ភ្នំពេញ – យុវជនស្ម័គ្រចិត្តគ្រប់ផ្នែក បានក្លាយជាកម្លាំងចលករយ៉ាងសំខាន់ ក្នុងការជំរុញ និងសម្របសម្រួលឱ្យព្រឹត្តិការណ៍ស៊ីហ្គេមលើកទី៣២នៅកម្ពុជា ដំណើរការទៅដោយរលូន និងជោគជ័យ។ ក្រោយពីដំណើរការរយៈពេលកន្លះខែ ស៊ីហ្គេមនៅកម្ពុជា ទទួលបានការចាប់អារម្មណ៍យ៉ាងខ្លាំង ពីសំណាក់សាធារណៈជនជាតិ និងអន្តរជាតិ ដោយមតិភាគច្រើនបានកោតសរសើរចំពោះការរៀបចំបានយ៉ាងល្អរបស់ក្រុមការងារ។ ការទទួលលទ្ធផលជាទីគាប់ចិត្តនេះ យើងមិនអាចមើលរំលងការរួមចំណែកដ៏ធំរបស់យុវជនស្ម័គ្រចិត្តនោះទេ។ ទន្ទឹមនឹងការចូលរួមចំណែកសម្របសម្រួលព្រឹត្តិការណ៍នេះ យុវជនស្ម័គ្រក៏ទទួលបានបទពិសោធន៍ថ្មីៗពីកម្មវិធីផងដែរ។

លោក ងួន រ៉ាមី ជាបុគ្គលិកក្រុមហ៊ុនឯកជនមួយកន្លែង ដែលកាន់តួនាទីផ្នែក (W&D) Operation បានបង្ហាញអារម្មណ៍រីករាយជាខ្លាំង ដែលបានក្លាយជាចំណែកមួយ ដើម្បីសម្របសម្រួលព្រឹត្តិការណ៍ស៊ីហ្គេម។ ក្រៅពីការបំពេញការងាររបស់ខ្លួន លោកបានឆ្លៀតធ្វើជាយុវជនស្ម័គ្រចិត្តផ្នែកបដិសណ្ឋាកិច្ច។ លោកបានលើកឡើងថា «ខ្ញុំចង់ធ្វើជាអ្នកស្ម័គ្រចិត្ត ព្រោះចង់ដឹងថា ខ្ញុំអាចជួយអ្វីបានខ្លះសម្រាប់ព្រឹត្តិការណ៍ស៊ីហ្គេម ព្រោះកម្ពុជាខកខានឱកាសនេះអស់រយៈពេល ៦៤ឆ្នាំកន្លងទៅហើយ។» ម្យ៉ាង ខ្ញុំចង់ដឹងថា តើមានអ្វីផ្សេងទៀត ដែលជាប់ពាក់ព័ន្ធនឹងរឿងកីឡា ព្រមទាំងចង់យល់ដឹងពីរបៀបធ្វើការងារបន្ថែម ពិសេសការបំពេញការងារជាក្រុម។ បទពិសោធន៍ ដែលខ្ញុំទទួលបានពីការងារស្ម័គ្រចិត្តក្នុងព្រឹត្តិការណ៍ស៊ីហ្គេម គឺខ្ញុំបានយល់ដឹងបន្ថែមអំពីរបៀបណែនាំ និងការផ្ដល់ព័ត៌មានផ្សេងៗទៅកាន់ភ្ញៀវជាតិ និងអន្តរជាតិ។

ដោយឡែក កញ្ញា សាវន វិច្ឆរា ជានិស្សិតឆ្នាំទី១ ជំនាញទេសចរណ៍ នៃសាកលវិទ្យាល័យភូមិន្ទភ្នំពេញបានបង្ហាញមតិផ្ទាល់ខ្លួនថា «វាជាមោទនភាពមួយក្នុងនាមខ្ញុំជាកូនខ្មែរ ដែលមានឱកាសបានចូលរួមស្ម័គ្រចិត្តនៅក្នុងព្រឹត្តិការណ៍ស៊ីហ្គេម។» កញ្ញាជាយុវជនស័្មគ្រចិត្តផ្នែក​ កាន់ស្ដុកអាហារសម្រាប់អត្តពលិក ហើយមូលហេតុ ដែលកញ្ញាសម្រេចចិត្តធ្វើជាអ្នកស្ម័គ្រចិត្ត ព្រោះចង់ក្លាយជាចំណែកមួយក្នុងការមើលការខុសត្រូវដំណើរការព្រឹត្តិការណ៍នេះឱ្យប្រព្រឹត្តិទៅដោយរលូន ព្រមទាំងចង់ទទួលបានបទពិសោធន៍ថ្មីៗក្នុងព្រឹត្តិការណ៍លំដាប់អន្តរជាតិ។ វិច្ឆរា លើកឡើងថា ម្យ៉ាងនេះ ជាលើកទី១ ដែលកម្ពុជាធ្វើជាម្ចាស់ផ្ទះ ហេតុនេះក្នុងនាមជាកូនខ្មែរមួយរូប ប្រសិនបើមានឱកាសធ្វើអ្វីមួយបានសម្រាប់ជាតិ នាងត្រូវតែធ្វើ។ យុវជនរូបនេះបន្ថែម «អ្វីដែលខ្ញុំបានរៀនសូត្រពីការស្ម័គ្រចិត្ត គឺរបៀបដឹកនាំក្រុមរបស់មេក្រុម ទាំងចរិតលក្ខណៈដឹកនាំ និងការទទួលខុសត្រូវចំពោះការងារ។»

កញ្ញា គង់ ស្រីនីន ជានិស្សិតឆ្នាំទី១ ជំនាញគ្រប់គ្រងពាណិជ្ជកម្មអន្តរជាតិ នៃសាកលវិទ្យាល័យភូមិន្ទភ្នំពេញ និងជាយុវជនស័្មគ្រនៅផ្នែកគណៈកម្មការបរទេស បានបង្ហាញមូលហេតុ ដែលសម្រេចចិត្តចូលរួមក្នុងព្រឹត្តិការណ៍នេះថា ព្រោះនាងចង់ចូលរួមចំណែកក្នុងសង្គមកម្ពុជា ដើម្បីផ្សព្វផ្សាយពីវប្បធម៌ អរិយធម៌របស់កម្ពុជាទៅកាន់ភ្ញៀវបរទេស។ ក្រៅពីនេះ ស្រីនីន ក៏បានរៀនសូត្រអំពីរបៀបទំនាក់ទំនងជាមួយភ្ញៀវបរទេស ជាពិសេសគឺការសន្ទនាជាភាសាអង់គ្លេស និងថៃជាមួយសាសន៍ដទៃ។ «ម្យ៉ាងទៀត ខ្ញុំក៏បានចូលរួមចំណែកក្នុងការផ្សព្វផ្សាយអំពីម្ហូបអាហារខ្មែរទៅកាន់បរទេសផងដែរ ព្រោះមានឱកាសធ្វើការផ្ទាល់ជាមួយគណៈកម្មការកីឡា។ លើលពីនេះកញ្ញា ក៏បានចូលរួមជូនក្រុមកីឡាករយូដូ ដើម្បីធ្វើដំណើរកម្សាន្តក្នុងរាជធានីភ្នំពេញ ដើម្បីទស្សនាព្រះបរមរាជវាំង មាត់ទន្លេ និងវិមានឯករាជ្យផងដែរ»។

ជាចុងក្រោយ យុវជនទាំងបីរូប បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានខិតខំប្រឹងប្រែងអភិវឌ្ឍជាតិរហូតមានលទ្ធភាពទទួលធ្វើជាម្ចាស់ផ្ទះកម្មវិធីលំដាប់អន្តរជាតិ។ ជាពិសេស អ្នកទាំងបីពិតជារីករាយ ដែលគណៈគ្រប់គ្រងស៊ីហ្គេមបានផ្ដល់ឱកាសអ្នកស្ម័គ្របានចូលរួមចំណែកក្នុងការជួយជាតិរបស់ខ្លួន៕