អត្តសញ្ញាណ ឬម៉ាកសញ្ញាផ្ទាល់ខ្លួន(Personal Branding) គឺជាការបង្ហាញឱ្យអ្នកដទៃបានស្គាល់អំពីចំណុចខ្លាំង ឬអ្វីដែលអ្នកមានរួមបញ្ចូលទាំងជំនាញ បទពិសោធន៍ និងបុគ្គលិកលក្ខណៈ ពិសេសៗរបស់ខ្លួនចេញទៅក្រៅ។ ការបង្ហាញអត្តសញ្ញាណផ្តល់គុណសម្បត្តិជាច្រើនសម្រាប់យុវជន អ្នកធ្វើការ ម្ចាស់អាជីវកម្ម និងក្រុមមនុស្សដទៃទៀត។ កាលណាមានគេស្គាល់ច្រើន នោះវិសាលភាពនៃឱកាសការងារ ទំនាក់ទំនងក្នុងសង្គម និងអាជីពបច្ចុប្បន្ន មានការផ្សាយចេញកាន់តែទូលំទូលាយ ។ យ៉ាងណាមិញ មានមនុស្សមួយចំនួនហាក់មិនហ៊ានបង្ហាញនោះទេ ទោះបីគាត់កំពុងមានតម្រូវការផ្នែកនេះក៏ដោយ ក្នុងហេតុផលថា ការបង្ហាញពីម៉ាកសញ្ញាផ្ទាល់ខ្លួនប្រៀបដូចជាការអួតអាងជាដើម។

បើតាមគេហទំព័រ morningbrew បានបង្ហាញគន្លឹះ៣ចំណុចដើម្បីផ្សាយអំពីអត្តសញ្ញាណខ្លួនឯងប្រកបដោយលក្ខណៈសាមញ្ញាៗ៖

១. ធ្វើខ្លួនជាអ្នកផ្តល់ឱ្យ ៖ បង្ហាញអំពីម៉ាកសញ្ញាផ្ទាល់ខ្លួនតាមរយៈសកម្មភាពដែលផ្តល់ទៅកាន់អ្នកដទៃដោយសុទ្ធចិត្ត ដូចជាការបង្រៀននូវអ្វីដែលអ្នកចេះទៅកាន់សហគមន៍ ដោយមិនរំពឹងការតបស្នង។ កាលដែលធ្វើបែបនេះ វាជាកត្តាពង្រីកឥទ្ធិពល និងទំនាក់ទំនងនៃបុគ្គលផ្ទាល់ក្នុងការបង្ហាញឱ្យគេបានឃើញពីគុណតម្លៃដែលអ្នកខំសាងឡើង ហើយអ្នកដែលទទួលបានការជ្រោមជ្រែងពីអ្នក គេអាចនឹងទទួលបានអារម្មណ៍រីករាយ ឬអាចនឹងចងចាំឈ្មោះរបស់អ្នកតាមរយៈសកម្មភាពទាំងនោះ ហើយក្នុងករណីនេះវាក៏ជំរុញឱ្យអ្នកទទួលបានអារម្មណ៍ល្អផងដែរ។

២. ស្វែងរកអ្នកប្រឹក្សា ៖ នៅក្នុងចំណុចនេះមើលទៅហាក់សាមញ្ញបន្តិច ព្រោះគ្រប់គ្នាសុទ្ធតែបានដឹង ប៉ុន្តែវានៅតែមានប្រសិទ្ធភាព។ ការស្នើសុំយោបល់ ឬប្រឹក្សាព័ត៌មានបន្ថែម អំពីអ្នកដែលមានឥទ្ធិពល ឬមនុស្សគំរូ រួមទាំងមនុស្សដែលអ្នកស្គាល់ វាមិនត្រឹមតែជាការរៀនសូត្រថ្មីៗនោះទេ ឆ្លៀតក្នុងឱកាសនោះចូរចែករំលែកគំនិតយោបល់របស់អ្នកបន្ថែមទៅកាន់ពួកគាត់ ឬពង្រឹងទំនាក់ទំនង និងបង្ហាញអំពីអ្វីដែលអ្នកចាប់អារម្មណ៍ ដើម្បីឱ្យអ្នកដទៃអាចស្គាល់អ្នកបានខ្លះក្នុងការទាក់ទងឱ្យធ្វើការងារនៅពេលក្រោយ។

៣. ឆ្ពោះទៅរកការផ្លាស់ប្តូរ ៖ ជ្រើសយកការបង្ហាញខ្លួនតាមរយៈសកម្មភាពមួយដែលប្រឈមនឹងឧបសគ្គ ហើយមានទស្សនៈឆ្ពោះទៅមុខជានិច្ច វាគឺជាវិធីមួយដែលនាំឱ្យគេស្គាល់ជាងមុន ហើយបង្កប់នូវការដាក់ខ្លួនទៀតផង។ អនុញ្ញាតឱ្យខ្លួនឯងមានឱកាសសាកល្បងបរិយាកាសថ្មីៗ ប៉ុន្តែអនុវត្តន៍ឱ្យស្ថិតនៅក្នុងដែនកំណត់មួយដែលអាចធ្វើបាន ដូចជា ការស្ម័គ្រចិត្តនៅក្នុងកម្មវីធីសហគមន៍ណាមួយដែលអ្នកមិនហ៊ានធ្វើពីមុនមក។ ទន្ទឹមគ្នានោះអ្នកអាចមានឱកាសអភិវឌ្ឍន៍សមត្ថភាព ខណៈមនុស្សក្នុងសហគមន៍ ឬក្នុងក្រុមក៏ចាប់អារម្មណ៍អ្នកដូចគ្នា ហើយពួកគាត់អាចនឹងទាក់ទងឱ្យទៅចូលរួមកម្មវិធីផ្សេងៗបន្តទៀតដែលស្របនឹងតម្រូវការរបស់អ្នក។ វិធីទាំងបីខាងលើ បញ្ជាក់ឱ្យឃើញថា ការផ្សាយ Personal Branding មិនមែនសកម្មភាពដែលឥតប្រយោជន៍ ឬអំនួតនោះទេ ប៉ុន្តែវាប្រៀបដូចជាកូនសោ នាំអ្នកទៅរកផ្លូវមួយដែលអាចពង្រីកវិជ្ជាជីវៈ និងការសម្រេចគោលដៅអ្វីមួយ ហើយបង្កើតបានទំនាក់ទំនង ដែលមានការផ្តល់តម្លៃឱ្យគ្នាទៅវិញទៅមក៕