ភាពគ្មានផលិតភាពការងារអាចធ្វើឱ្យអ្នកមានអារម្មណ៍តានតឹង និងរអៀសខ្លួននៅកន្លែងធ្វើការ។ តាមការស្រាវជ្រាវបង្ហាញថា នៅពេលគ្មានផលិតភាពការងារ អ្នកធ្វើការនឹងមានអារម្មណ៍អស់កម្លាំង ហើយនឿយហត់ជាប្រចាំ ដែលមើលទៅទំនងជាមានកិច្ចការច្រើនលើសលប់ត្រូវធ្វើ ប៉ុន្តែមានពេលវេលាតិចតួច។ កត្តានេះធ្វើឱ្យជីវិតរបស់គេ មើលទៅដូចជាមានកិច្ចការបន្ទាន់ជាន់គ្នាផ្ទួនៗ ប៉ុន្តែមិនសូវឃើញលទ្ធផល។ បើតាមគេហទំព័រ Life Hack បានបង្ហាញពីមូលហេតុ ចំនួន៦ ដែលធ្វើឱ្យអ្នកទទួលអារម្មណ៍គ្មានផលិតភាពការងារ។

១. ទទួលការងារលើសសមត្ថភាព ៖ អ្នកនឹងងាយមានអារម្មណ៍ធុញថប់ នៅពេលដែលកិច្ចការដែលអ្នកត្រូវធ្វើ និងទទួលខុសត្រូវកើនឡើងច្រើន ហើយមិនមានពេលវេលាខ្លះសម្រាប់សម្រាក។ ឥទ្ធិពលនៃភាពធុញថប់ បណ្ដាលឱ្យអ្នកពិបាកសម្រេចចិត្តថា តើគួរធ្វើកិច្ចការមួយណាមុន ដែលអាចធ្វើឱ្យកាលវិភាគការងារជាប់គាំង ឬត្រូវពន្យារពេលធ្វើសកម្មភាព។ ជាមួយគ្នានេះ ភាពតានតឹង នៃការទទួលការងារលើសសមត្ថភាព​ នឹងនាំឱ្យអ្នកមានអារម្មណ៍ថា ខ្លួន​ឯងទន់ខ្សោយ ព្រមទាំងបណ្ដាលឱ្យផលិតភាពការងារធ្លាក់ចុះ។

២. អសមត្ថភាពគ្រប់គ្រងការំខានពីខាងក្រៅ ៖ សម័យអ៊ីនធឺណិត អ្នកធ្វើការអាចត្រូវបានរំខាននៅគ្រប់ទីកន្លែង ដែលក្នុងនោះយើងអាចរាប់ចាប់តាំងពីស្មាតហ្វូន ប្រព័ន្ធផ្សព្វផ្សាយសង្គម អ៊ីម៉ែល និងការជូនដំណឹង (notification)។ ដូច្នេះ ប្រសិនបើអ្នកមិនយល់ពីរបៀបគ្រប់គ្រង ឬទប់ទល់ជាមួយការរំខានទាំងនោះ អ្នកនឹងងាយបែកអារម្មណ៍ ងាកទៅធ្វើរឿងផ្សេង ដែលមិនមែនជាកិច្ចការអាទិភាព។

៣. ចង់លទ្ធផលល្អឥតខ្ចោះ ៖ ការចង់បានភាពល្អឥតខ្ចោះ ជាចំណែកមួយដែលរារាំងផលិតភាពការងារ។ ការទាមទារ ភាពល្អឥតខ្ចោះនៅគ្រប់កិច្ចការ អាចបណ្ដាលឱ្យអ្នកពន្យារពេលច្រើន និងធ្វើឱ្យល្បឿនការងារយឺតយ៉ាវ។ ដូច្នេះ ដើម្បីឱ្យល្បឿនការងារលឿនទាន់សភាពការណ៍ អ្នកគួរកាត់បន្ថយការផ្ដោតអារម្មណ៍លើភាពល្អឥតខ្ចោះ លើកិច្ចការមួយចំនួន។

៤. មិនកំណត់កិច្ចការអាទិភាព ៖ ការកំណត់កិច្ចការអាទិភាពមិនបានត្រឹមត្រូវ គឺជាហេតុផលមួយទៀត ធ្វើឱ្យផលិតភាពការងារធ្លាក់ចុះ ។ នៅពេលដែលអ្នកយល់ថា គ្រប់កិច្ចការទាំងអស់សុទ្ធតែជាកិច្ចការសំខាន់ អ្នកអាចនឹងធ្វើកិច្ចការនេះបន្តិច កិច្ចនោះបន្តិច ហើយលទ្ធផលចុងក្រោយ មិនទទួលបានផលជាដុំកំភួននលើកិច្ចការណាមួយទាំងអស់។ ដូច្នេះ នៅពេលកិច្ចការទាំងអស់សុទ្ធតែសំខាន់ អ្នកគួរសម្រេចចិត្តផ្ដោតអារម្មណ៍ធ្វើការងារស្នូលរបស់អ្នកឱ្យបានរួចរាល់ មុននឹងធ្វើកិច្ចការផ្សេងៗ។

៥. កម្លាំងមិនគ្រប់គ្រាន់ ៖ ដើម្បីសម្រេចកិច្ចការមួយបានល្អ យើងត្រូវការទាំងកម្លាំង និងពេលវេលា។ ការបំពេញការងារទាំងគ្មានកម្លាំងក្នុងខ្លួន នឹងធ្វើឱ្យអ្នកមិនអាចបំពេញការងារអស់ពីសមត្ថភាព។ ដូច្នេះ ការសម្រាកគ្រប់គ្រាន់ និងថែសុខភាពឱ្យបានល្អ គឺជាប្រភពថាមពលចម្បង​ដែលនាំឱ្យអ្នកមានសមត្ថភាពផ្ដោតអារម្មណ៍បានល្អ ផលិតការងារមានគុណភាព និងគុណផលខ្ពស់។

៦. គ្មានកម្លាំងជំរុញពីខាងក្នុង ៖ ការដែលមិនមានកម្លាំងជំរុញពីខាងក្នុង នឹងធ្វើឱ្យអ្នកពិបាកផ្ដោតអារម្មណ៍ និងប្ដេជ្ញាចិត្តក្នុងការបំពេញការងារឱ្យចប់ចុងចប់ដើម។ ក្រៅតែពីកត្តាខាងក្នុងដូចជា ការកំណត់គោលដៅច្បាស់លាស់ និងថាមពលក្នុងខ្លួន កត្តាខាងក្រៅមួយចំនួនក៏ជះឥទ្ធិពលចំពោះកម្លាំងជំរុញរបស់អ្នកធ្វើការដែរ ដែលកត្តាទាំងនោះមានដូចជា៖

• កង្វះការទទួលស្គាល់ ៖ ការខិតខំប្រឹងប្រែង ឬការចូលរួមចំណែកបំពេញការងារ ដែលមិនត្រូវបានកត់សម្គាល់ ឬទទួលស្គាល់ នឹងធ្វើឱ្យអ្នកធ្លាក់ចុះស្មារតីចូលរួម និងការប្រឹងប្រែង។
• ថ្លៃពលកម្មមិនគ្រប់គ្រាន់៖ ប្រាក់ចំណូល មិនសមាមាត្រទៅនឹងការលះបង់របស់បុគ្គលិក គឺជាហេតុផលចម្បងមួយ ដែលមានឥទ្ធិពលទៅលើផលិតភាពការងារ។ ដូច្នេះ ក្នុងកាលៈទេសៈ ដែលបុគ្គលិកទទួលបានចំណូលតិច ផលិតភាពការងាររបស់គេក៏ធ្លាក់ចុះដែរ។
• ឱកាសរីកចម្រើនមានកំណត់ ៖ កង្វះឱកាសសម្រាប់ការរីកចម្រើនក្នុងអាជីព ការអភិវឌ្ឍជំនាញ និងការលូតលាស់ផ្ទាល់ខ្លួន អាចនាំឱ្យបុគ្គលិកបាត់បង់ថាមពលជំរុញពីខាងក្នុង។ ដូច្នេះ ការបង្កើតបរិយាកាសការងារ ដែលផ្ដល់ឱកាសឱ្យបុគ្គលិកអភវិឌ្ឍសមត្ថភាព និងការលូតលាស់ ពិតជាសំខាន់សម្រាប់ការបង្កើនកម្លាំងជំរុញ ក្នុងការបំពេញការងារ៕