កំពង់ស្ពឺ – ក្រោយបញ្ចប់ការសិក្សា សិស្សនិស្សិតតែងមានបំណងចង់បំពេញការងារក្នុងក្ដីស្រមៃរបស់ខ្លួន ។ យុវជនមួយចំនួនសម្រេចចិត្តបើកអាជីវកម្ម ឬប្រកបរបរដោយខ្លួនឯង រីឯចំនួនទៀតមានចំណូលចិត្តធ្វើការក្នុងវិស័យឯកជន និងមួយខ្លះទៀត ស្រឡាញ់ការងារវិស័យសាធារណៈ ឬជាទូទៅគេហៅថាការងាររដ្ឋ ។ ដូច្នេះ តើ​ធ្វើយ៉ាងដូចម្តេច ទើបអាច​ចូល​ធ្វើការងារជាមន្រ្តីរាជការ ឬការងាររដ្ឋបាន?

ក្នុងឱកាស​ចូលរួមសិក្ខាសាលាស្តីពី «ដំណើរជីវិតអ្នក អនាគតខ្ញុំ» នៅវិទ្យាល័យ​២៤កញ្ញា កាលពីពេលថ្មីៗនេះ ឯកឧត្តម យក់ ប៊ុនណា រដ្ឋលេខាធិការប្រចាំការ នៃក្រសួងមុខងារសាធារណៈ និងជានាយកសាលា​ភូមិន្ទរដ្ឋបាល បានបង្ហាញវិធីចំនួន២ ដើម្បីអាចក្លាយខ្លួនជាមន្រ្តីរាជការ ដើម្បីចូលរួម​បម្រើជាតិ បម្រើប្រជាពលរដ្ឋបាន។

បើតាម ឯកឧត្តម យក់ ប៊ុនណា វិធីទី១ ដើម្បីអាចក្លាយខ្លួនជាមន្រ្តីរាជការ គឺត្រូវ​ប្រឡង​ចូល​ដោយផ្ទាល់​នៅ​តាម​ក្រសួង ឬស្ថាប័ន​ដែលសិស្ស និស្សិត​ចង់​ចូលបម្រើការងារ និង វិធីទី២ គឺសិស្សនិស្សិត​ត្រូវ​ប្រឡង​ចូលរៀន​នៅ​សាលា​ភូមិន្ទរដ្ឋបាល ។

សម្រាប់ការប្រឡងចូលតាមក្រសួងស្ថាប័ន បេក្ខជន ឬសិស្សនិស្សិត​ត្រូវកំណត់ថា តើ​ស្ថាប័នណាដែលខ្លួនចង់ចូលបម្រើការ បន្ទាប់មកត្រូវតាមដានព័ត៌មានទាក់ទងនឹងការប្រកាសជ្រើសរើសបុគ្គលិករបស់ក្រសួង ឬស្ថាប័ន​នោះជាប្រចាំ ។ ការប្រមូល ឬតាមដានព័ត៌មាននោះទៀតសោត ​បេក្ខជន ឬសិស្សនិស្សិត ក៏​អាចសាកសួរសិស្សច្បងដែលបានប្រឡងជាប់ ឬក៏​ទៅមើលព័ត៌មាននៅក្រសួងដោយផ្ទាល់ និងតាមដានបណ្ដាញអ៊ីនធឺណិត ឬក៏គេហទំព័រព័ត៌មានផ្សេងៗជាដើម។ ចំណែកលក្ខខណ្ឌនៃការប្រឡងចូលរដ្ឋតាមរយៈស្ថាប័នក្រសួង បេក្ខជនចាំបាច់ត្រូវជាប់សញ្ញាបត្រមធ្យមសិក្សា​ទុតិយភូមិ ឬក៏​បញ្ចប់ថ្នាក់បរិញ្ញាបត្រ ទៅលើជំនាញដែលក្រសួង ឬស្ថាប័ននោះជ្រើសរើស។ រីឯមុខវិជ្ជា ដែលបេក្ខជនត្រូវប្រឡង គឺមានដូចជា មុខវិជ្ជាឯកទេស ភាសាបរទេស និងវប្បធម៌ទូទៅជាដើម។

ដោយឡែកវិធីទី២ ដែលបេក្ខជនត្រូវ​ប្រឡង​ចូល​សាលាភូមិន្ទរដ្ឋបាល​សិន ។ បើតាម​ប្រសាសន៍របស់ ឯកឧត្តម យក់ ប៊ុនណា ការប្រឡង​ចូលរៀនសាលាភូមិន្ទរដ្ឋបាល គឺមានជម្រើសចំនួន២ ដោយជម្រើសទី១ បេក្ខជនត្រូវតែបញ្ចប់ថ្នាក់បរិញ្ញាបត្ររងសិន ទើបមានសិទ្ធិប្រឡងចូលរៀនថ្នាក់សិស្សមន្ត្រីក្រមការ ដោយត្រូវទទួលការបណ្ដុះបណ្ដាលរយៈពេលមួយឆ្នាំ ។ ជម្រើសទី២ បេក្ខជនត្រូវបញ្ចប់ថ្នាក់បរិញ្ញាបត្រ ដើម្បីមានសិទ្ធិប្រឡងចូលរៀនថ្នាក់មន្ត្រីជាន់ខ្ពស់ ដោយត្រូវទទួលការបណ្ដុះបណ្ដាលរយៈពេលពីរឆ្នាំក្រោយប្រឡងជាប់។

ឯកឧត្តម យក់ ប៊ុនណា មានប្រសាសន៍បន្ថែមថា

“ដើម្បីក្លាយជាសិស្សមន្ត្រី បេក្ខជនត្រូវមានចំណេះដឹងឯកទេស ភាពក្លាហានប្រកបដោយសុជីវធម៌ និងឥរិយាបថវាងវៃជាចាំបាច់”

យ៉ាងណាក៏ដោយ បើតាមការអះអាងរបស់លោកនាយកសាលាភូមិន្ទរដ្ឋបាល ការប្រឡងចូលរៀននៅសាលាភូមិន្ទរដ្ឋបាល គឺត្រូវ​បានធានាថា មានភាពសុក្រឹត្យ យុត្តិធម៌ និងតម្លាភាព១០០ភាគរយ សម្រាប់បេក្ខជនគ្រប់រូបទាំងអស់ ។ ហេតុនេះ សូមសិស្ស និស្សិតទាំងអស់ កុំគិតថា ទាល់តែកូនអ្នកមាន ឬកូនអ្នកធំ ទើ​បអាចប្រឡងជាប់ ព្រោះការគិតបែបនេះ គឺប្រៀបដូចជាបិទផ្លូវខ្លួនឯង ។ ឯកឧត្តម យក់ ប៊ុនណា បានផ្តាំផ្ញើ​ដល់បេក្ខជន សិស្សនិស្សិតទាំងអស់ ត្រូវមានស្មារតីត្រៀមខ្លួន និងប្រឹងប្រែងរៀនសូត្រជាប្រចាំ ទើបមានឱកាសប្រឡងជាប់ ព្រោះមានតែអ្នកពូកែ និងមានសមត្ថភាពពិតប្រាកដប៉ុណ្ណោះ ដែលត្រូវបានជ្រើសរើសឱ្យចូលរៀននៅ​សាលាភូមិន្ទរដ្ឋបាល៕