ក្នុង​បាឋកថាពិសេស ស្តីពី យុវជន និងការអប់រំ​នៅកម្ពុជា​ឆ្នាំ២០៣០ ដល់យុវជន នៃកម្មវិធី​ជំរំយុវជន​ជាសកល​លើកទី១១ នៅខេត្តសៀមរាប កាលពីចុងសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តី​ក្រសួងអប់រំ យុវជន និងកីឡា លើកឡើងថា ការអប់រំ​នៅកម្ពុជា​២០៣០ គឺត្រូវ​តភ្ជាប់​យ៉ាងជិតស្និទ្ធ​ជាមួយ​ទីផ្សារ​ការងារ និង​ការ​អភិវឌ្ឍ​សេដ្ឋកិច្ច។ ឯកឧត្តមសង្កត់ធ្ងន់ថា ការផ្តោតលើជំនាញវិជ្ជាជីវៈ STEM សហគ្រិនភាព នវានុវត្តន៍ និងការអនុវត្តជាក់ស្តែង នឹងជួយឱ្យយុវជនអាចរកការងារធ្វើបាន មានសមត្ថភាពបង្កើតអាជីវកម្មផ្ទាល់ខ្លួន និងអាចសម្របខ្លួនទៅនឹងការប្រែប្រួលនៃពិភពការងារនាពេលអនាគត។

បើតាម​ប្រសាសន៍ ឯកឧត្តមបណ្ឌិតសភាចារ្យ ហង់ជួន ណារ៉ុន ការអប់រំជាគ្រឹះសំខាន់បំផុត​សម្រាប់ការ​អភិវឌ្ឍយុវជននៅកម្ពុជា ឆ្នាំ២០៣០។ ការអប់រំនាពេលអនាគត មិនត្រឹមតែផ្តោតលើការផ្ទេរចំណេះដឹង​តាមសៀវភៅ​ប៉ុណ្ណោះទេ ថែមទាំងត្រូវផ្តោតលើការអភិវឌ្ឍសមត្ថភាពជាក់ស្តែង ដូចជា ជំនាញគិតវិភាគ ការដោះស្រាយបញ្ហា ការច្នៃប្រឌិត ការងារជាក្រុម និងការទំនាក់ទំនងប្រកបដោយប្រសិទ្ធភាព។ ការអប់រំប្រកបដោយ​គុណភាព​នឹងជួយបង្កើត​យុវជនដែលមានទាំងចំណេះដឹង ជំនាញ និងសីលធម៌ សមស្របនឹងតម្រូវការសង្គមសម័យសតវត្សរ៍ទី២១។

ជាមួយ​គ្នានេះ ឯកឧត្តមរដ្ឋមន្រ្តីបាន​លើកឡើងពី គំរូនៃ សាលារៀនជំនាន់ថ្មី របស់ក្រសួងអប់រំ យុវជន និងកីឡា ដែលបានដើរតួនាទីជាថ្នាលដ៏សំខាន់ក្នុងការបណ្តុះបំណិនសតវត្សទី២១ ដើម្បីជួយឱ្យយុវជនមាន​សមត្ថភាពម្ចាស់ការ​លើការគិតបែបវិភាគ និងការដោះស្រាយបញ្ហាស្មុគស្មាញ។ លើសពីការសិក្សានៅក្នុងថ្នាក់រៀន យុវជនមានភារកិច្ចសិក្សារៀនសូត្រពីបទពិសោធប្រវត្តិសាស្ត្រ និងនយោបាយអន្តរជាតិ ដើម្បីពង្រឹងស្មារតីស្នេហាជាតិ និងភាពជាអ្នកដឹកនាំ។

ឯកឧត្តមបន្ថែមថា ក្នុងនាមជាពលរដ្ឋសកល យុវជនកម្ពុជាត្រូវមានសមត្ថភាពតាមដាន និងវិភាគនូវចរន្តនយោបាយពិភពលោក និងការប្រកួតប្រជែងភូមិសាស្ត្រនយោបាយ ដើម្បីត្រៀមខ្លួនការពារផលប្រយោជន៍ជាតិ និងចូលរួមចំណែករក្សាសន្តិសុខក្នុងតំបន់។ ការយល់ដឹងពីនយោបាយអន្តរជាតិនឹងជួយឱ្យយុវជនមិនងាយរងការអូសទាញ ឬបោកបញ្ឆោតដោយព័ត៌មានក្លែងក្លាយដែលបង្កអស្ថិរភាពសង្គម។

ក្នុងយុគសម័យឌីជីថល ការបញ្ចូលបច្ចេកវិទ្យា និងបញ្ញាសិប្បនិម្មិតក្នុងវិស័យអប់រំ ក៏ជាកត្តាសំខាន់មួយសម្រាប់កម្ពុជា ឆ្នាំ២០៣០។ ឯកឧត្តម ហង់ជួន ណារ៉ុន មានប្រសាសន៍ថា យុវជនត្រូវមានសមត្ថភាពប្រើប្រាស់បច្ចេកវិទ្យាព័ត៌មាន និងឧបករណ៍ឌីជីថលដោយច្នៃប្រឌិត មានទំនួលខុសត្រូវ និងមានសុវត្ថិភាព។ ការរៀនតាមប្រព័ន្ធឌីជីថល និងការរៀនពេញមួយជីវិត នឹងជួយបើកឱកាសសិក្សាស្មើភាព និងបង្កើនសមត្ថភាពប្រកួតប្រជែងរបស់យុវជននៅលើឆាកជាតិ និងអន្តរជាតិ៕