ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងជំនួបពិភាក្សាជាមួយប្រធានក្រុមប្រឹក្សាសមាគមគ្រឹះស្ថានឧត្តមសិក្សាកម្ពុជា កាលពីថ្ងៃទី២០ មីនា ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានស្នើដល់សមាគមគ្រឹះស្ថានឧត្តមសិក្សា សហការក្នុងការបណ្តុះបណ្តាលជំនាញវិជ្ជាជីវៈ (TVET) ដល់យុវជនកម្ពុជាឱ្យមានគុណភាព ដើម្បីពួកគេអាចបង្កើតអាជីពសម្រាប់ខ្លួនផ្ទាល់។
ឯកឧត្តមរដ្ឋមន្រ្តីបានមានប្រសាសន៍ថា ដើម្បីអនុវត្តតាមអនុសាសន៍របស់សម្តេចតេជោនាយករដ្ឋមន្រ្តី លើការបណ្តុះបណ្តាលជំនាញបច្ចេកទេសវិជ្ជាជីវៈជូនដល់យុវជនចំនួន ១លាន៥សែននាក់ ឯកឧត្តមស្នើដល់សមាគមគ្រឹះស្ថានឧត្តមសិក្សាកម្ពុជា សហការជាមួយគ្រឹះស្ថានបណ្តុះបណ្តាលបច្ចេកទេសវិជ្ជាជីវៈ (TVET) ក្រោមឱវាទរបស់ក្រសួងការងារ ធ្វើការបណ្តុះបណ្តាលយុវជនកម្ពុជាលើជំនាញវិជ្ជាជីវៈនេះ ឱ្យមានគុណភាព ដើម្បីបង្កើតអាជីពសម្រាប់ខ្លួនផ្ទាល់ និងនៅតាមបណ្តារោងចក្រ សហគ្រាសផ្សេងៗដែលមានតម្រូវការ។
ជាមួយគ្នានេះ ឯកឧត្តម អ៊ិត សំហេង បានធ្វើការវាយតម្លៃខ្ពស់ ចំពោះសមាគមគ្រឹះស្ថានឧត្តមសិក្សាកម្ពុជា ដែលបានធ្វើការវិនិយោគលើប្រព័ន្ធអប់រំមួយនេះ ឱ្យមានការរីកចម្រើន ហើយបានពង្រីកវិសាលភាពនៅទូទាំងប្រទេស ដើម្បីរួមចំណែកក្នុងការបណ្តុះបណ្តាលធនធានមនុស្ស ដែលជាវិស័យអាទិភាពដ៏ចាំបាច់ដែលរាជរដ្ឋាភិបាលយកចិត្តទុកដាក់ខ្ពស់ ដើម្បីចូលរួមអភិវឌ្ឍសង្គម សេដ្ឋកិច្ចរបស់កម្ពុជា។
គួរបញ្ជាក់ដែរថា បើតាមប្រសាសន៍លើកឡើង របស់សម្តេចតេជោនាយករដ្ឋមន្រ្តី បច្ចុប្បន្នកម្ពុជាមានតម្រូវការ នៃអ្នកបច្ចេកទេសកាន់តែធំ ទាំងតម្រូវការក្នុងស្រុកដែលមានស្រាប់ និងមួយផ្នែកទៀតគឺដើម្បីបំពេញសេចក្តីត្រូវការរបស់អ្នកវិនិយោគ ដែលចង់មកធ្វើការវិនិយោគនៅកម្ពុជា ដែលគេត្រូវការធនធានមនុស្សខាងបច្ចេកទេស។
សម្តេចតេជោបានបញ្ជាក់ថា ដោយសារមើលឃើញការបណ្តុះបណ្តាលជំនាញវិជ្ជាជីវៈមានតម្រូវការកាន់តែធំ ដូច្នេះហើយទើបសម្តេចបានដាក់ចេញផែនការគោលនយោបាយឱ្យក្រសួងការងារ និងស្ថាប័នពាក់ព័ន្ធធ្វើការបណ្តុះបណ្តាលលើជំនាញវិជ្ជាជីវៈដល់យុវជនកម្ពុជាប្រមាណ ១លាន៥សែននាក់ក្នុងមួយឆ្នាំ ដោយចាប់ផ្តើមពីឆ្នាំក្រោយនេះតទៅ៕
