ចាប់ផ្តើម​តាំងពីសប្តាហ៍​មុន​មក​ម្ល៉េះ ក្រោយការ​ប្រកាស​លទ្ធផលបាក់ឌុបរួច សិស្សានុសិស្សបាន​ចាប់ផ្ដើមទៅសាកសួរព័ត៌មាន ក៏ដូចជាទិញពាក្យដើម្បីប្រឡងចូលរៀននៅតាម​សាកលវិទ្យាល័យនានា នៅរាជធានីភ្នំពេញ។

នៅកន្លែងផ្ដល់ព័ត៌មានជ្រើសរើសជំនាញសិក្សា និងចុះឈ្មោះសិក្សា ក្នុងសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច កញ្ញា វិន ម៉ារី ជាសិស្សមកពីសាលារៀនប៊ែលធី អន្តរជាតិ ដែលទើបប្រឡងជាប់បាក់ឌុបឆ្នាំនេះ បានប្រាប់ថា កញ្ញាមក​ទីនេះ ព្រោះតែចង់ដឹងព័ត៌មានអំពីជំនាញសិក្សា និងចង់ចុះឈ្មោះចូលរៀនលើមុខជំនាញទំនាក់ទំនងអន្តរជាតិ (IR) ។ ម៉ារី លើកឡើងថា ការជ្រើសរើសរៀនជំនាញទំនាក់ទំនងអន្តរជាតិ (IR) នេះ គឺដោយសារតែនាងស្រឡាញ់ និងយល់ថា ជំនាញនេះមានសារៈសំខាន់សម្រាប់ខ្លួនឯង ជួយឱ្យការប្រាស្រ័យទាក់ទងកាន់តែល្អជាងមុន។ លើសពីនេះ ជំនាញទំនាក់ទំនងអន្តរជាតិ ក៏សំខាន់សម្រាប់ប្រទេសជាតិដែលកំពុងត្រូវការធនធានមនុស្សផ្នែកនេះ ក្នុងការទំនាក់ទំនងរវាងប្រទេសមួយ និងប្រទេសមួយ។

កញ្ញា វិន ម៉ារី សង្ឃឹមថា ក្រោយពេលបញ្ចប់ការសិក្សាជំនាញទំនាក់ទំនងអន្តរជាតិ (IR) នឹងអាចរកការងារធ្វើផ្នែកទំនាក់ទំនងនៅក្នុងក្រុមហ៊ុន ឬបង្កើតអាជីវកម្មខ្លួនឯង។

សម្រាប់លោក សរ រិទ្ធិស័ក្ត ដែល​សិស្សមកពីសាលាអន្តរជាតិ អាយឃ្យូ ខេត្តសៀមរាប ដែល​ក៏​ទើបប្រឡងជាប់បាក់ឌុបឆ្នាំនេះ ក៏​បាន​មក​សាកសួរព័ត៌មាន នៅ​សាកលវិទ្យាល័យ​ភូមិន្ទនីតិសាស្រ្ត និង​វិទ្យាសាស្រ្ត​សេដ្ឋកិច្ច​ដែរ, រិទ្ធិស័ក្ត ចង់ចុះឈ្មោះសិក្សាលើជំនាញព័ត៌មានវិទ្យា (IT) ព្រោះតែខ្លួនស្រឡាញ់ជំនាញនេះ និងដោយមើលឃើញថាប្រទេសកម្ពុជាកំពុងវិវឌ្ឍលើវិស័យឌីជីថល។

រិទ្ធិស័ក្ត រំពឹងថា ក្រោយពេលបញ្ចប់ការសិក្សាលើជំនាញព័ត៌មានវិទ្យា (IT) ខ្លួន​នឹងមានសមត្ថភាព​អាចធ្វើការក្នុងក្រុមហ៊ុន ស្ថាប័នផ្សេងៗ ឬអាចជាការងារមន្រ្តីរាជការ។

កញ្ញា ថាន់ ឆវន្ន័ សិស្សទើបប្រឡងជាប់បាក់ឌុប​មកពីវិទ្យាល័យហ៊ុនសែន សេរីភាព ក៏​មក​ចុះចូលរៀន​នៅសាកលវិទ្យាល័យភូមិន្ទនិសតិសាស្រ្ត និងវិទ្យាសាស្រ្តសេដ្ឋកិច្ច ដែរ ដោយនាងស្រឡាញ់ជំនាញគ្រប់គ្រង។ កញ្ញា ឆវន្ន័ មើលឃើញថា ជំនាញគ្រប់គ្រង មានទីផ្សារល្អ ហើយរំពឹងថា ពេលរៀនចប់ ជំនាញនេះ​នឹង​ជួយ​នាង​ឱ្យ​មានការងារល្អដើម្បីផ្គត់ផ្គង់ខ្លួនឯង មានន័យថា ពេលរៀនចប់ នាងអាចបើកអាជីវកម្ម និងគ្រប់គ្រងអាជីវកម្មដោយខ្លួនឯង។

ដោយឡែក​នៅ​សាកលវិទ្យាល័យភូមិន្ទភ្នំពេញ ដែលស្ថិត​នៅ​តាម​បណ្តោយ​មហាវិថីសហព័ន្ធរុស្ស៊ីវិញ សិស្សានុសិស្សដែល​ទើប​ប្រឡង​ជាប់បាក់ឌុបជាច្រើន បានចូលមក​កាន់ទីនេះ​មិនចេះដាច់ ដើម្បីសាកសួរព័ត៌មានអំពីជំនាញសិក្សា ហើយ​ខ្លះ​ក៏​ទិញពាក្យប្រឡងចូលរៀនជំនាញដែលខ្លួនពេញចិត្តតែម្តង។

កញ្ញា យ៉េង ស្រីគុជ សិស្សមកពីវិទ្យាល័យហោណាំហុងព្រៃញា ខេត្តកំពង់ចាម បានសម្រេច​ចិត្ត​ទិញពាក្យប្រឡងចូលរៀនជំនាញអក្សរសាស្រ្តខ្មែរ នៅសាកលវិទ្យាល័យភូមិន្ទភ្នំពេញ។ ស្រីគុជ និយាយថា មានជំនាញចំនួន២ដែលនាងស្រឡាញ់ពេញចិត្តតាំងពីក្មេង គឺជំនាញច្បាប់ និងជំនាញអក្សរសាស្រ្តខ្មែរ។ នាងថា ដំបូងនាងចង់រៀនច្បាប់ដើម្បីបានធ្វើជាមេធារី ប៉ុន្តែដោយសារគ្រួសារខ្វះលទ្ធភាព ទើបនាងសម្រេចចិត្តរៀនជំនាញអក្សរសាស្រ្តខ្មែរវិញ ហើយ​រំពឹងថា នឹងបានធ្វើជាគ្រូបង្រៀននៅថ្ងៃអនាគត។

សម្រាប់ កញ្ញា ទន់ ជីតា សិស្សមកពីវិទ្យាល័យហោណាំហុងព្រៃញា ខេត្តកំពង់ចាម ជាមួយ ស្រីគុជ នាង​បាន​មក​ទិញពាក្យប្រឡងចូលរៀនជំនាញអក្សរសាស្រ្តអង់គ្លេស។ ជីតា និយាយថា នាងសម្រេចចិត្តជ្រើសរើសជំនាញអក្សរសាស្រ្តអង់គ្លេស ដោយសារស្រឡាញ់តាំងពីតូចមក និងចង់យកចំណេះដឹងនេះ ទៅបង្រៀនក្មេងៗនៅតាមជនបទ ពិសេសនៅតំបន់ដាច់ស្រយាលដែលមិនមានភាសាបរទេសទូលំទូលាយ ខណៈអក្សរសាស្រ្តអង់គ្លេស ជាភាសាទូទៅដែលគេប្រើប្រាស់នៅទូទាំងពិភពលោក ដូច្នេះបើសិនអាចបង្រៀនក្មេងៗឱ្យចេះបានច្រើន កញ្ញាយល់ថា នេះគឺសកម្មភាពល្អជួយដល់ប្រទេសជាតិយើង។ ក្រោយរៀនចប់កញ្ញា ទន់ ជីតា មានក្ដីស្រមៃចង់ធ្វើជាគ្រូបង្រៀនផ្នែកភាសាអង់គ្លេស។

លោក គួង សំណាង ប្រធានដេប៉ាតឺម៉ង់ វិស្វកម្ម ទូរគមនាគមន៍ និងអេឡិចត្រូនិច នៃមហាវិទ្យាល័យវិស្វកម្ម សាកលវិទ្យាល័យភូមិន្ទភ្នំពេញ ដែល​កំពុង​អង្គុយពន្យល់សិស្សានុសិស្សអំពីការជ្រើសរើសជំនាញសិក្សា និងផ្ដល់ព័ត៌មានដល់សិស្ស មើលឃើញថា សិស្សានុសិស្សបាន​មកទិញពាក្យប្រឡងចូលរៀន​នៅ​សាកលវិទ្យាល័យភូមិន្ទភ្នំពេញមានចំនួនច្រើន បើទោះមានភ្លៀងធ្លាក់ ក៏នៅតែឃើញមានសិស្សតស៊ូមកទិញពាក្យប្រឡងចូលរៀន ព្រោះពួកគេគិតថាការសិក្សាមានសារៈសំខាន់។

ជាការកត់សម្គាល់របស់លោក គួង សំណាង សិស្ស​ដែលមក​ដាក់ពាក្យ​ភាគច្រើន​ចាប់អារម្មណ៍លើមុខវិជ្ជាសង្គម ហើយក៏មានសិស្សមួយចំនួនចាប់អារម្មណ៍លើជំនាញកុំព្យូទ័រ។ លោកថា មុខជំនាញវិស្វកម្ម ទូរគមនាគមន៍ និងអេឡិចត្រូនិចវិញ គឺមិនសូវមានសិស្សស្គាល់នោះទេ។

បើតាមលោក គួង សំណាង ជំនាញវិស្វកម្ម ទូរគមនាគមន៍ និងអេឡិចត្រូនិច គឺប្រៀបដូចជាឆ្អឹងខ្នងនៃប្រទេសជាតិទាំងមូល និងមានឱកាសទីផ្សារការងារច្រើន។

ការប្រឡង​សញ្ញាបត្រ​មធ្យមសិក្សា​ទុតិយភូមិ​ឆ្នាំនេះ បានប្រព្រឹត្ត​ទៅកាលពីថ្ងៃទី២៨ ខែសីហា ឆ្នាំ២០២៥ ហើយ​លទ្ធផល​បាន​ប្រកាស​កាលពីថ្ងៃទី២០ ខែកញ្ញា ដោយមាន​បេក្ខជនប្រមាណជាង ១២ម៉ឺននាក់ ដែលស្មើ​នឹង ៨៤.៥៦ភាគរយ បានប្រឡងជាប់។ តាមទិន្នន័យរបស់ក្រសួងអប់រំ យុវជន និង​កីឡា ក្នុង​ចំណោម​បេក្ខជនដែលបានជាប់សរុបចំនួន ១២២ ៤៧៣នាក់ ក្នុងនោះបេក្ខជនជាប់និទ្ទេស A មានចំនួន ៣០០៣ នាក់, និទ្ទេស B ចំនួន ៩៩០១ នាក់, និទ្ទេស C ចំនួន ២៨ ៨០១ នាក់, និទ្ទេស D ចំនួន ៤៥ ៨៥៩ នាក់ និងនិទ្ទេស E ចំនួន ៣៤ ៩០៩ នាក់៕