ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ព្រឹត្តិការណ៍កីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះ មិនត្រឹមតែមានការអបអរពីប្រជាពលរដ្ឋ យុវជន និស្សិត សិស្សានុសិស្សនៅក្នុងប្រទេសប៉ុណ្ណោះទេ សម្រាប់និស្សិតកម្ពុជាដែលកំពុងសិក្សានៅបរទេស ទោះមិនបានមកចូលរួមដោយផ្ទាល់ ក៏បានសម្តែងនូវមោទនភាព ចំពោះព្រឹត្តិការណ៍ជាប្រវត្តិសាស្រ្តកម្ពុជាមួយនេះ។
លោក តាន់ ស៊ីវុត្ថា និស្សិតអាហារូបករណ៍កំពុងសិក្សានៅសហរដ្ឋអាមេរិកបានលើកឡើងថា សម្រាប់ព្រឹត្តិការណ៍កីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះនេះ លោកបានឃើញការសម្ដែងបើកព្រឹត្តិការណ៍កីឡា SEA Game ធ្វើឱ្យលោកពិតជាមានមោទនភាព និងភាពរីករាយក្រៃលែងដែលថ្នាក់ដឹកនាំបានយកចិត្តទុកដាក់នូវចំណុចទាំងនេះ។
លោកបានបន្ថែមថា ប្រសិនជាមានឱកាសមកកម្ពុជា លោកនឹងទៅធ្វើការគាំទ្រដោយផ្ទាល់ដើម្បីលើកទឹកចិត្តដល់កីឡាករកម្ពុជាទាំងអស់តំណាងឱ្យកម្ពុជាផងដែរ ។ តែទោះជាយ៉ាងណា ត្បិតមិនបានមកចូលរួមគាំទ្រផ្ទាល់ ប៉ុន្តែលោក និងនិស្សិតខ្មែរដទៃទៀតដែលកំពុងសិក្សានៅក្រៅប្រទេសក៏បានតាមដានការប្រកួតនានា និងគាំទ្រតាមរយៈការផ្សាយផ្ទាល់នៅក្នុងបណ្ដាញសង្គមផងដែរ ។
លោក តាន់ ស៊ីវុត្ថា
” ខ្ញុំពិតជារំភើបចិត្តណាស់នៅពេលបានឃើញកូនខ្មែរជាច្រើនរូបដែលមានស្រុកកំណើតនៅក្នុងប្រទេស និងបានកើតនៅក្រៅប្រទេសដែលបានខិតខំប្រឹងប្រែងពង្រឹងសមត្ថភាពសម្រាប់ប្រកួតតំណាងកម្ពុជា និងដណ្ដើមមេដាយផ្សេងៗជូនជាតិផង”
លោក តាន់ ស៊ីវុត្ថា សូមលើកទឹកចិត្តដល់ប្រជាជនកម្ពុជាគ្រប់រូបបន្តគាំទ្រដល់កីឡាករកម្ពុជាគ្រប់ប្រភេទកីឡាទាំងអស់ ព្រោះអត្តពលិកកម្ពុជានឹងមិនមែនប្រកួតត្រឹមកីឡាអាស៊ីអាគ្នេយ៍នោះទេ គឺនឹងមាននៅព្រឹត្តិការណ៍កីឡាបន្តបន្ទាប់ទៀត ក៏ដូចជាកីឡា SEA Game បន្តបន្ទាប់ផងដែរ ។
ចំណែក កញ្ញា ថេង ម៉េងហ៊ួង ជានិស្សិតកំពុងសិក្សានៅប្រទេសបារាំងបានលើកឡើងថា កញ្ញាពិតជាមានមោទនភាព និងសប្បាយចិត្តជាខ្លាំងដែលប្រទេសកម្ពុជាបានធ្វើជាម្ចាស់ផ្ទះ និងបានមើលឃើញពីការសាមគ្គី និងស្មារតីគាំទ្ររបស់ប្រជាជនខ្មែរចំពោះកីឡាករគ្រប់រូបរួមទាំងកីឡាករខ្មែរ និងកីឡាករបរទេសដែលហៅថា ស្មារតីកីឡា ។ កញ្ញា ម៉េងហ៊ួង បន្តថា កញ្ញាពិតជាចង់មានឱកាសចូលរួមគាំទ្រដោយផ្ទាល់ក្នុងព្រឹត្តិការណ៍កីឡាអាស៊ីអាគ្នេយ៍នេះ ព្រោះជាឱកាសដ៏កម្រសម្រាប់កម្ពុជា និងជាឱកាសដែលកម្ពុជាត្រូវបង្ហាញអំពីអ្វីដែលកម្ពុជាមានទៅកាន់អន្តរជាតិបានស្គាល់កាន់តែច្បាស់ ។
កញ្ញា ថេង ម៉េងហ៊ួង
“បើមានឱកាស ខ្ញុំនឹងដាក់ពាក្យស្នើធ្វើជាអ្នកស្ម័គ្រចិត្តដើម្បីរួមចំណែកជួយសម្រួលការងារដែលអាចធ្វើបាន និងអាចទទួលបានបទពិសោធន៍ថ្មីៗផងដែរ”
កញ្ញា ម៉េងហ៊ួង ក៏លើកទឹកចិត្តដល់ប្រជាជនកម្ពុជា និងយុវជនទាំងអស់សូមរក្សាសណ្ដាប់ធ្នាប់ ភាពថ្លៃថ្នូ និងធ្វើការស្វាគមន៍យ៉ាងកក់ក្ដៅចំពោះភ្ញៀវបរទេសដែលមកទស្សនា និងគាំទ្រកីឡាកររបស់គេផងដែរ ។ កញ្ញាបានបន្តថា យុវជនគួរតែបន្តភាពរួសរាយរាក់ទាក់ និងការស្វាគមន៍ក្នុងនាមជាម្ចាស់ផ្ទះ ជាពិសេសមិនគួរបង្ហាញសកម្មភាពកាយវិការ ឬភាសាសម្ដីដែលមិនសមរម្យឡើយ ។ ជារួម យុវជនកម្ពុជាទាំង២រូបនេះក៏សូមថ្លែងអំណរគុណដល់ថ្នាក់ដឹកនាំដែលបានយកចិត្តទុកដាក់ដល់អត្តពលិក និងអ្នកពាក់ព័ន្ធជាតិ និងអន្តរជាតិទាំងការស្នាក់នៅ ការហូបចុក ការធ្វើដំណើរជាដើម ដែលអាចធ្វើភ្ញៀវបរទេសបានឃើញពីតម្លៃនៃការទទួលភ្ញៀវក្នុងនាមជាម្ចាស់ផ្ទះ និងការរក្សាឥរិយាបទល្អផងដែរ ៕
