អស់រយៈពេលជាយូរមកហើយ ដែលឪពុកម្ដាយ យល់ថា លទ្ធផលនៃការសិក្សា ដែលបង្ហាញតាមរយៈការទទួលបានពិន្ទុខ្ពស់របស់កូន គឺជាគន្លឹះ នៃភាពជោគជ័យនាពេលអនាគតរបស់ពួកគេ។ ប៉ុន្តែអ្នកជំនាញយល់ថា ប្រាជ្ញាខួរក្បាលតែមួយមុខមិនទាន់គ្រប់គ្រាន់ សម្រាប់ភាពជោគជ័យរបស់កុមារទេ។ បើតាមការបញ្ជាក់របស់អ្នកជំនាញចិត្តសាស្ត្រ បញ្ញាផ្នែកអារម្មណ៍ (EQ) ជាកត្តាគន្លឹះដែលជួយកុមារ សម្រេចភាពជោគជ័យក្នុងជីវិត ព្រោះបញ្ញាផ្នែកអារម្មណ៍ ជាជំនាញ ដែលជួយកុមារ សម្របខ្លួនជាមួយអ្នកដទៃ ដឹងពីរបៀបទំនាក់ទំនង ការដោះស្រាយបញ្ហា និងគ្រប់គ្រងអារម្មណ៍ខ្លួនឯង។

ស្របនឹងការលើកឡើងនេះ លទ្ធផលនៃការស្រាវជ្រាវ បានបង្ហាញថា កុមារដែលអាចយល់ និងគ្រប់គ្រងអារម្មណ៍ខ្លួនឯងបានល្អ មានទំនោរទទួលបានលទ្ធផលល្អ ក្នុងការសិក្សា។

ការសិក្សា ដែលធ្វើឡើងដោយសមាគមចិត្តសាស្ត្រអាមេរិក ក្នុងទស្សនាវដ្តី Psychological Bulletin បានរកឃើញថា សិស្ស ដែលមានបញ្ញាផ្នែកអារម្មណ៍ខ្ពស់ មានទំនោរធ្វើបានល្អ ក្នុងការសិក្សា ដោយបានទាំងពិន្ទុ និងចំណាត់ថ្នាក់ល្អ។

អ្នកស្រាវជ្រាវ បានសិក្សាលើទិន្នន័យ ដែលបានបោះពុម្ពផ្សាយជាង ១៦០ ចន្លោះពីឆ្នាំ១៩៩៨ ដល់ឆ្នាំ២០១៩ ដែលមានការចូលរួមពីសិស្សចំនួន ៤២,០០០នាក់ ចាប់ពីថ្នាក់បឋមសិក្សារហូតដល់មហាវិទ្យាល័យ ដោយមានការចូលរួមពីនិស្សិតមកពី ២៧ប្រទេស ដែលជាង ៧៦ភាគរយ ជាអ្នកនិយាយភាសាអង់គ្លេស។

បណ្ឌិត Carolyn MacCann អ្នកដឹកនាំក្រុមអ្នកស្រាវជ្រាវ បានលើកឡើងថា ទោះបីជាយើងដឹងថា ភាពឆ្លាតវៃខួរក្បាល (IQ) និងបុគ្គលិកលក្ខណៈដែលមានមនសិការខ្ពស់ មានសារៈសំខាន់ខ្លាំងសម្រាប់ភាពជោគជ័យក្នុងការសិក្សាក៏ដោយ តែការស្រាវជ្រាវរបស់លោកស្រី និងក្រុមការងារ បានរកឃើញកត្តាទី៣ គឺភាពឆ្លាតវៃផ្នែកអារម្មណ៍ (EQ) ក៏ជាចំណែកសំខាន់ ជួយសិស្សទទួលភាពជោគជ័យក្នុងការសិក្សាដែរ។

លោកស្រីបណ្ឌិតបន្ថែមថា ភាពវ័យឆ្លាត និងឧស្សាហ៍ព្យាយាមមិនទាន់គ្រប់គ្រាន់ទេ សិស្សក៏ត្រូវតែអាចយល់ និងគ្រប់គ្រងអារម្មណ៍របស់ពួកគេបានដែរ ដើម្បីទទួលភាពជោគជ័យក្នុងសាលា។

បើតាមអ្នកជំនាញរូបនេះ បញ្ញាផ្នែកអារម្មណ៍ស្ដែងឡើងតាមរយៈ សមត្ថភាពគ្រប់គ្រងអារម្មណ៍អវិជ្ជមាន ដូចជាការថប់បារម្ភ អារម្មណ៍ធុញទ្រាន់ និងការខកចិត្ត ដែលអាចប៉ះពាល់ដល់ដំណើរការនៃការសិក្សា។ ក្រៅពីគ្រប់គ្រងអារម្មណ៍ខ្លួនឯងបានល្អ កុមារក៏អាចសម្របខ្លួនទៅក្នុងសង្គម បង្កើតទំនាក់ទំនងកាន់តែងាយស្រួលជាមួយគ្រូបង្រៀន មិត្តភក្តិ និងគ្រួសារ ដែលផ្នែកទាំងនេះ មានសារៈសំខាន់ខ្លាំងចំពោះភាពជោគជ័យក្នុងការសិក្សា។

លោកស្រីបណ្ឌិត បានសង្កត់ធ្ងន់ថា ជំនាញសំខាន់ៗក្នុងភាពវៃឆ្លាតផ្នែកអារម្មណ៍ ដូចជា សមត្ថភាពយល់ដឹងអំពីការលើកទឹកចិត្ត និងអារម្មណ៍មនុស្ស ក៏អាចជួយកុមារងាយសិក្សាមុខវិជ្ជាប្រវត្តិសាស្ត្រ និងភាសាផងដែរ។

ការបង្រៀនកុមារឱ្យស្គាល់ និងគ្រប់គ្រងអារម្មណ៍ខ្លួនឯង គឺជាការបង្រៀនដ៏មានតម្លៃបំផុត សម្រាប់ភាពជោគជ័យ ក្នុងជីវិតកុមារទាំងក្នុងការសិក្សា និងអនាគតពួកគេ។ ព្រោះតាមរយៈការបំពាក់ជំនាញនេះ សម្រាប់កុមារ ពួកគេនឹងមានការគោរពខ្លួនឯងខ្ពស់ លទ្ធផលសិក្សាកាន់តែប្រសើរ ជោគជ័យផ្នែកហិរញ្ញវត្ថុ និងសុខភាពទូទៅល្អប្រសើរ៕