ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពយន្តខ្លីកម្ពុជាបែបមេរៀនជីវិត ផ្លូវចិត្ត ភាពយន្តសម្រាប់កុមារ ក៏ដូចជាភាពយន្តឯកសារខ្លីពីកម្ពុជា សរុបចំនួន ៧៧រឿង មកពី២២ប្រទេស នឹងត្រូវដាក់បញ្ចាំងនៅក្នុងមហោស្រពភាពយន្តខ្លីចតុមុខ ចាប់ពីថ្ងៃទី១៧ ដល់ថ្ងៃទី២០ ខែតុលា ចុងសប្តាហ៍នេះ នៅតាមរោងភាពយន្តនានាក្នុងរាជធានីភ្នំពេញ។
លោក ស៊ុំ ស៊ីថែន ប្រធានមហោស្រពភាពយន្តចតុមុខ (CSFF) ឆ្នាំនេះ មានប្រសាសន៍ថា មហោស្រពភាពយន្តខ្លីចតុមុខមានសារៈសំខាន់ណាស់សម្រាប់ប្រទេសកម្ពុជា ដើម្បីជួយដល់ទស្សនិកជនឱ្យទទួលបានបទពិសោធន៍ ពីការស្រមើស្រមៃជាសកល និងគំនិតរបស់អ្នកផលិតភាពយន្តខ្មែរដែលនឹងជះឥទ្ធិពល មកលើប្រទេសរបស់យើង។
លោក អ៊ុង ស៊ីវថុង ប្រធានផ្នែកផលិត និងទំនាក់ទំនងនៃមហោស្រពភាពយន្តចតុមុខ (CSFF) មានប្រសាសន៍ថា CSFF ដើរតួនាទីយ៉ាងសំខាន់ក្នុងវិថីផលិតភាពយន្តរបស់លោក។ លោកបានរំលឹកថា ក្នុងឆ្នាំ២០២២ លោកបានចូលរួមជាប្រធានផ្នែកផលិត ហើយមានឱកាសដកពិសោធរៀបចំមហោស្រពពីក្រោយឆាក។ តួនាទីនេះនាំឱ្យលោកមើលឃើញទិដ្ឋភាពថ្មីមួយ ពីរបៀប រៀបចំមហោស្រព និងសារៈសំខាន់របស់មហោស្រព។ រួចមកក្នុងឆ្នាំ២០២៤ លោកបានដាក់ភាពយន្តខ្លី ដែលសហដឹកនាំ «ស្នេហ៍គ្មានស្តង់ដារ» និងបានជាប់ក្នុងការចាក់បង្ហាញ។ លោកយល់ពីឥទ្ធិពលនៃវេទិកាដែលជឿជាក់លើអ្នកមានស្នាដៃថ្មីថ្មោង។ ឆ្នាំនេះ លោកត្រឡប់មកវិញ ដោយសារចង់រៀនបន្ថែម និងជំរុញខ្លួនឱ្យកាន់តែឆ្នៃប្រតិដ្ឋ និងបន្តលូតលាស់ជំនាញតាមរយៈសហគមន៍មួយនេះ។ CSFF មិនត្រឹមតែជា មហោស្រពទេ តែជាថ្នាលបណ្តុះយុវសមិទ្ធិករ និងជួយឱ្យពួកគេមានការទទួលស្គាល់លើឆាកអន្តរជាតិថែមទៀត។
ឯកឧត្តម ទេព អស្នារិទ្ធ អនុរដ្ឋលេខាធិការ និង អ្នកនាំពាក្យក្រសួងក្រសួងព័ត៌មានបានសម្តែងការគាំទ្រដល់មហោស្រពភាពយន្តខ្លីចតុមុខ CSFF និងស្នើឱ្យផ្តោតទៅលើយុវជនជំនាន់ថ្មីដើម្បីជួយបណ្តុះបណ្តាលធនធានមនុស្សក្នុងវិស័យនេះ។ ក្នុងនោះ ឯកឧត្តមបានផ្តល់អនុសាសន៍ល្អៗមួយចំនួនដល់មហោស្រពសម្រាប់ពិចារណ៍បន្ថែមក្នុងការរៀបចំមហោស្រពក្នុងពេលខាងមុខដើម្បីឆ្លើយតមនឹងគោលនយោបាយរបស់រដ្ឋាភិបាលក្នុងចូលរួមដោះស្រាយបញ្ហាសង្គមដែលពាក់ពាក់ព័ន្ធនឹងយុវជន និងជាពិសេសជួយទប់ស្កាត់នៃការរីករាលដាល់ព័ត៍មានក្លែងក្លាយ។
“សមិទ្ធិករភាពយន្តគួរផ្តោតលើប្រធានបទដែលទាក់នឹងនឹង បំនិនជីវិត អក្ខរកម្មឌីជីថល និងការគ្រប់គ្រងហិរញ្ញវត្ថុ ក៏ដូចជា សហគិ្រនភាព និងភាពជាអ្នកដឹកនាំផងដែរ”
អស់រយៈពេល ១៤ឆ្នាំ មហោស្រពភាពយន្តខ្លីចតុមុខ បានក្លាយជាវេទិកាមួយដ៏សំខាន់សម្រាប់នាំយកភាពយន្តខ្លី អន្តរជាតិល្អៗមកកាន់កម្ពុជាដើម្បីតភ្ជាប់កម្ពុជាទៅកាន់ពិភពលោក, ជាមួយគ្នានេះ មហោស្រពភាពយន្តខ្លីចតុមុខ ក៏ជាកន្លែងបង្ហាញទេពកោសល្យ របស់អ្នកផលិតភាពយន្តរបស់កម្ពុជាទៅកាន់ពិភពលោកផងដែរ។ បើតាមសេចក្តីថ្លែងការណ៍របស់មហោស្រពភាពយន្តខ្លីចតុមុខ កាលពីឆ្នាំ២០២៣ កន្លងទៅ ភាពយន្តខ្មែរចំនួន២ត្រូវបានយកទៅចាក់បញ្ចាំងនៅមហោស្រពភាពយន្ត Asia-Pacific Youth Micro Movie Festival នៅទីក្រុងហុងកុង គឺរឿង «ស្នេហ៍ឆ្លងវេលា» និង «កញ្ញា អតិថិជន» ដែលនេះ ជាការបង្ហាញភាពរឹងមាំរបស់កម្ពុជាក្នុងការចូលរួម យ៉ាងសកម្មជាអន្តរជាតិដើម្បីអភិវឌ្ឍន៍ភាពយន្តរបស់កម្ពុជា និងក្នុងតំបន់អាស៊ីអាគ្នេយ៍។
ក្នុងឆ្នាំ២០២៥ នេះ មហោស្រពភាពយន្តខ្លីចតុមុខ នឹងរៀបចំឡើងរយៈពេល ៤ថ្ងៃជាប់ៗគ្នា គឺចាប់ពីថ្ងៃទី១៧ ដល់ថ្ងៃទី២០ ខែតុលា ហើយទស្សនិកជនដែលចង់លើកទឹកចិត្ត យុវសមិទ្ធិករ និងមានចូលចិត្តភាពយន្តខ្មែរក៏ដូចជាបរទេស អាចចូលរួមទស្សនារាល់រឿងខ្លី ជាប់ជម្រើសទាំងអស់នៅតាមរោងភាពយន្ត ដូចជា Legend Exchange Squar, Fable Cinema, Meta House, and French Institute of Cambodia៕
