ក្រសួងអប់រំ និងបណ្ដុះបណ្ដាលវៀតណាម គ្រោងសាកល្បង បញ្ចូលបញ្ញាសិប្បនិម្មិត (AI) ទៅក្នុងកម្មវិធីសិក្សាអប់រំទូទៅ ចាប់ពីដើមខែធ្នូ ឆ្នាំ២០២៥, នេះបើយោងតាមកាសែតវៀតណាម VN Express ។

យោងតាមសេចក្ដីព្រាងគោលការណ៍ណែនាំ ដែលចេញផ្សាយកាលពីសប្ដាហ៍មុន ការសាកល្បងនេះនឹងដំណើរការរហូតដល់ខែឧសភា ឆ្នាំ២០២៦ នៅតាមសាលារៀន ដែលបានជ្រើសរើស ខណៈព័ត៌មានលម្អិតជាក់លាក់មិនទាន់ត្រូវបានប្រកាសនៅឡើយ។

បន្ទាប់ពីបញ្ចូលទៅក្នុងកម្មវិធីសិក្សា ក្រសួងនឹងពិនិត្យ វាយតម្លៃលទ្ធផលមុនពេលបញ្ចប់ក្របខ័ណ្ឌ សម្រាប់ការអនុវត្តកាន់តែទូលំទូលាយ នៅក្នុងឆ្នាំសិក្សានាពេលអនាគត។

ក្របខ័ណ្ឌអប់រំ AI ត្រូវបានរៀបចំឡើង ដោយផ្ដោតលើផ្នែកសំខាន់ៗចំនួន ៤ រួមមានដូចជា ការគិតផ្ដោតលើមនុស្ស (Human Centered thinking), ក្រមសីលធម៌ AI, បច្ចេកទេស កម្មវិធី AI និងការរចនាប្រព័ន្ធ AI ។

ខ្លឹមសារមេរៀន នឹងរៀបចំឡើងស្របតាមអាយុ និងការអភិវឌ្ឍសមត្ថភាពខួរក្បាលរបស់សិស្សនៅទូទាំងប្រទេស ជា ២ដំណាក់កាល គឺការអប់រំជាមូលដ្ឋានសម្រាប់កម្រិតបឋមសិក្សា និងមធ្យមសិក្សា (ថ្នាក់ទី៦ ដល់ទី៩) និងការតម្រង់ទិសអាជីព សម្រាប់ថ្នាក់វិទ្យាល័យ។

នៅកម្រិតមូលដ្ឋាន សិស្សនឹងត្រូវបានណែនាំអំពី AI តាមរយៈកម្មវិធី ដែលមានមូលដ្ឋានលើរូប និងសំឡេង ដោយបញ្ជ្រាបការយល់ដឹងម្ដងបន្តិចៗអំពីការការពារទិន្នន័យផ្ទាល់ខ្លួន។ សិស្សមធ្យមសិក្សាបឋមភូមិ នឹងរៀនគោលគំនិតជាមូលដ្ឋានដូចជា ទិន្នន័យ និងក្បួនដោះស្រាយ និងការអនុវត្តអំពីរបៀបប្រើ AI ដើម្បីគាំទ្រការសិក្សា និងកំណត់អត្តសញ្ញាណហានិភ័យ និងភាពលំអៀង ដែលអាចកើតមាន។

នៅវិទ្យាល័យ សិស្សនឹងរៀនឌីហ្សាញប្រព័ន្ធ AI សាមញ្ញៗ អភិវឌ្ឍន៍ជំនាញដោះស្រាយបញ្ហាកម្រិតខ្ពស់ និងស្វែងយល់ពីការអភិវឌ្ឍអាជីពក្នុងវិស័យបច្ចេកវិទ្យា។

ក្រសួងអប់រំវៀតណាម បានសង្កត់ធ្ងន់ថា ការដាក់បញ្ជូល AI នឹងមិនធ្វើឱ្យកម្មវិធីសិក្សាបច្ចុប្បន្ន លើសកម្រិតសមត្ថភាពសិស្សនោះទេ។ សាលារៀនត្រូវបានលើកទឹកចិត្តឱ្យបន្ស៊ីខ្លឹមសារមេរៀនអំពី AI ជាមួយនឹងលទ្ធផលសិក្សារបស់សិស្ស។

សម្រាប់គ្រូបង្រៀន កម្មវិធីសាកល្បងនេះ នឹងស្វែងយល់ពីកម្មវិធី AI ក្នុងការគ្រប់គ្រងថ្នាក់រៀន ការរៀបចំផែនការមេរៀន និងវិធីសាស្ត្រវាយតម្លៃប្រកបដោយភាពច្នៃប្រឌិត។

អ្នកជំនាញបច្ចេកវិទ្យាក្នុងប្រទេសវៀតណាម លើកឡើងថា ការបញ្ចូល AI ទៅក្នុងកម្រិតបឋមសិក្សាគឺមានសារៈសំខាន់ ប៉ុន្តែត្រូវអនុវត្តតាមផែនទីបង្ហាញផ្លូវ ដោយប្រុងប្រយ័ត្ន មានសុវត្ថិភាព និងសមស្របតាមអាយុសិស្ស៕