ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រោយការប្រកួតប្រជែងការអានក្នុងយុទ្ធនាការសៀវភៅមួយ សហគមន៍មួយ នៅបណ្ណាល័យកំពង់ស្ពឺ កាលពីថ្ងៃទី១៣ ខែមករា ឆ្នាំ២០២៣កន្លងទៅនេះ គេបានរកឃើញ ម្ចាស់ពានរង្វាន់ជើងឯកផ្នែកអំណាន ដោយបានទៅលើយុវសិស្ស នី ធារិទ្ធសកល មកពីវិទ្យាល័យកំពង់ស្ពឺ។
យុវសិស្ស នី ធារិទ្ធសកល និយាយថា រូបគេពិតជាមានការរំភើបដែលបានក្លាយទៅជាជើងឯកផ្នែកអំណាន ព្រមទាំងក្លាយជាតំណាងខេត្តកំពង់ស្ពឺ ។ ធារិទ្ធសកល ថា នឹងខិតខំធ្វើយ៉ាងណាបង្ហាញពីមុខមាត់ខេត្តកំពង់ស្ពឺទៅកាន់ឆាកជាតិឱ្យគេបានឃើញ និងបានស្គាល់ឱ្យកាន់តែច្រើន។
ជាមួយគ្នានេះដែរ យុវជនរូបនេះ ក៏បានបង្ហាញពីបំណង ចង់ឱ្យមានការបង្កើតកម្មវិធីអំណាននេះឱ្យបានច្រើន ដោយថា វាអាចលើកកម្ពស់ការអាននៅកម្ពុជា និងការ បង្កើននូវធនធានមនុស្ស ។
យុជន នី ធារិទ្ធសកល
“នៅពេលដែលប្រទេសមួយមានអ្នកចូលចិត្តសៀវភៅ អ្នកដែលចូលចិត្តអាន គឺប្រទេសនោះនឹងមានការអភិវឌ្ឍន៍ច្រើន។ តួយ៉ាង បើយើងពិនិត្យទៅមើលប្រទេសអ៊ីស្រាអ៊ែល ប្រជាជនគេចូលចិត្តអានសៀវភៅ នាំឱ្យបច្ចេកវិទ្យារបស់គេរីកចម្រើនបានលឿនជាងគេនៅលើពិភពលោក”
គួរបញ្ជាក់ថា ក្នុងការប្រកួតប្រជែងការអាន នៃយុទ្ធនាការសៀវភៅមួយ សហគមន៍មួយ នៅខេត្តកំពង់ស្ពឺ គេបានរកឃើញម្ចាស់ជ័យលាភីចំនួន៣រូប ដោយរួមមាន ជ័យលាភីលេខ១ បានទៅលើ យុវសិស្ស នី ធារិទ្ធសកល មកពីវិទ្យាល័យកំពង់ស្ពឺ ទទួលបានទឹកប្រាក់ចំនួន ១លានរៀល, ជ័យលាភីលេខ២ បានទៅលើ យុវតី ណាន់ ស្រីពៅ មកពី វិទ្យាល័យ សម្ដេចឪសម្ដេចម៉ែ បរសេដ្ឋ ទទួលបានទឹកប្រាក់ចំនួន ៦០ម៉ឺនរៀល និង ជ័យលាភីលេខ៣ បានទៅលើ យុវតី ភា រស្មី មកពី វិទ្យាល័យ វាលពង់ ទទួលបានទឹកប្រាក់ចំនួន ៣០ម៉ឺនរៀល។
ក្នុងប្រកួតប្រជែងដែលធ្វើឡើងក្នុងយុទ្ធនាការសៀវភៅមួយ សហគមន៍មួយ ខេត្តកំពង់ស្ពឺ នេះដែរ មានការចូលរួមប្រកួតប្រជែងពីយុវជនសរុបចំនួន ៥៤ នាក់ ក្នុងនោះ ស្រី៤១នាក់ ដែលមកពី ១៤ សាលា និងស្ថាប័ន។ ក្នុងនោះ បេក្ខជនជ័យលាភីប្រចាំខេត្តកំពង់ស្ពឺ នឹងត្រូវចូលរួមប្រកួតប្រជែងជាមួយបេក្ខជនជ័យលាភី២៤ខេត្តក្រុងទៀត ក្នុងកម្មវិធី “ជើងឯកបំបែកជើងឯក” ហើយអ្នកទទួលបានជ័យលាភីផ្នែកអំណានប្រចាំប្រទេសនេះ នឹងទទួលបានឱកាសទៅទស្សនកិច្ចសិក្សានៅប្រទេសជប៉ុន៕
