ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – រាជរដ្ឋាភិបាលកម្ពុជានឹងផ្តល់អាហារូបករណ៍ដល់ការបណ្តុះបណ្តាលជំនាញវិជ្ជាជីវៈសម្រាប់យុវជនចំនួន ១លាន៥សែននាក់ ដោយពួកគេទទួលបានការសិក្សាជំនាញវិជ្ជាជីវៈដោយមិនបង់ថ្លៃ ហើយថែមទាំងទទួលបានប្រាក់ឧបត្ថម្ភពីរដ្ឋថែមទៀត។ ក្នុងចំណោមអាហារូបករណ៍នោះ មានប្រមាណ ២ ទៅ៤ភាគរយ នឹងផ្តល់ជូនសម្រាប់ការបណ្តុះបណ្តាលវិជ្ជាជីវៈ «ដូនតា»។
បើតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ក្នុងជំនួបជាមួយសិស្សនិទ្ទេស A នៅមជ្ឈមណ្ឌលពិព័រណ៍ជ្រោយចង្វា សម្តេចបញ្ជាក់ថា ការបណ្តុះបណ្តាលជំនាញវិជ្ជាជីវៈ «ដូនតា» នេះ គឺស្ថិតក្រោមការគ្រប់គ្រងរបស់ក្រសួងវប្បធម៌ និងវិចិត្រសិល្បៈ ដែលរួមមាន ជាងចម្លាក់ ស្មូន គំនូរ និងតម្បាញជាដើម។ ហើយថា កម្មវិធីបណ្តុះបណ្តាលកំពុងតែត្រូវសិក្សារួមគ្នា ហើយនៅឆ្នាំក្រោយសាលាបណ្តុះបណ្តាលរបស់ក្រសួងការងារ និងនៅតាមមូលដ្ឋាន នឹងចាប់ផ្តើមបើកទទួលយកនិស្សិតដើម្បីសិក្សា ។
សម្តេច ហ៊ុន សែន នាយករដ្ឋមន្រ្តី
“អញ្ចឹងយើងត្រូវធ្វើការបណ្តុះបណ្តាល ប្រយ័ត្នបាត់អាកន្លែងហ្នឹងទៀត ជាជាងចម្លាក់ ជាស្មូន ជាគំនូរ… ដែលជាវិជ្ជាជីវៈដូនតារបស់យើងបន្សល់ទុក.. បច្ចេកវិទ្យាថ្មីៗក៏យើងហ្វឹកហាត់ វិជ្ជាជីវៈ មុខរបរដូនតារបស់យើងបន្សល់ទុក ក៏យើងត្រូវធ្វើ ត្រូវបណ្តុះបណ្តាល… “
សម្តេចតេជោលើកឡើងថា យើងមិនអាចត្រឹមតែយកជំនាញថ្មីទេ ប៉ុន្តែជំនាញដូនតារបស់យើង ក៏ជាជំនាញដោះស្រាយការងារធ្វើ និងបង្កើតមុខរបរផងដែរ ។ សម្តេចបន្តថា កន្លងមកមានសិស្សចង់រៀន ប៉ុន្តែខ្លះគេមិនអាចរៀនបានដោយសារតែខ្វះប្រាក់ដើម្បីសិក្សា ដូច្នេះរាជរដ្ឋាភិបាលនឹងផ្គត់ផ្គង់សម្រាប់ការបណ្តុះបណ្តាលធនធានមនុស្ស។
បើតាមប្រសាសន៍របស់សម្តេចនាយករដ្ឋមន្រ្តី ការបណ្តុះបណ្តាលវិជ្ជាជីវៈ «ដូនតា» មិនត្រឹមតែមិនឱ្យបាត់បង់នោះទេ តែវានឹងធ្វើឱ្យនោះរីកចម្រើនឡើង ដែលវាជាផ្នែកមួយ នៃសមិទ្ធផលទេសចរណ៍ សម្រាប់វិស័យទេសចរណ៍ផងដែរ៕
