យោ​ងតាម​សេចក្តីជូនដំណឹង​របស់​ក្រសួងមុខងារសាធារណៈ ក្រសួងអប់រំ យុវជន និងកីឡា កំពុងជ្រើសរើស​គ្រូបង្រៀនផ្អែក​លើ​កិច្ច​ព្រមព្រៀង​ការងារ ចំនួន ៣២១៣កន្លែង ឱ្យ​ចូលបម្រើ​ការងារ​នៅ​តាម​គ្រឹះស្ថាន​បឋមសិក្សា​សាធារណៈ ស្ថិត​នៅ​ក្នុងភូមិសាស្រ្ត​រដ្ឋបាល​ខេត្តចំនួន៥។

ខេត្តទាំង​៥ដែល​កំពុង​មានតម្រូវការនោះ​រួមមាន ៖ ខេត្តព្រៃវែង​ ចំនួន ៩៣៥កន្លែង, ខេត្តត្បូងឃ្មុំ ចំនួន៦៣៨កន្លែង, ខេត្តកំពង់ចាម ចំនួន៥៦០កន្លែង, ខេត្តបាត់ដំបង ចំនួន ៦៤៧កន្លែង និងខេត្តតាកែវ ចំនួន៤៣៣កន្លែង។

បេក្ខជន​ដែលអាច​ដាក់ពាក្យ​បាន គឺ​ត្រូវមានអាយុ​ចាប់ពី ១៨ឆ្នាំឡើង គិត​ត្រឹម​ថ្ងៃទី១៩ ខែតុលា ឆ្នាំ​២០២៥ និង​មានសញ្ញាបត្រ​ចាប់ពី​កម្រិត​បរិញ្ញាបត្រ​ គ្រប់ជំនាញ។ បេក្ខជន​ត្រូវ​ជ្រើសរើស​ឃុំ-សង្កាត់ ដែលមាន​តម្រូវការ​គ្រូបង្រៀន។

បេក្ខជន​ជាប់ស្ថាពរ នឹង​ត្រូវ​ចាត់​ឱ្យ​ទៅបំពេញ​ការងារ​នៅសាលា​បឋមសិក្សា​ក្នុងភូមិសាស្រ្ត​ឃុំ-សង្កាត់​គោលដៅ។ ដោយឡែកបេក្ខជនជាប់បម្រុង​អាច​ត្រូវ​ជ្រើសរើស​ដើម្បីបំពេញ​កន្លែង​ទំនេរ ឬទៅបង្រៀន​នៅ​សាលា​បឋមសិក្សា​ដែលមាន​តម្រូវការ​គ្រូបង្រៀន​នៅ​តាម​ភូមិសាស្រ្ត​ផ្សេងៗ​ក្នុង​ប្រទេស និង​ផ្អែក​លើ​គោល​ការណ៍​ស្ម័គ្រចិត្ត។

បើតាមក្រសួងមុខងារសាធារណៈ គ្រូបង្រៀន​ដែលនឹងត្រូវ​ជ្រើសរើសនេះ នឹង​ទទួលបានអត្ថប្រយោជន៍ដូចជា ៖ បៀវត្សប្រចាំខែ ចាប់ពី ១លាន៥សែនរៀល, បេសកកម្ម​ លំហែមាតុភាព សហព័ន្ធ កូន ប្រាក់​រង្វាន់អង្គភាព ប្រាក់ឧបត្ថម្ភ​ចូលឆ្នាំខ្មែរ និង​ភ្ជុំបិណ្ឌ ក៏​ដូចជា​ប្រាក់​ឧបត្ថម្ភផ្សេងៗ។ ការលើកទឹកចិត្ត​ផ្អែក​លើ​សមិទ្ធកម្ម និង​ទំហំការងារ ឬការងារបន្ថែម, របបគាំពារសង្គម, ការអភិវឌ្ឋអាជីព​តាម​តំណែង​វិជ្ជាជីវៈ និង​ការ​ទទួលស្គាល់​កម្រិត​វិជ្ជាជីវៈ, ទទួល​បាន​ការ​បណ្តុះបណ្តាល​អភិវឌ្ឍន៍​ជំនាញ​បច្ចេកទេសក្នុង និ​ងក្រៅប្រទេស, ទទួលបានសិទ្ធិឈប់សម្រាក, ការផ្តល់បណ្ណសរសើរ គ្រឿង​ឥស្សរិយយស និង​ការ​លើកទឹកចិត្ត​ក្នុងទម្រង់​ផ្សេងទៀត​តាមការ​សម្រេច​របស់​រាជរដ្ឋាភិបាល។

សម្រាប់បេក្ខជនដែលចាប់អារម្មណ៍ អាច​ចូលទៅកាន់គេហទំព័រ https://go.gov.kh/era/mcs25moeys ដើម្បីបំពេញ​ព័ត៌មាន​សុំសិទ្ធប្រឡង​ប្រជែង។

ការចុះឈ្មោះចាប់ពីថ្ងៃជូនដំណឹងនេះ រហូត​ដល់ថ្ងៃទី១៩ ខែតុលា ឆ្នាំ២០២៥ វេលាម៉ោង ១៧:០០នាទី ជាកំហិត។ ដោយឡែកវិញ្ញាសាប្រឡងប្រជែង រួមមាន ១. វិញ្ញាសាសរសេរ (សំណួរពហុចម្លើយ​និង​ចម្លើយ​សរសរ​ខ្លីៗ​ពាក់ព័ន្ធ​នឹង​ចំណេះដឹង​ក្នុងសៀវភៅ​សិក្សា​គោល​ភាសាខ្មែរ និង​គណិតវិទ្យា កម្រិតបឋម កម្រិតអនុវិទ្យាល័យ កម្រិតវិទ្យាល័យ និង​គរុកោសល្យ​បង្រៀន​នៅ​បឋមសិក្សា) និង ២. វិញ្ញាសាពហុចម្លើយ រួមមាន ចំណេះដឹងទូទៅ (មុខងារសាធារណៈ, ក្រមសីលធម៌វិជ្ជាជីវៈគ្រូបង្រៀន, វប្បធម៌អរិយធម៌ខ្មែរ) និងភាសាអង់គ្លេស (កម្រិតមូលដ្ឋាន)៕