ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ព្រឹត្តិការណ៍នៃការប្រកួតកីឡាអាស៊ីអាគ្នេយ៍ ឬស៊ីហ្គេម ឆ្នាំ២០២៣ បានក្លាយជាព្រឹត្តិការណ៍ប្រវត្តិសាស្ត្រសម្រាប់កម្ពុជា និងមហាគ្រួសារខ្មែរទូទាំងប្រទេស។ ចំពោះទីតាំងសក្កានុពលដែលត្រូវបានជ្រើសរើសសម្រាប់ប្រកួតព្រឹត្តិការណ៍ស៊ីហ្គេម គណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) បានកំណត់ជ្រើសរើសរាជធានី និងខេត្តចំនួន ៥ រួមមាន រាជធានីភ្នំពេញ ខេត្តសៀមរាប ព្រះសីហនុ កែប និងខេត្តកំពត ដើម្បីបម្រើដល់ការប្រកួតកីឡាចំនួន ៣៧ប្រភេទ ដែលមាន៥៨១វិញ្ញាសា ដោយមាន ១ប្រភេទកីឡាមិនរាប់បញ្ចូលមេដាយក្នុងបញ្ជីមេដាយផ្លូវការ គឺប្រភេទកីឡាបាល់ទាល់លើតុ។
ការកំណត់ទីតាំងប្រកួតនេះ មានប្រភេទកីឡាខុសៗគ្នា ។ សម្រាប់ខេត្តសៀមរាប ត្រូវបានជ្រើសរើសសម្រាប់ប្រកួតកីឡា ប្រណាំងកង់, ខេត្តព្រះសីហនុ រៀបចំប្រកួតកីឡាម៉ូតូទឹក និងកីឡាទូកក្ដោង, ខេត្តកែប ត្រូវរៀបចំទទួលប្រភេទកីឡាទ្រីយ៉ាថ្លុង ដែលមានបីវិញ្ញាសាដូចជា ហែលទឹកសមុទ្រ ជិះកង់ និងរត់ចម្ងាយ។
ចំណែកខេត្តកំពត គឺត្រៀមសម្រាប់ការប្រកួតកីឡាទូកប្រពៃណី ទូកកានូ និងកាយ៉ាក់។ ដោយឡែក ប្រភេទកីឡាដទៃទៀត ត្រូវប្រកួតនៅរាជធានីភ្នំពេញ ដោយក្រៅពីពហុកីឡាដា្ឋនជាតិ «មរតកតេជោ» ទីតាំងសំខាន់ៗ ដែលត្រូវប្រកួតប្រជែងមានដូចជា ពហុកីឡាដ្ឋានជាតិអូឡាំពិក ផ្សារទំនើបអ៊ីអនម៉លសែនសុខ មជ្ឈមណ្ឌលពិព័រណ៍អន្តរជាតិជ្រោយចង្វារ ស.ស.យ.ក រាជធានីភ្នំពេញ និងសាលដំបូលទូក នៃសាកលវិទ្យាល័យភូមិន្ទភ្នំពេញ។
គួរជម្រាបជូនថា ព្រឹត្តិការណ៍នេះមានរយៈពេល ១២ថ្ងៃ ដែលប្រារព្ធពីថ្ងៃទី៥ ដល់១៧ ខែឧសភា ឆ្នាំ២០២៣ ដោយមានប្រទេសសមាជិកអាស៊ានចំនួន ១១ចូលរួម។ ក្នុងនោះមានកីឡាករ និងប្រតិភូកីឡាប្រមាណ ៨ពាន់នាក់។ ទន្ទឹមនឹងនេះ កម្ពុជាក៏ត្រៀមខ្លួនស្វាគមន៍ភ្ញៀវរាប់ម៉ឺននាក់ ប្រកបដោយភាពស្នាមញញឹមរួសរាយរាក់ទាក់ និងភាពកក់ក្ដៅផងដែរ៕
