណ្តុះបណ្តាលបច្ចេកទេស និង​វិជ្ជាជីវៈ នៃក្រសួងការងារ នៅព្រឹកថ្ងៃទី២៦ ខែមិថុនា ឆ្នាំ​២០២៣ បានប្រកាសដាក់​ឱ្យដំណើរការជាផ្លូវការ ប្រព័ន្ធជាតិវាយតម្លៃទទួលស្គាល់ការសិក្សា​ពីមុន ពីចម្ងាយ សម្រាប់ការ​វាយ​តម្លៃ​ផ្អែក​លើសមត្ថភាព និង​ផ្តល់គុណវុឌ្ឍិជាតិកម្ពុជា (National E-RPL Platform) ដើម្បីបង្កភាពងាយស្រួលទៅលើប្រព័ន្ធដែលមានស្រាប់ តាមរយៈការពង្រីកដំណើរការវាយតម្លៃឱ្យកាន់តែកៀកទៅនឹងកម្មករ និងពលករដែលមានជំនាញ។

ពិធីប្រកាសដាក់​ឱ្យដំណើរការប្រព័ន្ធជាតិវាយតម្លៃនេះ ធ្វើ​ឡើង​ក្រោមវត្តមាន ឯកឧត្តម ឡៅ ហ៊ីម រដ្ឋលេខាធិការ​ប្រចាំការ​ក្រសួងការងារ និង​បណ្តុះបណ្តាល​វិជ្ជាជីវៈ និង​លោកស្រី GWYNETH WONG នាយិកាប្រចាំប្រទេស អង្គការភ្លែនអន្តរជាតិកម្ពុជា។

ឯកឧត្តម ឡៅ ហ៊ីម រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គោលបំណងនៃការបង្កើតប្រព័ន្ធជាតិវាយតម្លៃនេះ ដើម្បីជួយដល់សិស្សានុសិស្ស និស្សិត កម្មករ និងពលករ ដែលទទួលបានជំនាញ ពីការអប់រំបណ្តុះបណ្តាលក្រៅប្រព័ន្ធ និងមិនផ្លូវការ អាចមានឱកាសមកទទួលការវាយតម្លៃសមត្ថភាពផ្ទាល់ខ្លួន ដើម្បីទទួលបាន វិញ្ញាបនបត្រគុណវុឌ្ឍិជាតិ ឬវិញ្ញាបនបត្រសមត្ថភាព ឬលិខិតបញ្ជាក់សមត្ថភាព ដែលអាច យកទៅប្រើប្រាស់ ក្នុងការស្វែងរកការងារ បង្កើនប្រាក់បៀវត្ស និងជាពិសេសអាចបន្ត ការអប់រំបណ្តុះបណ្តាល កម្រិតខ្ពស់បន្តបន្ទាប់ នៅតាមគ្រឹះស្ថានអប់រំ បណ្តុះបណ្តាល បច្ចេកទេស និងវិជ្ជាជីវៈសាធារណៈ ឯកជន សមាគម- អង្គការមិនមែនរដ្ឋាភិបាល ដែលនេះជាការចូលរួមចំណែក ក្នុងដំណើរការសិក្សា ពេញមួយជីវិត សម្រាប់ប្រជាពលរដ្ឋ កម្ពុជា។ ប្រព័ន្ធថ្មីនេះ ក៏អាចផ្តល់ដំណឹង អំពីការជ្រើសរើសបេក្ខជនប្រឡង ឬបេក្ខជន អាចចុះឈ្មោះ ស្នើសុំប្រឡងដោយខ្លួនឯង ព្រមទាំងអាចវាយតម្លៃសមត្ថភាព ផ្ទាល់ខ្លួន (ស្វ័យវាយតម្លៃ) ជាមុន ធៀបនឹងតម្រូវការសមត្ថភាពក្នុងស្តង់ដាជាតិ សមត្ថភាព ដើម្បីបញ្ជាក់ថា ខ្លួនពិតជាមានសមត្ថភាពគ្រប់គ្រាន់ សម្រាប់ការវាយតម្លៃនេះ។

លោកស្រី GWYNETH WONG នាយិកាប្រចាំប្រទេស អង្គការភ្លែនអន្តរជាតិកម្ពុជា មានប្រសាសន៍ថា ការអភិវឌ្ឍជំនាញយុវជនគឺចូលរួមចំណែកក្នុងការដោះស្រាយបញ្ហានៃកង្វះខាតក្នុងការទទួលបានជំនាញពាក់ព័ន្ធប្រកបដោយគុណភាព និងការងារសមរម្យរបស់យុវជនងាយរងគ្រោះ និងបោះបង់ការសិក្សា ជាពិសេស ក្មេងស្រី និងស្ត្រីវ័យក្មេងមកពីគ្រួសារក្រីក្រ ឬ មានពិការភាព ឬ មានហានិភ័យនៃការរៀបការនៅវ័យក្មេង ដែលពួកគេទាំងនោះមិនអាចបន្តការអប់រំមូលដ្ឋានរបស់ខ្លួន។

គួរ​ជំរាបជូនថា គិតក្នុងរយៈពេលជាង ២ឆ្នាំ កន្លងមកនេះ ក្រសួងការងារ បានដាក់ឱ្យ​ប្រើប្រាស់ជាផ្លូវការ ប្រព័ន្ធជាតិធំៗចំនួន២ តាមបែបឌីជីថល ទី១.គឺប្រព័ន្ធជាតិអប់រំ បណ្តុះបណ្តាលបចេ្ចសទេស និងវិជ្ជាជីវៈពីចម្ងាយ ឬតាមអនឡាញ និងទី២.គឺប្រព័ន្ធជាតិវាយតម្លៃទទួលស្គាល់ ការសិក្សាពីមុនពីចម្ងាយ សម្រាប់ការវាយតម្លៃ ផ្អែកលើសមត្ថភាព និងផ្តល់គុណវឌ្ឍិជាតិកម្ពុជា នាពេលនេះ៕